Reabilitasiya mərkəzində uşaqlara işgəncə verənlər həbs edilib
Reabilitasiya mərkəzində uşaqlara işgəncə
Sosial şəbəkələrin Azərbaycan seqmentində “Mehnur” özəl loqopedik reabilitasiya mərkəzində azyaşlıların əməkdaşlar tərəfindən işgəncəyə məruz qaldığını əks etdirən videolar yayılıb. Hüquq-mühafizə orqanları dərhal işi araşdırmağa başlayıb. Məhkəmə mərkəzin üç əməkdaşı haqqında istintaq müddətinə ev həbsi qərarı çıxarıb. Azərbaycanın Təhsil və Səhiyyə nazirlikləri bildiriblər ki, sözügedən xüsusi müəssisə onların tabeliyində olmayıb.
- Uşaqlar, qırıcılar və tanklar
- Ukraynadan Rusiyaya keçərək – ukraynalı qaçqınların Gürcüstandakı taleyi
- “Uşağın qiyməti 15-25 min avrodur”: Ermənistanda uşaqları əcnəbilərə necə satıblar
Nə baş verib?
Bakıda yerləşən “Mehnur” özəl loqopedik reabilitasiya mərkəzində uşaqlara işgəncə verilməsi ilə bağlı video-görüntülər sosial şəbəkələrdə yayıldıqdan sonra hüquq-mühafizə orqanları məsələni araşdırmağa başlayıb.
DİN-dən verilən məlumata əsasən, uşaqlara işgəncə verən mərkəz əməkdaşlarının şəxsiyyəti müəyyən edilib.
Səhiyyə Nazirliyi, DİN, Baş Prokurorluq, Ailə, Qadın və Uşaq Problemləri üzrə Dövlət Komitəsinin, ictimai təşkilatların və digər dövlət qurumlarının nümayəndələrinin iştirakı ilə qurumlararası İşçi Qrup da araşdırma başladıb.
Saxlanılma və məhkəmə qərarı
Polis əməkdaşlarının həyata keçirdiyi əməliyyat tədbirləri nəticəsində müəssisə rəhbəri Nuranə Hacıyeva, köməkçisi Səbinə Əliyarbəyli və psixoloq Aytac Kazımlı saxlanılıblar.
Fakt üzrə onlara qarşı Azərbaycan Respublikası Cinayət Məcəlləsinin 133-cü maddəsilə (işgəncə) cinayət işi qaldırılıb.
Bakı şəhəri Nizami rayon Məhkəməsi saxlanılanların üçünün də haqqında istintaq müddətində ev dustaqlığı qərarı çıxarıb.
Valideynlər nə deyir?
Mərkəzdə döyülən uşaqlardan birinin anasının sözlərinə görə, uşağının bədənində yaralar görüb.
“Oğlumdan soruşdum ki, bu yaralar hardandır? Dedi ki, psixoloq onu döyüb”, – Səbinə Qasımova deyib.
Maraqlıdır ki, məktəbəqədər müəssisədə işgəncəyə məruz qalan uşaqların çoxunun valideyni jurnalistlərlə danışmaq istəməyib.
Özəl uşaq mərkəzlərinə kim nəzarət edir?
Azərbaycanda qanunvericilik belə reabilitasiya mərkəzlərinin fəaliyyətini məhdudlaşdırmır. Onlar tibbi xidmət göstərmirlər, buna görə də Səhiyyə Nazirliyi onlara nəzarət etmir.
Belə məktəbəqədər müəssisələrin fəaliyyətinə Elm və Təhsil Nazirliyi də nəzarət etmir. Bu haqda nazirliyin mətbuat xidmətinin rəhbəri Cəsarət Valehov bildirib. “Belə mərkəzlər kiçik müəssisələr kimi fəaliyyət göstərir, bizim onlarla heç bir əlaqəmiz yoxdur”, – o qeyd edib.
İqtisadiyyat Nazirliyinin mətbuat xidmətinin rəhbəri Abbas Əliyev isə bildirib ki, belə mərkəzlər lisenziyalaşdırma haqda qanunun tələbləri altına düşmür.
Ekspert rəyləri
“Mərkəzin işçiləri tərəfindən işgəncəyə məruz qalan 4 yaşlı Cavid Cəbrayılovun eşitməsində pozuntu var. Onunla reabilitasiya işləri ancaq eşitmə aparatından istifadəyə başlayandan sonra aparılmalı idi.
Eşitməyən uşaqda aqressiya ola bilər və o, loqopedlə birlikdə tapşırıları yerinə yetirə bilməz. Onu bu vəziyyətdə nəyisə təkrarlamağa məcbur etmək kökündən yanlışdır. Belə uşağı əvvəlcə loqopedə yox, lora aparmaq lazımdır. Eşitmə pozuntusu aradan qaldırılandan sonra reabilitasiya kursuna başlamaq olar ki, uşaq danışmağa başlasın”, – psixoloq Elnur Rüstəmov qeyd edib.
O, belə mərkəzlərin öz vəzifələrinə belə məsuliyyətsizcə yanaşdıqlarından və valideynləri lazımi istiqamətdə yönləndirə bilmədiklərindən təəssüfləndiyini bildirib.
Azərbaycan Uşaq Birliyinin sədri Kəmalə Ağazadə vurğulayıb ki, özəl reabilitasiya mərkəzlərinin lisenziyası olmalıdır, orada işləyən mütəxəssislər isə bacarıqlarını və xüsusi qayğıya ehtiyacı olan azyaşlılarla iş təcrübəsini təsdiqləyən müvafiq sertifikat almalıdırlar.
“Ancaq araşdırmadan sonra biz biləcəyik ki, uşaqlara işgəncə verilən bu mərkəzin lisenziyası olub, ya yox. Amma hadisə göstərdi ki, azyaşlılarla, o cümlədən də məhdud fiziki imkanları olan uşaqlarla işləyən müəssisələr lisenziya əsasında fəaliyyət gööstərməlidir. “Mehnur”un direktorunun Bakıda dörd belə mərkəzi var. Biz hələ də bilmirik ki, o birilərində uşaqların başına nələr gəlib”, – Ağazadə deyib.
