Rusiya vətəndaşları Ermənistanda casusluqla məşğul olublar: işlərdən biri üzrə nələr məlumdur
Rusiya vətəndaşlarının Ermənistanda casusluğu
Ermənistanın baş naziri Nikol Paşinyanın bütün ermənilərin Katolikosunun xarici kəşfiyyatın agenti olduğu barədə açıqlamaları fonunda ölkədə casusluq mövzusu ətrafında müzakirələr fəallaşıb. Rəsmi məlumatlara görə, 2020-ci ildə ikinci Qarabağ müharibəsi başa çatdıqdan sonra Ermənistan məhkəmələrində təxminən 20 casusluq işi araşdırılır.
Bu işləri şərh edən “Maarifli Vətəndaşlar İttifaqı” QHT-sinin proqram koordinatoru Daniel İoannisyan bildirib ki, Ermənistanın hüquq-mühafizə orqanları iş materiallarında casusluqla məşğul olan şəxslərin hansı ölkənin xüsusi xidmət orqanları tərəfindən ələ alındığını göstərmirlər.
O xatırladıb ki, Paşinyan Katolikos barədə danışarkən də konkret ölkənin adını çəkməyib. Baş nazir yalnız onu deyib ki, ona “xarici xüsusi xidmət orqanının baş leytenantına tabe olmayan” Katolikos lazımdır.
“Hansı ölkənin baş leytenantı? Laosun, Qambiyanın? Hamımız hansı ölkədən söhbət getdiyini anlayırıq, amma hakimiyyət bundan artıq heç nə demir”, – deyə İoannisyan vurğulayıb.
Onun fikrincə, hakimiyyət ikitərəfli münasibətlərdə yaranmış gərginliyi dərinləşdirməmək üçün Rusiyanın adını çəkmir.
Paşinyan Katolikosun qardaşı, arxiyepiskop Ezras Nersisyanı da xarici agent elan edib. Dekabrın 20-də hökumətyönlü civic.am saytı sənəd dərc edib. Həmin sənədə əsasən, Nersisyan SSRİ Dövlət Təhlükəsizliyi Komitəsi (KQB) ilə “Karo” agentura ləqəbi altında əməkdaşlıq edib. Ana Taxt Üçkilsə bu məlumatı hələlik şərh etməyib.
- “KTMT üçün Azərbaycan həmişə Ermənistan qədər qardaş dövlət olub” – Paşinyan
- Keşişlə müsahibədən sonra: Ermənistanda din xadimləri saxlanılıb
- Putin və Paşinyan arasında açıq mübahisə: statistika Ermənistan baş nazirinin sözlərini təsdiqləyir
“Ermənistana zərər vuran fəaliyyətlərə görə 100 min rubl”: işlərdən birinin detalları
Casusluq işlərindən biri üzrə Rusiya vətəndaşı Viktor Tixomirov təqsirləndirilir. Məlumata görə, eyni iş üzrə daha bir neçə Rusiya vətəndaşı axtarışdadır. Yerli Factor.am nəşri bu işin bəzi detallarını üzə çıxarıb. Media resursu iddia edir ki, bu şəxslərin hamısı xarici xüsusi xidmət orqanlarının agentləridir və “Ermənistana zərər vuran fəaliyyətlərə görə” hər biri 100 min rubl alıb.
Bildirilib ki, Tixomirov işə daha iki nəfəri – Daniil Semenyuku və Artyom Mahmutovu cəlb edib.
Nəşrin yazdığına görə: “bu iki şəxs Moskvada xarici kəşfiyyat xidmətlərindən tapşırıq alıblar. Əvvəlcədən verilmiş koordinatlar üzrə onlar Ermənistanda müxtəlif ərazilərə gediblər. Tarixi və mədəni abidələri, kəndləri, küçələri, müsəlman azərbaycanlılara və qədim ermənilərə aid məzar daşlarını video və foto çəkilişə alıblar”.
İttiham aktına əsasən, çəkilmiş fotoşəkillər “Yandex” bulud xidməti vasitəsilə Tixomirova ötürülüb. Daha sonra Moskvaya qayıdan agentlər bu materialları xarici xüsusi xidmət orqanlarının nümayəndələrinə təqdim ediblər.
Nəşrdə qeyd olunur ki: “toplanmış məlumatlar Ermənistanın suverenliyinə və xarici təhlükəsizliyinə zərər vurmaq məqsədilə istifadə edilib, çəkiliş aparılan ərazilər isə Azərbaycan əraziləri kimi təqdim olunub”.
Həmçinin məlum olub ki, ilk tapşırığın icrasından sonra Mahmutov və Semenyuk ikinci tapşırıq da alıblar. Lakin onlar yenidən Ermənistana qayıtdıqda Milli Təhlükəsizlik Xidmətinin əməkdaşları tərəfindən saxlanılıblar.
Şərh
“Maarifli Vətəndaşlar İttifaqı” QHT-sinin proqram koordinatoru Daniel İoannisyanın fikrincə, saxlanılan şəxslərin bəzi hərəkətlərini informasiya müharibəsi kontekstində, bəzilərini isə hərbi kəşfiyyat kimi qiymətləndirmək olar:
“Əgər xarici agent xarici dövlətə, məsələn, silahlanma, koordinatlar və ya silahlı qüvvələrin “X” bölməsinin xidmət qrafiki ilə bağlı məlumat toplayıb ötürürsə, bu, hibrid əməliyyat deyil. Bu, hərbi kəşfiyyatdır. Əgər o, daha sonra siyasi və media sahələrində istifadə olunan məlumatlar toplayırsa, bu artıq hibrid hücumdur”.
O, Ermənistanın hüquq-mühafizə orqanlarının iş materiallarında Rusiya vətəndaşlarının hansı ölkənin xüsusi xidmət orqanları tərəfindən ələ alındığını göstərmədiyini xüsusilə vurğulayır.
Erməni nəşri digər mövcud casusluq işlərini də araşdırıb və müəyyən edib ki, onlarda da bu məlumat qeyd olunmur.
Daniel İoannisyanın sözlərinə görə, Ermənistanın siyasi elitası da birbaşa qiymətləndirmələrdən yayınır:
“Mən hesab edirəm ki, hakimiyyətin bu barədə danışmaması ciddi problemdir. Onlar Ermənistana qarşı həyata keçirilən hibrid hücumların motivlərinin nə olduğunu da demirlər. Hibrid hücumların onların kim tərəfindən həyata keçirildiyini demirsənsə, onların motivlərindən danışmaq mümkün deyil”.
Rusiya vətəndaşlarının Ermənistanda casusluğu
