Rusiyalı sərhədçilər Cənubi Osetiyada münaqişə zonasında qondarma sərhədi çəkiblər

Gürcüstanda Aİ müşahidəçilər missiyası təsdiq edir ki, son dövrdə rusiyalı sərhədçilər Cənubi Osetiyanın qondarma sərhədi yaxınlığında sərhəd çəpərləri çəkiblər ki, bu da Tbilisinin nəzarəti altında olan ərazinin təxminən 10 hektar azalmasına gətirib çıxarıb.

Rusiyanın işğalçı qüvvələri tərəfindən sərhədin 10 metr çəkilməsi barədə ilk xəbərlər Gürcüstan mətbuatında iyulun 3-də verildi. Gürcüstan mətbuatının məlumatına görə, “yaşıl banner” adlanan sərhəd nişanı Qori bələdiyyəsinin Berşueti kəndi yaxınlığında quraşdırılıb ki, nəticədə də təxminən 10 hektarlıq sahə Rusiyanın işğalı altına keçib.

Aİ-nin monitorinq missiyası yerində vəziyyəti öyrənərək təsdiq edib ki, iyun ayında qondarma sərhəd həqiqətən də Qduleti tərəfə çəkilib, amma hələlik son bir neçə həftə ərzində yeni “yaşıl banner”lərin quraşdırılması faktını təsdiq etməyib.

“Aİ-nin monitorinq missiyası “yaşıl banner”lərin quraşdırılmasını doğru saymır. İstənilən formada maneələrin qoyulması ilə bağlı addımlar, o cümlədən də bu cür bannerlərin quraşdırılması sərbəst hərəkətə mane olur, həm də fermerləri öz torpaqlarını becərmə imkanlarından məhrum edir”, – Aİ müşahidəçilər missiyasının bəyanatında deyilir.

Bəyanatda həm də deyilir ki, bu məsələyə 11 iyul 2017-ci ildə Erqnetidə insidentlərin qarşısının alınması ilə bağlı görüşlərdə və sonrakı görüşlərdə baxıla bilər.

Nəşr olunan materiallardakı terminlər, toponimlər, fikirlər və ideyalar JAMnews-un və ya ayrı-ayrı əməkdaşlarının fikir və ideyaları ilə üst-üstə düşməyə bilər. JAMnews dərc olunan materialların altında yazılan və təhqir, təhdid, zorakılığa çağırış və ya başqa səbəblərdən etnik narazılıq doğuran kimi dəyərləndirilən şərhləri silmək haqqını öz üzərində saxlayır.