Rusiyanın Türkiyədəki səfirliyi səfirin qətli əks etdirən fotonun mükafatlandırılmasını mənəvi deqredasiya adlandırıb

Jürinin qərarı əsasında World Press Photo tərəfindən Rusiyanın Türkiyədəki səfirinin qətlini əks etdirən fotonun ilin fotosu elan edilməsini Rusiyanın Türkiyədəki səfirliyi mənəvi deqradasiyanın son həddi adlandırıb.

“World Press Photo jürisinin seçimi sarsıdıcıdır. Mənəvi dəyərlərin deqradasiyasının son həddi. Dərin təəssüf hissi keçiririk ki, şöhrət dalınca qaçarkən hər cür vasitəyə əl atılır. Terror dəhşətinin təbliğatı yolverilməzdir”, – səfirliyin bəyanatında bildirilir.

Fevralın 13-də The Associated Press  agentliyinin fotoqrafı Burhan Özbilicinin işi World Press Photo müsabiqəsində ilin fotosu elan edilib. Fotoda səfir Andrey Karlovun qətl məqamı əks olunub. Özbilicinin bu mövzu ilə bağlı fotoreportajı da “Fövqəladə xəbər” kateqoriyasında ən yaxşı adına layiq görülüb.

Bu qərar müzakirələrə səbəb olub. Qalib açıqlanandan sonra jüri sədri Stüart Franklin öz jürinin ümumi rəyi ilə razı olmadığını bildirib və bəyan edib ki, mənəvi dəyərlər baxımından bu işə səs verməyib, “bu terror obrazı ilin fotoqrafiyası olmamalı idi”.

“Özbilicinin fotoqrafiyası şübhəsiz ki, effektlidir. Eyni zamanda mən bu işin xəbər fotosu kimi mükafatlandırılmasını dəstəkləyirdim, hansının ki, qalibi oldu, amma ilin fotosu olmasının qətiyyətlə əleyhinəydim. Mən əleyhinə səs verdim, amma mübahisəni uduzdum. Təəssüf edirəm, Burhan, amma bu fotoda qatil və qurban eyni kadrda əks olunub və onun nəşri terroristin öz qurbanının başını kəsdiyi yerdə çəkilmiş fotonun yayılması qədər mənəviyyat problemidir”, – Franklin Guardian-dakı köşəsində yazıb.

Rusiyanın Türkiyədəki səfiri Andrey Karlov 2016-cı ilin dekabrında Ankarada “Rusiya türklərin gözü ilə” sərgisinin açılışında qətlə yetirilib. Qatilin tədbirə mühafizəçi qılığında girən 22 yaşlı sabiq türk polisi Mevlüt Altıntaş olduğu ortaya çıxıb. Altıntaş cinayət yerində polislər tərəfindən güllələnib.

Hər il müsabiqə keçirən World Press Photo Fondu Amsterdamda qeydiyyatdan keçmiş qeyri-kommersiya təşkilatıdır. Onun təqdim etdiyi mükafatlar vizual jurnalistika sahəsində ən nüfuzlu hesab olunur.