Rusiya əcnəbilərin vətəndaşlıq alması şərtlərini sadələşdirir
Rusiya prezidenti Vladimir Putin əcnəbilər tərəfindən Rusiya vətəndaşlığının alınmasının sadələşdirilməsi haqqında qanunu imzalayıb. “Novaya qazeta” xəbər verir ki, yeni qanuna əsasən, prezident sadələşdirilmiş qaydada Rusiya vətəndaşlığını almaq hüququna malik əcnəbilər kateqoriyasını öz istəyinə uyğun müəyyənləşdirmək hüququ əldə edir.
- Ukrayna yaşı 16-dan 60-a kimi olan kişi cinsinə aid Rusiya vətəndaşlarının ölkəyə daxil olmasına qadağa qoyub
- Abxaz olmayanlar Abzaxiyada vətəndaşlıq hüquqlarının olmasını sübuta yetirməlidirlər
Ələlxüsus, sənədə görə, Rusiya vətəndaşlığının sadələşdirilmiş qaydada əldə edilməsinə “ağır ictimai-siyasi və iqtisadi vəziyyətdə olan, silahlı münaqişələrin və siyasi rejim dəyişikliyinin baş verdiyi” ölkələrin vətəndaşları ümid edə bilərlər.
Eləcə də, Rusiya vətəndaşlığının alınması prosedurunun sadələşdirilməsi artıq Rusiyada müvəqqəti yaşamağa icazə almış, yaxud Rusiyada yaşamaq hüququ olan, Rusiyaya könüllü köçmə üzrə dövlət proqramının iştirakçılarına şamil olunacaq.
Rusiya qanunlarına əsasən, Rusiya vətəndaşlığı almaq arzusunda olan şəxs əvvəlcə ölkədə yaşamaq hüququ almalı, Rusiya ərazisində ən azı 5 il yaşamalıdır və yalnız bundan sonra vətəndaşlıq almaq üçün ərizə verə bilər. Özü də müraciət edən şəxs gəlirinin olmasını sübut etməli və rus dilini bildiyinə dair sertifikat almalıdır.
Rusiya hakimiyyətinin sadələşdirilmiş qaydada vətəndaşlıq alma hüququ verəcəyi əcnəbilər bu prosedurları yan keçərək vətəndaşlıq ala biləcəklər.
