Rusiya vətəndaşları Ermənistana daxili pasportla gələ biləcəklər

Yanvarın 24-də Rusiya baş naziri Dmitri Medvedev Ermənistan hökumətinin başçısı Karen Karapetyanla apardıqları danışıqların nəticəsini açıqlayarkən Rusiya vətəndaşlarına Ermənistana daxili pasportla getmək imkanının veriləcəyini bildirib.

“Elə indicə bununla bağlı sənəd imzalandı. Bu, humanitar əlaqələr kimi vacib sahələrdə əməkdaşlığımızı möhkəmləndirəcək”, – Medvedev qeyd edib.

Karen Karapetyan isə öz növbəsində bu qərarın mədəni və fərdi münasibətləri stimullaşdıracağına, turizmin inkişafına təkan verəcəyinə ümidini ifadə edib.

“Hesab edirəm ki, Ermənistan Rusiya vətəndaşlarının ziyarət etməli olduğu məkan kimi lazımınca dəyərləndirilməyib”.

Ermənistan mətbuatı isə danışıqların nəticəsini “1-0 Rusiyanın xeyrinə” kimi qiymətləndirib: Rusiya artıq Ermənistanı “sərhədin o tayı” hesab etmir.

“Havadan Müdafiə Qüvvələri birləşdirilib, birləşmiş qoşunlar yaradılıb, indi də Ermənistan və Rusiya pasport nəzarətini birləşdirmək olar. Yəqin ki növbəti addım Ermənistan və Rusiya vətəndaşlığının birləşdirilməsi olacaq. Burda nə var ki?”

Dərc edilib: 25.01.2017