Rusiya yönlü səhra komandiri “Givi” Donetskdə partlayış nəticəsində həlak olub

Tanınmamış Donetsk Xalq Respublikasının məşhur səhra komandiri, “Somali” batalyonunun komandiri Givi ləqəbilə tanınan Mixail Tolstıx fevralın 8-də səhər saatlarında Donetskdə həlak olub.

“Givi”nin öldüyünü “DXR-in” hakimiyyət nümayəndələri təsdiqləyib. Rusiya agentliklərinin məlumatına görə, səhra komandiri terror aktı nəticəsində həlak olub – şəxsi kabinetində partladılıb.

Tanınmamış respublikanın hakimiyyəti terror aktında Ukraynanın xüsusi xidmət orqanlarını günahlandırır.

“DXR-nın” digər məşhur səhra komandiri Motorola ləqəbli Arsen Pavlov ötən ilin oktyabrında Donetskdə qətlə yetirilib – öz evinin liftində partladılıb.

“Motorola” və “Givi” 2014-cü ildən Ukraynanın şərqində Ukrayna hakimiyyət qoşunlarına qarşı hərbi əməliyyatlarda fəal iştirak edirdilər.