Seçkilərə yeni qaydalarla: Ermənistanın MSK-ı səsvermə qaydasını dəyişib

Ermənistanın Mərkəzi Seçki Komissiyası növbədənkənar seçkilərin keçirilməsi üzrə tədbirlərin qrafikini təsdiqləyib və səsvermə qaydasını dəyişib. İndi seçicilər bülletendə heç nə qeyd etməyəcəklər, onlar sadəcə müvafiq siyasi qüvvənin bülletenini seçməli, səsvermə zərfinə qoymalı və seçki qutusuna atmalı olacaqlar.

Seçkiqabağı kampaniya iyunun 7-dən başlayır və iyunun 18-i saat 24:00-a qədər davam edəcək.

Növbədənkənar parlament seçkiləri iyunun 20-ə təyin edilib.

Mayın 10-da Ermənistan parlamenti özünü buraxıb. İqtidar bloku və iki müxalifət partiyası ölkədə siyasi böhranın qarşısını almaq üçün növbədənkənar seçki keçirilməsi ilə bağlı razılığa gəlib.

Elə həmin gün Ermənistan prezidenti Armen Sarqsyan Milli Məclisin buraxılması və seçkinin iyunun 20-ə təyin olunması haqda fərman imzalayıb.

Ermənistanda siyasi böhran 2020-ci ilin payızında Qarabağda gedən müharibədən sonra yaranıb. Ermənistan tərəfinin məğlubiyyətindən dərhal sonra müxalifət baş nazirin istefasını tələb etməyə başlayıb. Amma Nikol Paşinyan bildirib ki, bu vəzifəyə bütün ölkə vətəndaşlarının iradəsi ilə seçilib və sadəcə müxalifət tərəfdarlarının tələbi ilə getməyəcək. Yeganə çıxış yolu qalırdı – növbədənkənar seçkilərin keçirilməsi.

• Bütün şərtlər nəzərə alınıb: Ermənistan parlamenti özünü buraxıb
• Seçki ərəfəsində bəyanat: Ermənistanın eks-prezidenti Robert Koçaryan “Hayastan” blokuna rəhbərlik edəcək

Seçkilərə qələmsiz

Mərkəzi Seçki Komissiyasının katibi Armen Smbatyan bildirib ki, iyunun 20-də səsvermə zamanı qələmə ehtiyac olmayacaq. Məsələ burasındadır ki, Ermənistanda ilk dəfə proporsional sistem üzrə seçki keçiriləcək və bülletenlərin arxa tərəfində əvvəllər olduğu kimi majoritar namizədlərin adları artıq qeyd olunmayacaq:

“Səsvermə zamanı işarələmək üçün qələmdən istifadə olunmayacaq. Səsvermə bu qayda ilə həyata keçiriləcək: seçici bülletenlərdən birini [seçmək istədiyi bu və ya digər siyasi qüvvənin bülletenini] seçəcək və zərfə qoyacaq”.

Proporsional seçki sistemi seçkili hakimiyyət orqanlarının partiya siyahıları ilə formalaşdırılmasını nəzərdə tutur. Proporsional sistemüzrə seçki keçirilən zaman deputat mandatları partiyaların topladığı səs sayına tam müvafiq şəkildə bölünür.

Təbliğat qrafiki və qaydası

Seçki məntəqələri mayın 26-a qədər formalaşdırılacaq, partiyalar və partiya blokları isə qeydiyyat üçün sənədləri 26 may 18:00-a qədər MSK-a təqdim etməlidirlər.

“Göstərilmiş dövrdə qeydiyyat üçün sənədlərlə birlikdə partiyalar 5 kv.m-dən böyük sahəsi olan reklam lövhələrində təbliğat posterlərinin yerləşdirilməsi üçün bəyanlarını da təqdim edə bilərlər. Sorğuların verilməsi üçün ən son müddət iyunun 5-dir”, – MSK sədri Tiqran Mukuçyan bildirib.

Partiyalar və partiya blokları seçkilərdə iştirak üçün mayın 30-a qədər qeydiyyatdan keçə biləcək.

Seçkilərə nəzarət

MSK sədri jurnalistlərə bildirib ki, 1500 əsas seçki məntəqəsində videokameralar yerləşdiriləcəkk. Məntəqələrdə səslərin sayımında səlahiyyətli nümayəndələr, müşahidəçilər və jurnalistlər iştirak edə biləcəklər.

Mayın 10-da parlament buraxılmazdan əvvəl parlamentdə çıxış edərkən baş nazir əvəzi Nikol Paşinyan vurğulayıb ki, Ermənistan hakimiyyəti istəsə də seçkilərin nəticələrini saxtalaşdıra bilməyəcək:

“Ölkədə seçki məntəqələrinin 97 faizində Mərkəzi Seçki Komissiyasının videokameraları quraşdırılacaq, onlar canlı yayım həyata keçirəcəklər. MSK-nın kameralarından başqa, indi hamının telefonunda kamera var. Onların köməyi ilə yalnız çəkmək yox, həm də canlı yayım aparmaq mümkündür. İstər hakimiyyətdən, istərsə də müxalifətdən olan namizədlərin səlahiyyətli nümayəndələri məntəqələrdən canlı yayım aça biləcəklər. Hər bir seçici bülleteninin telekamera obyektivində olacağını desək şişirtmiş olmarıq”.

İqtidar qüvvəsinin liderinin sözlərinə görə, ölkədə intitusional dəyişikliklər baş verib və indi artıq hakimiyyətdə kimin olacağına real olaraq xalq qərar verir. Paşinyan bunu 2018-ci ilin “məxməri” inqilabı nəticəsində hakimiyyətə gələn hökumətinin xidməti hesab edir.