Reportyor və LGBTI+ fəalı Əvəz Hafizlinin qatilinin məhkəməsi başlayıb
Bu gün Bakı Ağır Cinayətlər Məhkəməsində reportyor və LGBTI+ fəalı Əvəz Hafizlinin qatilinin məhkəməsində ilkin baxış iclası keçirilib. Ə.Hafizlinin qohumlarından heç kim iclasda iştirak etməyib. O cümlədən, LGBTI+ fəalının vəkili də məhkəmədə təmsil olunmayıb. Məhkəmə binasının önünə toplaşmış fəalların sözlərinə görə, Ə.Hafizli məhz LGBTI+ fəalı olduğu üçün öldürülüb.
- “Şəxsiyyət pozuntusudur deyib, dispanserə yolladılar”. LGBTI+ icması Azərbaycandakı problemlərini dilə gətirib
- Bakıda ilk dəfə LGBTQİ+ problemlərindən bəhs edən yerli bədii film nümayiş olunub
- Azərbaycanda bullinqə məruz qalan 16 yaşlı məktəblini müdafiə edən tapılmır
Jurnalistlər və ictimai fəallar məhkəmə binasının önünə toplaşsalar da, onları Əvəz Haziflinin qatili Əmrulla Güləliyevin məhkəmə prosesinin hazırlıq iclasına buraxmayıblar.
Məhkəmənin ilk iclası 4 iyun saat 12:30-a təyin edilib. Bildirildiyinə görə, iclas onlayn olacaq və açıq keçiriləcək.
JAMnews-a müsahibəsində jurnalist İfadə Cəfərova deyib ki, hazırlıq iclasında mərhumun heç bir ailə üzvü iştirak etməyib. Lakin ilkin baxış mərhələsində Böyük Britaniyanın Azərbaycandakı səfiri iştirak edib.
İctimai fəallar məhkəmənin binası önündə “Əvəzin qətli siyasidir!” şüarı ilə çıxış ediblər. Onlar məhkəmənin gedişini izləyəcəklərini söyləyiblər.
LGBTI+ fəalı Əli Məlikovun bildirdiyinə görə, Əvəz Hafizli məhz bu icmanın nümayəndəsi olduğu üçün öldürülüb. “Təsadüfi deyil ki, Əvəz qətlə yetirildikdən sonra onun cinsiyyət üzvü kəsilib”, – Ə.Məlikov deyib.
Xatırladaq ki, Əvəz Hafizli bu il fevralın 22-də qohumu Əmrulla Güləliyev tərəfindən boğazı kəsilərək öldürülüb. Ə.Hafizli ölümündən öncə dəfələrlə təhdid altında olduğunu bildirərərək aksiyalar təşkil etmişdi.
İlkin araşdırmalara görə, Əmrulla Güləliyev cinayəti törədərkən sərxoş vəziyyətdə olduğunu, qətli aralarında yaranmış şəxsi mübahisə zəminində törətdiyini etiraf edib.
