Rumıniyada keçirilən kütləvi etirazın nəticələri – qalmaqallı fərman ləğv edilib, Ədliyyə naziri istefaya göndərilə bilər

Rumıniyanın baş naziri bəyan edib ki, hökumətin kütləvi etirazlara (kommunist diktator Çauşesku devriləndən bəri baş vermiş ən nəhəng etiraz) səbəb olmuş qalmaqallı fərmanını dəstəkləyən Ədliyyə nazirini istefaya göndərməyə hazırdır.

Baş nazir Sorin Qrindyanunun sözlərinə görə, “xırda” korrupsiyanı dekriminallaşdırmış və Nazirlər Kabineti tərəfindən ötən həftə təsdiqlənmiş fərman “rumınların parçalanmasına səbəb oldu”,  buna görə də Ədliyyə Nazirliyinin rəhbəri Florin İordake yaxın günlərdə vəzifəsində azad edilə bilər.

Bazar günü hökumət ictimaiyyəti qəzəbləndirən fərmanın ləğv edildiyini bildirməsinə baxmayaraq, bazar ertəsi yüz minlərlə nümayişçi yenə də hökumətin istefasını tələb edib.

Fərmana əsasən dövlət büdcəsinə 47800 dollardan az ziyan vurulduğu hallarda korrupsiya cinayətləri dekriminallaşdırılmışdı. Baş nazir Sorin Qrindyanu (Sosial-Demokrat Partiyasının – PSD üzvü) bildirirdi ki, bu minvalla dolub-daşan ölkə həbsxanaları boşalmış olacaq. Fərmanın əleyhdarları isə hesab edirlər ki, bu, korrupsiyalaşmış siyasətçilərə cəzadan yayınmaq imkanı verəcək və vəzifə cinayətlərinin artmasını təhrik edəcək.

Fərman qəbul edildikdən sonra Rumıniya şəhərlərinin küçələrinə 500 mindən çox insan çıxdı. Bəzi yerlərdə nümayişçilərlə polislər arasında toqquşmalar baş verdi.

Transparency International beynəlxalq qeyri-hökumət təşkilatının hər il tərtib etdiyi Korrupsiya Qavrama İndeksində Rumıniya 176 ölkə arasında 57-ci yeri tutur. Bu, Aİ ölkələri arasında ən pis göstəricilərdən biridir.