Rusiya və Azərbaycan arasında gərginlik artır. İndi KİV-lər səviyyəsində

Rusiyanın Ukraynaya qarşı təcavüzü başlayandan sonra Azərbaycanın hakimiyyət nəzarəti altında olan kütləvi informasiya vasitələri açıq Ukrayna yönlü mövqe tutublar. Müharibənin getdiyi bir ay ərzində “Roskomnadzor” Azərbaycanın dörd xəbər saytına ölkə daxilində girişi bloklayıb. Buna cavab olaraq rəsmi Bakı Azərbaycana qarşı informasiya yayan Rusiya KİV-nə qarşı adekvat addımlar atılacağı ilə təhdid edib.

• “Bu, cinayətdən daha betərdir” – Rusiyanın Ukraynaya qarşı təcavüzünə Bakıdan reaksiya
• Ukraynada müharibə. Azərbaycan kimin tərəfindədir?
• İkinci Qarabağ müharibəsi və Ukraynada baş verənlər: fərq nədir? Bakıdan şərh

Nə baş verir?

Ancaq ötən həftəsonu ərzində Azərbaycanın Müdafiə Nazirliyi Rusiya Müdafiə Nazirliyi tərəfindən iki dəfə yol verilmiş “səhvi düzəldib”. Birinci dəfə daha çox Rusiya tərəfinin terminolgiya ilə bağlı səhvindən söhbət gedirdisə, martın 27-də Azərbaycanın Müdafiə Nazirliyi rusiyalı həmkarlarının birbaşa yalanını ifşa edib.

2022-ci il fevralın 22-də, yəni cəmi bir ay öncə müttəfiqlik münasibətləri haqda bəyannamə imzalayan ölkələr arasında gərginlik getdikcə artır, bu dəfə həm də kütləvi informasiya vasitələri sahəsində.

Azərbaycan KİV-nin, o cümlədən də hökumətin nəzarəti altında olan media orqanlarının Ukrayna mövqeyini açıq dəstəkləməsi buna səbəb olub. Azərbaycan televiziyaları, radio və elektron KİV-də Ukraynadakı müharibə kifayət qədər təfərrüatlı işıqlandırılır, azərbaycanlı jurnalistlər Kiyevdən və Lvovdan reportajlar yayımlayırlar. Azərbaycan jurnalistlərinin reportajlarında Rusiya qoşunları açıq şəkildə işğalçı adlandırılır.

Azərbaycan kütləvi informasiya vasitələrinin belə Rusiya əleyhinə ritorikası Moskvanın diqqətindən yayınmayıb.

Ukraynada müharibə başlayandan “Roskomnadzor” Azərbaycanın dörd xəbər saytına – haqqın.az, minval.az, oxu.az və baku.ws – giriş bloklanıb.

Rəsmi Bakı öz növbəsində Rusiya hakimiyyətinin bu addımını cavabsız qoymayıb.

Bakı da bloklamağı bacardığına eyham vurub

Azərbaycanın Rəqəmsal İnkişaf və Nəqliyyat Nazirliyi ölkənin mənafeyinə zidd məlumatlar yayımlayan veb-saytlara xəbərdarlıq edib.

Qeyd olunub ki, ölkə daxilində və xaricində hər hansı saytın fəaliyyətinin məhdudlaşdırılması məsələsi Azərbaycan qanunvericiliyi ilə tənzimlənir.

“Belə ki, həmin resurslarda ölkənin mənafeyinə, ərazi bütövlüyünə zidd, qanunvericiliyinə uyğun olmayan məlumatlar yayımlanarsa, həmin saytların fəaliyyəti ilə bağlı müvafiq tədbirlər həyata keçirilə bilər”, – nazirlikdən RF tərəfindən bəzi Azərbaycan saytlarına qoyulan məhdudiyyətlər fonunda görülməsi mümkün olan tədbirlər şərh edilərkən bildirilib.

Azərbaycan Mətbuat Şurasının bəyanatı

Rusiyada Azərbaycanın bəzi informasiya saytlarına girişin qadağan edilməsi ilə əlaqədar Azərbaycan Mətbuat Şurası bəyanat yayıb.

