Rusiya öz vətəndaşlarına xəbərdarlıq edir, Tbilisini isə təxribatda suçlayır

Rusiya Xarici İşlər Nazirliyi öz vətəndaşlarını Gürcüstana səfər edərkən riskləri düzgün qiymətləndirməyə çağırır, çünki İsveçrə səfirliyinin Rusiya seksiyasında diplomatik münasibətlərin olmadığına görə həmvətənlərinin müdafiəsi məsələsində imkanları məhduddur.

Bu bəyanat Gürcüstan hakimiyyəti tərəfindən Moskvanın keçmiş meri Yuri Lujkovun Gürcüstanda persona non-qrata elan edilməsi ilə bağlıdır. Rusiyanın Xarici İşlər Nazirliyi vurğulayır ki, Tbilisi təxribat törətməkdə, Rusiya-Gürcüstan münasibətlərinin yaxşılaşdırılmasına zərbə endirməkdə davam edir.

“Baş verənləri rasional mövqedən izah etmək çətindir – axı Gürcüstan-Rusiya münasibətlərinin normallaşması Gürcüstan iqtisadiyyatına və onun vətəndaşlarına əməlli-başlı xeyir gətirir”, – Rusiya Federasiyasının XİN-in bəyanatında deyilir.

Bəyanat Gürcüstan tərəfinin diqqətindən kənarda qalmayıb. Hakim “Gürcü arzusu” partiyasının millət vəkili Zviad Kvaçantiradzenin sözlərinə görə, Gürcüstan Rusiya və onun vətəndaşlarından ancaq qanuna hörmət etməyi tələb edir. Kvaçantiradze Lujkovun Gürcüstana səfərini provokasiya xarakterli adlandırıb və onun bir daha Gürcüstana gəlməyəcəyini vurğulayıb.

“Lujkovun taleyi ilə xarici işlər nazirliyinin maraqlanması, Lujkovun Gürcüstan ərazisinə şəxsi məqsədləri üçün səfər etməməsinin daha bir sübutudur. Onun səfəri provokasiya fonu yaradırdı. Biz qanuna hörmət tələb edirik və Lujkovun “hər şeyi başa düşürəm, qanunu pozmuşam, amma vecimə də deyil” kimi açıqlamalarını eşitmək istəmirik. Əlbəttə bu, biabırçılıqdır. Yəqin o, artıq heç vaxt Gürcüstana gəlməyəcək”,- Zviad Kvaçantiradze bildirib.

Xatırladaq ki, Yuri Lujkov Gürcüstanda keçən həftə olub. Onun Tbilisiyə gəlişi böyük səs-küy doğurub, çünki o, işğal haqqında qanunu pozaraq, Abxaziyaya səfər edib. Amma o vaxt Gürcüstan hakimiyyəti ona qarşı heç bir sanksiya tətbiq etməyib.