Rusiyada Putinin reqtinqi son 5 ildə ən yüksək həddə çatıb
Bu günlərdə “Levada-Mərkəz” sosioloqlar qrupu tələ-sualla eksperiment keçirib. Onlar Rusiya prezidentliyinə mövcud olmayan namizədi – “Andrey Semyonovu” uydurublar və onunla bağlı sorğu keçiriblər. Sual belə qoyulub: Andrey Semyonovu Vladimir Putin dəstəkləyir. Siz seçkilərdə bu namizədə səs verməyə hazırsınızmı?
Məlum olub ki, “Semyonovun” xeyrinə rusiyalıların 18 faizi səs verməyə hazırdır. Üstəlik sorğu iştirakçılarının 15 faizi bu namizəd haqda heç nə eşitməsələr belə onu dəstəkləməyə hazır olduqlarını bildiriblər.
Rusiyada prezident seçkiləri 2018-ci ilin martında baş tutmalıdır. “Levada-Mərkəz” təşkilatının zaman etibarilə son sorğusu gedişatında (2017-ci ilin avqustunda) rusiyalıların 67 faizi bildirib ki, Vladimir Putinin 2018-ci ildən sonra da Rusiyanın prezidenti qalmasını istəyir. Bu, son beş ildə Putinin ən yüksək reytinqidir.
Respondentlərin cəmi 2 faizi Putinin əsas tənqidçisi Aleksey Navalnının xeyrinə səs vermək niyyətində olduğunu bəyan edib.
“Levada-Mərkəz” təşkilatının ekspertləri isə təklif edirlər ki, senzura, siyasi opponentlərin təhdid olunması və açıq repressiya faktlarının qeyd olunduğu ölkələrdə ənənəvi sosial sorğuların işə yaramadığı nəzərə alınsın. Bu şəraitdə sorğuda iştirak edənlər onların hakimiyyətə loyal olduqlarını göstərən cavablar verməyə çalışırlar.
