Son bir həftə ərzində yüzlərlə rusiyalı muzdlu Suriyada öldürülüb və yaralanıb
Reuters-in məlumatına görə, Rusiya vətəndaşı olan 300 nəfər ötən həftə Suriyada öldürülüb və yaralanıb.
Reuters-in həmsöhbətlərindən biri rusiyalı hərbi həkimdir. O, danışıb ki, ölənlərin arasında Vaqnerin hərbi şirkəti ilə əməkdaşlıq edən yüz nəfər də olub. Vaqnerin özəl hərbi şirkəti ilə bilavasitə bağlı olan və şirkətin bir neçə döyüşçüsünü tanıyan mənbə “Reuters”ə bu məlumatı təsdiqləyib.
Moskva hospitallarından birinin həkimi agentliyə bildirib ki, hazırda onun xəstəxanasında Suriyada yaralanmış 50-dən çox rusiyalı hərbçi var. Yaralanan muzdluların qalanı Moskva, Moskva ətrafı və Sank-Peterburqdakı üç tibb müəssisəsinə yerləşdirilib.
Amerikanın bir çox media orqanı artıq məlumat vermişdi ki, 2018-ci il fevralın 7-də rusiyalı muzdlular Suriyada ABŞ-ın rəhbərlik etdiyi koalisiyanın aviasiya və artilleriya zərbəsi altına düşüb. Pentaqonda keçirilən mətbuat konfransında ABŞ Hərbi Hava Qüvvələri mərkəzi komandanlığının rəhbəri general-leytenant Ceffri Harriqian həmin gün Suriyanın Deyr-əz-Zor əyalətində nə baş verdiyini danışıb.
Onun sözlərinə görə, “Suriya Demokratik Qüvvələrinin” nəzarətində olan rayonu naməlum rəqib ələ keçirmək istəyib. Beynəlxalq koalisiya üsyançılara öz mövqelərini qorumağa kömək edib. Koalisiya rəhbəri hücumçular arasında rusiyalı hərbçilər və ya muzdluların olduğunu bilməyib.
General həmçinin bildirib ki, zərbə endirməzdən əvvəl Amerika tərəfi Rusiyanın Suriyadakı komandanlığı ilə əlaqə saxlayıb və hücum haqda məlumat verərək, koalisiyanın cavab zərbəsi endirmək niyyətində olduğunu xəbər verib. Harriqian Rusiya tərəfinin bu məlumatlarla bağlı reaksiyasını açıqlamayıb.
Fevralın 15-ə qədər Rusiya hakimiyyəti Suriyada həlak olan rusiyalı muzdlularla bağlı informasiyanı şərh etməkdən imtina edirdilər. Dünən Rusiya XİN nümayəndəsi Mariya Zaxarova bildirib ki, fevralın 7-də Suriyada beş rusiyalının həlak olduğu ehtimal edilir. Zaxarova vurğulayıb ki, bu şəxslərin vətəndaşlığı ilə bağlı məlumat hələ təsdiqlənməyib və yoxlanılır. Onun sözlərinə görə, bu şəxslər dəqiq Rusiya hərbçisi olmayıb.
