Rusiyanın Türkiyədəki səfiri qətlə yetirilib

Ankarada Rusiyanın Türkiyədəki səfiri Andrey Karlova qarşı sui-qəsd olunub. Bu, Müasir İncəsənət Mərkəzində foto sərginin açılış mərasimi  zamanı baş verib. Səfir çıxış edərkən bir nəfər “Allahu Əkbər! Siz Suriyada günahsız insanları öldürürsüz! Biz Suriyada ölürük, sənsə burada öləcəksən, – sözləri ilə onu güllələyib. Müxtəlif məlumatlara görə, o 7-8 dəfə atəş açıb.  Hücum çəkən bir neçə foto-şəkli də sındırıb. 

62 yaşlı Andrey Karlov xəstəxanaya çatdırılandan sonra dünyasını dəyişib.

Hücum çəkən Türkiyənin xüsusi xidmət orqanlarının əməkdaşları tərəfindən öldürülüb. Onun şəxsiyyəti barədə dəqiq informasiya yoxdur.

Bəzi məlumatlara görə, o özünü xüsusi xidmət orqanları işçisi, digər məlumatlara görə isə polis əməkdaşı kimi qələmə verib.

Sui-qəsd Suriyanın xarici işlər nazirinin Moskvaya səfərindən bir gün əvvəl baş verib, səfərin məqsədi rusiyalı və iranlı həmkarlarla Suriyadaki vəziyyətin müzakirəsi idi. Danışıqlar hələ ki, təxirə salınmayıb.

Öldürülən səfir Şərqi Hələbin təxliyəsi ilə bağlı danışıqlarda iştirak edib, həm də Rusiyanın vurulan bombardmançı təyyarəsi ilə bağlı insidentdən sonra Rusiya-Türkiyə münasibətlərinin tənzimlənməsində fəal iştirak edib.

Türkiyənin ABŞ-dakı səfiri özünün Twitter səhifəsində yazıb: “Bu güllələr.. Türkiyə-Rusiya münasibətlərinə tuşlanıb.

Dərc olunub: 20.12.2016