Sərmayədarlar “Uber”in sahibini işdən çıxarıb

Nəqliyyat xidmətləri göstərən “Uber” şirkətinin Direktorlar Şurasının yaradıcısı və sədri Terens Kalanik bu vəzifədən getdiyini elan edib. Bu addımın səbəbləri barədə “The New York Times” qəzeti xəbər tutub.

Kalanik “Uber”i 2009-cu ildə yaradıb və on ildən az bir müddət ərzində şirkətə ağlasığmaz uğur gətirib. Hazırda onun aksiyalarının qiyməti 70 milyard dollardır, bu, dünyada özəl şirkətlər üçün ən yüksək göstəricilərdən biridir.

Amma son bir il ərzində şirkət bir sıra problemlərlə üzləşib. Əvvəlcə şirkət işçiləri kütləvi şəkildə iş yerində seksual təcavüz cəhdi və “Uber” rəhbərliyinin buna göz yummasından şikayət etməyə başladılar.  

Sonra da şirkətlə əməkdaşlıq edən sürücülər narazılıqlarını bildirməyə başladılar. Onlar şirkəti video oyunlarından götürülən manipulyativ texnologiyaların tətbiqində suçladılar. Sürücüləri işlərini qazanc müqabilində deyil, heç bir dəyəri olmayan “Nümunəvi sürücü”, “Qüsursuz sürücü” və buna oxşar adlar almaq üçün davam etdirməyə çağırırdılar.

Bundan başqa, vergi orqanlarında da şübhə yarandı ki, şirkət ona vergi yükünü azaltmağa imkan verən kompüter texnologiyasından istifadə edir.

“Uber” kütləvi informasiya vasitələri və ictimaiyyət tərəfindən kəskin tənqidə məruz qaldı.

Nəticədə şirkətin beş əsas sərmayədarı (2009-cu ildən şirkət 14 milyard dollarlıq sərmayə cəlb edib) Terens Kalanikin istefasını tələb etdilər. Kalanikin aksiya çoxluğuna sahib olmasına baxmayaraq, o, bu tələbə tabe olmağa məcbur olub.