Rusiya: jurnalist terrora haqq qazandırmaqda təqsirli bilinib
“Azadlıq Radiosu”nun Rusiyanın Pskov şəhərindən olan jurnalisti Svetlana Prokopyeva “Terrora haqq qazandırma” ittihamı ilə 500 min rubl (7 min avro) həcmində cərimə olunub. Onun cinayət alətləri – telefonu və noutbuku müsadirə olunub.
Svetlana Prokopyevanın təqsiri iki il əvvəl Arxangelskdə baş verən hadisə ilə bağlı köşə yazısı yazmaqdan ibarətdir.
Rusiyanın bu şəhərində 19 yaşlı Mixail Jlobitski Rusiya Federal Təhlükəsizlik Xidmətinin (FTX) yerli şöbəsinin qarşısında özünü partladıb. Səbəb hakimiyyəti tənqid edən digər gənclərin təqib olunması və işgəncəyə məruz qalmasına etirazla bağlı olub.
• Artıq Putin Rusiyada ömürlükdür, ruslar isə federasiyanın əsas xalqıdır. Konstitusiya dəyişdi
• Şərh: Rusiya Putindən bezib. Nə etmək mümkündür?
• Şaman ovu: Rusiyada “Putini qovmağı” vəd edən adama qarşı təzyiqlər davam edir
Svetlana Prokopyevanın köşəsinin əsas məğzi cəmiyyətdəki ədalətsizliyin ekstremizm və terror doğurduğundan ibarət olub. Buna görə onu terrora haqq qazandırmaqda günahlandrıblar. Prokurorluq Prokopyevanın 6 il müddətinə azadlıqdan məhrum edilməsini tələb edib.
Məhkəmə onu təqsirli bilib, amma cəza olaraq cərimə və müsadirə ilə kifayətlənib.
“Reaksiya olmasaydı, qərar fərqli ola bilərdi”
Rusiyanın «Новая газета» nəşrinin yazdığına görə, məhkəmə prosesinə maraq o qədər böyük olub ki, məhkəmə binasının həyəti iclasdan bir saat əvvəl insanlarla dolu olub.
Svetlana Prokopyevanı dəstəkləmək üçün hökm günü Moskva, Peterburq və digər şəhərlərdən həmkarları və laqeyd olmayan sadə insanlar gəliblər.
Prokopyeva məhkəmədə son sözünü səsləndirərkən günahsız olduğuna israr edib:
“Mən hakimiyyəti tənqid etməkdən qorxmuram. Mən hüquq-mühafizə orqanlarını tənqid etməkdən və güc strukturlarına onların zaman-zaman haqsız olduqlarını deməkdən qorxmuram. Çünki mən bilirəm ki, bunu deyədiyim zaman, heç kimin demədiyi zaman həqiqətən qorxulu olacaq”, – Prokopyeva deyib.
Hakim hökmü 5 dəqiqəyə elan edib. Jurnalistin vəkilləri bildiriblər ki, hökmün yumşaqlığına baxmayaraq, onlar qərardan şikayət verəcəklər.
“Mən yenə də israrla bildirirəm ki, terrora haqq qazandırmamışam, heç vaxt terrora haqq qazandırmamışam və heç vaxt haqq qazandırmayacam. Amma ən böyük uğur mənə peşəmlə məşğul olmağı qadağan etmədilər”, – Prokopyeva deyib.
Pskov vilayət parlamentinin deputatı Lev Şlosberq “Novaya qazeta” ilə söhbətində xatırladıb ki, Svetlana Prokopyevaya qarşı tətbiq olunan maddə cərimədən tutmuş 7 il həbsə qədər ən müxtəlif cəzaları nəzərdə tutur.