“Rusiya Federasiyası tərəfindən Azərbaycanın kütləvi informasiya vasitələri bloklanır.

Səbəb aydındır. Azərbaycan KİV-lərinin Ukrayna ilə bağlı yayımları, Rusiya-Ukrayna müharibəsində tutduğu obyektiv mövqe Rusiyanı razı salmır.

Rusiya tərəfindən söz və ifadə azadlığına, plüralizmə aşkar sayğısızlıq törədilir. Bu, beynəlxalq miqyasda qəbul edilmiş prinsip və normalara, bəşəri dəyərlərə əhəmiyyətsiz yanaşmadır. Bu, eyni zamanda Rusiya cəmiyyətinin obyektiv məlumat almaq, alternativ fikirlə tanış olaraq düzgün nəticəyə gəlmək hüququnun məhdudlaşdırılmasıdır”, – Azərbaycan Mətbuat Şurasının bəyanatında deyilir.

Şərh

Siyasi icmalçı Aqşin Kərimovun sözlərinə görə, Rusiya Ukraynaya qarşı müharibədə istifadə etdiyi informasiya bombalarının nişangahını Azərbaycana da tuşlayır.

“Rusiya Ukraynadakı müharibə barədə xəbərlər verən, mövzu ilə bağlı analitik yazılarla çıxış edən Azərbaycanın saytlarına öz ərazisində girişi bloklayıb.

Özü də görün bunu kim edir – Rusiya, o Rusiya ki, həmişə informasiyanı öz mahiyyətindən qoparıb imperialist təbliğatın mahiyyətində itirərək jurnalistikanın prinsiplərinə tüpürüb.

Rusiya mətbuatı təbliğat metodlarına görə, əlahiddə funksiyaların daşıyıcısıdır, bunu illərdir müşahidə edirik. Elə 44 günlük Vətən müharibəsində Azərbaycana çirkin münasibəti ifadə edən materiallar Kremlin təbliğat vasitəsinə çevrilən media orqanlarında xüsusi canfəşanlıqla verilib.

Həmin saytların və ya televiziya kanallarının adlarını belə çəkmək istəmirik, həyasızlıq kriteriyalarına görə, onlar məşhurdur. Bununla belə Azərbaycan Vətən müharibəsində özünə qarşı ideoloji silahlanmış həmin media qurumlarına girişi bloklamadı. Çünki haqlı idi və bu haqqın qarşısında çeynənmiş yalanlar çox aciz görünürdü.

Bəs Azərbaycan mediası, eləcə də Rusiyanın blokladığı saytlar nə edir? Sadə həqiqətlərin dərc edilməsində iştirak edir, daha çox rəsmi məlumatlara istinad edir və Rusiyaya qarşı təbliğata qoşulmadan jurnalistikanın və analitik soyuqqanlılığın prinsipləri əsasında materiallar yayımlayır.

Ancaq bu, Rusiyanın siyasi sancılarını artırır. Rusiya tərəfi Qərbə informasiya müharibəsində uduzmasının acığını Azərbaycan mətbuatından çıxmaq istəyir, bununla isə biz yox, Rusiya özü itirir.

Sirkə nə qədər tünd olarsa, öz qabını sındırar, Azərbaycana məxsus bu atalar sözünün mahiyyəti rəsmi Moskva üçün necə də yerinə düşür.

Yaxşı olar ki, Rusiya tündlüyünü azaldaraq mətbuatla düzgün işləmək mexanizmini yaratsın, media resurslarının səsini boğmaqdansa, açıqlamalarının sayını artırsın və Ukraynaya görə verdiyi iqtisadi və hərbi itkilərin hirsini Azərbaycanın üzərinə tökməsin.

Azərbaycanın isə belə hallara qarşı immuniteti var, onsuz da Rusiya özü bu immunitet qarşısında duruş gətirə bilməyəcək. Ona görə də Moskva verdiyi ədalətsiz qərarı ləğv etməlidir”, – Kərimov bildirib.