Rusiya XİN rəhbərinin müavini: Avropa İttifaqı Abxaziya və CO sakinlərinə viza verməlidir

Rusiya Xarici İşlər nazirinin müavini Qriqori Karasin Avropa İttifaqının Gürcüstan üçün vizasız rejim tətbiq etməsini müsbət dəyərləndirib. Eyni zamanda qeyd edib ki, Abxaziya və CO sakinləri də Aİ ölkələrinə maneəsiz viza ala bilməlidirlər.

“Çox ümid edirəm ki, Avropa İttifaqının qərarı Cənubi Osetiya və Abxaziyada yaşayan insanların hərəkətini asanlaşdırmaq üçün əsas olacaq. Avropaya bütün növ vizaların verilməsi onlar üçün çox mürəkkəbləşdirilib. Nadir istisnaların xaricində onlar Gürcüstan vətəndaşı deyillər”, – Karasin Praqada Gürcüstan hökumətinin xüsusi nümayəndəsi Zurab Abaşidze ilə görüşdən əvvəl jurnalistlərə bildirib.

Öz növbəsində Zurab Abaşıdze Rusiya ilə vizasız rejim ehtimalını şərh edib. “Rusiya viza rejimini daha da sadələşdirmək istəsə, bu, doğru qərar olar. Əgər tamamilə ləğv etsə, bu, doğru istiqamətdə addım olardı”, – Abaşidze bildirib.

Karasinin qeyd etdiyi kimi, Rusiya Gürcüstanla “vizasız rejimə qarşı deyil”, amma bu məsələni iki ölkə arasında hazırda qırılmış olan diplomatik münasibətlərə bağlayıb.

• 2001-ci ildə Rusiya təhlükəsizlik niyyətilə Gürcüstanla viza rejimi tətbiq etdi. Viza rejimi Abxaziya və Cənubi Osetiyaya (204-cü ildə qısa müddətə Acariyaya da) şamil edilmədi. Gürcüstan  isə Rusiyaya qarşı sadələşdirilmiş viza rejimi tətbiq etdi.

• 2002-ci ildən etibarən Rusiya Abxaziya və Sxinval regionu (Cənubi Osetiya) sakinlərinə Rusiya vətəndaşlığı verməyə başladı. Hər iki regionun əhalisinin 90 faizi bu gün RF vətəndaşıdır.

• 2008-ci ildə Moskvanın Abxaziya və Cənubi Osetiyanın müstəqilliyini tanımasına cavab olaraq Gürcüstan RF ilə diplomatik əlaqələri kəsdi.

• 2010-cu ildə Gürcüstan Şimali Qafqaz sakinləri üçün 90 günə qədər səfər zamanı vizasız rejim tətbiq etdi. Digər Rusiya vətəndaşları isə Gürcüstana giriş zamanı viza ala bilərdilər.

• 2012-ci ilin fevralında Gürcüstan RF vətəndaşları üçün viza rejimini ləğv elədi.

• 2015-ci ilin dekabrında Rusiya Gürcüstanla viza rejimini sadələşdirdi. Yeni qaydalara görə, istənilən Gürcüstan vətəndaşı RF immiqrasiya orqanlarında tərtib olunmuş istənilən Rusiya vətəndaşının (əvvəlki kimi yalnızca yaxın qohumların deyil) dəvəti olarsa, turist vizası istisna olmaqla istənilən növ viza ala bilər.

• Dekabrda keçirilən mətbuat konfransında Rusiya prezidenti Vladimir Putin Gürcüstan vətəndaşları üçün viza rejiminin ləğvini istisna etməyib.