Rusiyadakı ukraynalı siyasi məhbusları Ukraynadakı rusiyalı siyasi məhbuslarla dəyişə bilərlər
Ukrayna öz ərazisində həbs olunan və məhkum edilən Rusiya vətəndaşlarını bu ölkəyə təhvil verməyə hazırdır – Rusiya, tanınmamış Donetsk Xalq Respublikası və Luqansk Xalq Respublikasında həbsdə saxlanılan Ukrayna vətəndaşlarının azad edilməsi müqabilində, Ukraynanın “Seqodnya” qəzeti məlumat verib.
Bu haqda Ali Radanın vitse-spikeri və Ukraynanın Donbas üzrə üçtərəfli təmas qrupundakı nümayəndəsi İrina Qeraşenko bildirib.
O, Ukraynanın təhvil verməyə hazır olduğu 23 nəfər Rusiya vətəndaşının adlarının yer aldığı siyahını təqdim edib və deyib ki, Kiyev “Sentsov, Kolçenko, Suşenko, Qrib, Balux, Panov və işğal olunmuş Donbasda saxlanılan digərlərinin azad edilməsini gözləyir”.
Rusiya Federasiya Şurasında Sentsovun rusiyalı məhbuslarla dəyişdirilməsini mümkün hesab ediblər.
“Düşünürəm ki, Sentsov (dəyişdirilmə siyahısına) düşə bilər. Onun dəyişdirilməsi məsələsi Ukrayna tərəfindən dəfələrlə qaldırılıb, onun soyadı hələ də (dəyişdirilmə üçün) aktualdır”, – Federasiya Şurasının nümayəndəsi Andrey Kondratyev deyib.
Ukraynalı kinorejissor Oleq Sentsov Rusiya həbsxanasında artıq ay yarımdan çoxdur ki, aclıq edir.
2015-ci ildə o, sadəcə bir şahid ifadəsi əsasında terror aktlarının təşkili və həyata keçirilməsi ittihamı ilə məhkum edilib. Üstəlik həmin şahid daha əvvəl eyni işə şübhəli qismində cəlb olunub. Rusiya hakimiyyəti Sentsovun aclıq aksiyasını iqnor edir.
Sentsov Rusiyadakı ukraynalı siyasi məhbuslar siyahısına daxil edilib. Onlar ümumilikdə yetmiş nəfərə yaxındır.
Ukraynadakı rusiyalı siyasi məhbusların dəqiq siyahısı bəlli deyil. Ehtimal olunur ki, orada üç yüzə yaxın Rusiya vətəndaşı həbsdə saxlanılır. “Hərbi” maddələrlə məhkum edilmiş rusiyalıların sayı 19 nəfərdən yuxarıdır, Rusiyanın “Novaya qazeta” nəşri yazır.
“Novaya qazeta”nın müxbiri Ukraynanın “Özünüzküləri götürün, bizimkiləri verin!” şüarı altında aksiyalar keçirən “İnsan Haqları Naminə Media Təşəbbüsü” hüquq müdafiə təşkilatının koordinatoru Olqa Reşetilova ilə danışıb.
Onun sözlərinə görə, Ukrayna xüsusi xidmət orqanları Ukraynada məhkum edilmiş rusiyalılar haqda məlumatı məxfi saxlamağa çalışır. Reşetilova bunu onunla izah edir ki, hakimiyyətin fikrincə, bu vəziyyətdə informasiyanın açıqlığı və şəffaflığı danışıqlara yalnız ziyan vura bilər.
Reşetilova bu mövqe ilə razı deyil. O hesab edir ki, bu halda ictimailik azadlığa nail olmağa kömək edəcək ən vacib amildir. Reşitilova deyir ki, məhz Nadejda Savçenkonun məşhurluğu onun azad edilməsində böyük rol oynadı.
Ukrayna və Rusiya ombudsmenləri Lyudmila Denisova və Tatyana Moskalkova hər iki ölkədə 34 məhbusu ziyarət etmək haqda razılığa gəliblər, “Media Təşəbbüslərinin” məlumatları artmağa başlayıb. Reşetilova danışır ki, əgər buna qədər 22 rusiyalı məhbusun soyadı və cinayət işinin detalları bəlli idisə, indi artıq onların sayı 25 nəfərdir və siyahı genişlənməkdə davam edir.
“Media təşəbbüslərinin” əsas vəzifəsi Kiyevin danışıqlarda mövqeyini möhkəmləndirmək üçün Ukraynadakı rusiyalı məhbuslar haqda məlumat toplamaqdır. Reşetilova danışır ki, təşkilatının ixtiyarında olan siyahı son yarım ildə tərtib olunub və müxtəlif Ukrayna diplomatlarına göndərilib.
Hüquq müdafiəçiləri bu siyahını ictimaiyyətdən gizlin saxlamağa çalışıblar, amma indi, vəziyyət böhran həddinə çatdığı zaman bu işi maksimum ictimailəşdirmək lazımdır.
