Rusiya-Gürcüstan: sanksiyalar təxirə düşdü?

Gürcüstan telekanallarından birinin efirindən prezident Putinin ünvanına səslənən söyüşlərə rəsmi Tbilisinin reaksiyası Moskvanı təmin edib.

Sanksiyalar təxirə düşür?

Rusiya hakimiyyəti Gürcüstana uçuşların bərpa olunacağını istisna etmir – Xarici İşlər Nazirliyindəki mənbə belə deyir. “Əgər Gürcüstanda vəziyyət normallaşarsa, rusofobiya aradan qalxarsa, vətəndaşlarımızın təhlükəsizliyinə təminat verilərsə, hava əlaqəsi haqda danışmaq mümkün olacaq”, – o  deyib.

İki ölkə arasında birbaşa hava əlaqəsi Moskvanın qərarı ilə dayandırılıb. Uçuşlara qadağa iyulun 8-də qüvvəyə minib.

Rusiya Parlamenti Gürcüstana qarşı sanksiyaların tətbiq edilməsini, o cümlədən də şərab və mineral suların idxalına, həmçinin Gürcüstana pul köçürmələrinə qadağa qoyulmasını təklif edib. Amma prezident Putin bu tədbirlərə qarşı çıxıb.

Rusiya hökumətinin nümayəndəsi bildirib ki, Putinin bəyanatından sonra sanksiyaların tətbiq edilməsi ehtimalı sıfıra bərabərdir.

Nə baş verib: versiyalar

Rusiya mediasında bu ölkənin Gürcüstanla bağlı siyasətində baş verənlərin səbəblərinə dair müxtəlif fikirlər səslənir.

• Ən başdan Rusiyada heç kim deputat Qavrilovun Tbilisiyə səfərinin təkan verdiyi hadisələrə hazır deyildi. Gürcüstanda etirazlar spontan başlayanda müxtəlif siyasi qüvvələr onlardan yararlanmağa çalışdı. Sərt xətt tərəfdarları Gürcüstanla münasibətlərin gərginləşdirilməsi istiqamətində təkliflər irəli sürdülər ki, Rusiya cəmiyyətinin diqqətini daxili problemlərdən yayındırsınlar. Nəticəsi hava əlaqəsinin dayandırılması haqda prezident fərmanı oldu. Amma sonradan daha liberal siyasət xəttinin tərəfdarları Putini bu yoldan imtina etməyə inandırdılar.
• Gürcüstanla münasibətlərin gərginləşməsi səylə hazırlanmış plandır. Məqsəd Abxaziya və Cənubi Osetiyanın Rusiyanın tərkibinə daxil edilməsidir. Bu, Rusiya konstitusiyasını yenidən yazmağa və Putini qanun çərçivəsində beşinci müddətə prezident seçməyə imkan verəcək.
• Go to top