Rusiyanın ABŞ-da prezident seçkilərinə müdaxiləsilə bağlı araşdırmadan bir il keçir: bu gün nə məlumdur?
Bir il əvvəl Rusiyanın 2016-cı ildə ABŞ-da prezident seçkilərinə müdaxiləsi ilə bağlı araşdırma üzrə komissiyasının başına FBI-ın keçmiş direktoru Robert Müller gəlib. Mayın 17-də ABŞ senatının kəşfiyyat komitəsi Amerika kəşfiyyatının Rusiyanın seçki nəticələrinə təsir göstərməyə cəhd etdiyi ilə bağlı gəldiyi qənaətlə razılaşıb.
Keçən bir il ərzində Müllerin komissiyası nə öyrənə bilib?
Hadisələrin ardıcıllığı
16 iyun 2015-ci il
Donald Tramp ABŞ prezidentliyinə namizədliyini elan edib.
9 iyun 2016-cı il
Nyu Yorkda Trampın oğlu Donald Tramp, kürəkəni Cared Kuşner və seçkiqabağı kampaniyasının rəhbəri Pol Manafort da daxil olmaqla bir neçə nümayəndəsinin rusiyalı vəkil Natalya Veselnitskaya ilə görüşü olub. Görüşdə tərəflər Trampın əsas rəqibi Hillari Klintonla bağlı kompromatın ötürülməsi şərtlərini müzakirə ediblər.
14 iyun 2016-cı il
Rusiyanın xaker qruplarının ABŞ-ın Demokratik Partiyasının, o cümlədən də Klintonun elektron ünvanlarını sındırdıqları məlum olub. Həmin ilin avqustunda demokratların 20 mindən çox elektron məktubu WikiLeaks saytında dərc olunub. Bu, Klintonun nüfuzuna xələl gətirib və seçkilərin nəticələrinə təsir edib.
8 noyabr 2016-cı il
Donald Tramp ABŞ-da prezident seçkilərində qələbə qazanıb. İnauqurasiya iki ay yarımdan sonra baş tutub.
29 dekabr 2016-cı il
Həmin vaxt ABŞ-ın o zamankı prezidenti Barak Obama Amerika seçkilərinə müdaxilə ehtimalı ilə bağlı Rusiyaya qarşı sanksiya tətbiq edib. Həmin gün Trampın milli təhlükısızlik üzrə müşaviri Maykl Flinn bu sanksiyaları Rusiyanın ABŞ-dakı səfiri ilə müzakirə edib. Amerika qanunvericiliyinə əsasən, müvafiq səlahiyyətlərə sahib olmayan ölkə vətəndaşları Birləşmiş Ştatlarla fikir ayrılığı olan xarici dövlətlərin rəsmi nümayəndələri ilə danışıq aparmaq haqqına sahib deyillər.
13 fevral 2017-ci il
Flinn istefaya gedib, Rusiyanın ABŞ-da prezident seçkilərinə ehtimal olunan müdaxiləsi ilə bağlı iş üzrə FBI-la əməkdaşlığa başlayıb.
9 may 2017-ci il
Tramp seçki qərargahının üzvlərinin Rusiya ilə əlaqələrini araşdıran FBI prezidenti Ceyms Komini işdən azad edib.
17 may 2017-ci il
Keçmiş FBI rəhbəri Robert Müller Rusiyanın Amerika seçkilərinə müdaxilə ehtimalını araşdıran xüsusi komissiyanın rəhbəri təyin edilib.
16 fevral 2018-ci il
On üç nəfər Rusiya vətəndaşı və üç Rusiya şirkətinə qarşı “ABŞ-a qarşı dələduzluq məqsədilə işbirliyi” ittihamı irəli sürülüb. Siyahıda adları hallanan şəxslər Rusiyanın “İnternet Araşdırmalar Agentliyi” şirkətinin əməkdaşlarıdır. Bu şirkətin əməkdaşları sosial şəbəkələrdə akkauntlar yaratmaq və orada immiqrasiya, din və irqçilik kimi ABŞ üçün həssas olan mövzularda fikirlər paylaşmaqla məşğul olublar. Üstəlik bu zaman səhifələr uydurulmuş amerikalıların adına qeydiyyatdan keçirilib.
9 aprel 2018-ci il
FBI Trampın şəxsi vəkili Maykl Koenin ofisində axtarış aparıb.
Bundan sonra nə olacaq?
Trampın yaxın ətrafından artıq bir neçə nəfər, o cümlədən də Maykl Flinn Müllerin komissiyası ilə əməkdaşlıq edir. Ola bilər ki, bu, istintaqın sürətlənməsinə kömək etsin. Növbəti mərhələdə prezident Trampın özü dindirməyə məruz qala bilər. Vacib məqam noyabrda, ABŞ-da Konqressə aralıq seçkilər baş tutan zaman yetişəcək. Bu seçkilərin yekununa görə Demokratik Partiya Senat üzərində nəzarəti ələ alsa, Müllerin istintaqı daha yüksək templə davam edəcək. Əgər Trampın Rusiya ilə sözbirliyi faktı təsdiqlənsə, ABŞ prezidentinin impiçmenti məsələsi qaldırılacaq.
