Rusiyalı muzdlu döyüşçülər Suriyada əzab verib, başını kəsdikləri adamın videosunu çəkiblər
Rusiyanın «Novaya qazeta» nəşri sarsıdıcı video yayıb. Videoda rus dilində danışan bir neçə silahlı adam yerdə uzanan mülki geyimli kişiyə kuvalda ilə zərbələr endirir, sonra başını və qollarını kəsir, daha sonra isə meyitini yandırırlar.
Qəzetin informasiyasına görə, bu videonun birinci hissəsi hələ 2017-ci ilin iyununda sosial şəbəkədə yayılıb. Amma o zaman heç kim nə qurbanın, nə də ona əzab verənlərin kimliyini müəyyən edə bilməyib. Şərh edənlər sadəcə bu videodakıların Suriyada döyüşən Rusiyanın “Vaqner Qrupu” özəl hərbi şirkətinin döyüşçüləri ola biləcəyini ehtimal ediblər. Amma 2019-cu ilin noyabrında videonun davamı da sosial şəbəkəyə düşüb və qurbanın başına nə gəldiyi məlum olub, həmçinin silahlılardan birini də tanımaq mümkün olub.
•Rusiyalı jurnalistləri Kremllə sıx əlaqəsi olan şəxslərin təlimatı ilə tələyə salıb, güllələyiblər
•Şərh: “Putinin liberal olmadığını unudun. Onun müharibələrini xatırlayın”
•Rusiya biznesmenləri Cənubi Osetiya vasitəsilə Suriyada iş qurur
Qurban və qatillər – onlar kimdir?
Ərəbistan mətbuatı öldürülən şəxsin kimliyini, qətl zamanı və yerini müəyyən edə bilib. Jesr Press yazır ki, qətlə yetirilən Məhəmməd Taxa İsmayıl Əl-Abdulla həm də Xəmmədi Taxa Əl-Buta kimi məşhurdur. Nəşrin məlumatına görə, Xəmmədi Suriya ordusunun ehtiyatından səfərbər olunub. Daha sonra o, fərarilik edib, amma onu tutublar. Jesr Press qətl yerini Suriyanın Hüms əyalətinin Şair yatağı kimi identifikasiya edib. Bu, qatillərin “Vaqner Qrupunun” döyüşçüləri olduğu ehtimalını gücləndirir. Çünki “Novaya qazeta”nın məlumatına görə, 2017-ci ilin yazında məhz bu hərbi hissə həmin regionda olub.
Rusiya nəşri FindClone xidmətinin köməyi ilə videoda əks olunan silahlılardan birinin şəxsiyyətini də müəyyən edib. FindClone sifətin görüntüsünü “VKontakte” sosial şəbəkəsindəki fotolarla tutuşduraraq hər hansı şəxsin kimliyini müəyyən etməyə imkan verir. Nəticədə böyük ehtimalla bu, Stanislav D. Adlı şəxsdir – onun “Vaqner Qrupunda” iştirakı və Suriyada çoxsaylı ezamiyyətlərdə olması “Novaya qazeta”nın əlində olan sənədlərlə təsdiqlənir.
Videonun qəhrəmanları həmçinin bir-birinə “Pamir” və “Volk” kod adları ilə müraciət edirlər.
Videodakı digər şəxslərin kimliyini Rusiya rəsmi istintaq orqanları istəyərlərsə, müəyyən edə billərlər. “Novaya qazeta” bildirir ki, materialları prokurorluğa, istintaq komitəsinə və DİN-ə təqdim etməyə hazırdır.
Rusiyanın muzdlu döyüşçüləri Suriya və başqa ölkələrdə
“Vaqner Qrupu” Rusiyanın qeyri-rəsmi məxfi hərbi qruplaşmasıdır, çox vaxt onu “Vaqner özəl hərbi şirkəti” adlandırırlar. Şirkətin adı rəhbərinin kod adından götürülüb. Beynəlxalq medianın məlumatına görə, “Vaqner” 2013-cü ildə Rusiya Silahlı Qüvvələrinin Baş Qərargahının Baş Kəşfiyyat İdarəsinin podpolkovniki olmuş Dmitri Utkindir.
Əldə olan məlumata görə, “Vaqner Qrupu” 2014-cü ildən Suriyada hərbi əməliyyatlarda prezident Bəşər Əsədin tərəfində döyüşür. Hərbi hissəyə muzdlu döyüşçülər Rusiyadan və Ukraynanın şərqində müstəilliyini elan etmiş tanınmamış respublikalardan cəlb olunur. Rusiyalı muzdlu döyüşçülərin dəqiq sayı məlum deyil, amma yüzlərlə olduğu ehtimal edilir.
2017-ci ilin iyununda “Vaqner Özəl Hərbi Şirkəti” ABŞ-ın sanksiya siyakısına daxil edilib.
Mediada yayılan məlumata əsasən, “Vaqner Qrupunun” döyüşçüləri Mərkəzi Afrika Respublikasında və Liviyada hərbi əməliyyatlarda iştirak edirlər. Mərkəzi frikada bu ilin iyulunda qətlə yetirilən tanınmış rusiyalı jurnalist Orxan Camal və həmkarları məhz bu qrupun fəaliyyətini araşdırırdı.
