Qəza həftənin ən çox müzakirə edilən mövzusu oldu: Azərbaycanda iki nəfərin ölümündə kimin günahkar olduğunu araşdırırlar

Dəmiryolu keçidində sərnişin avtobusunun yük qatarına çırpılması nəticəsində biri məktəbli olmaqla iki nəfər həlak oldu. Daha 40 nəfər xəsarət aldı.

Qəza cəmiyyətdə nəhəng rezonansa səbəb oldu, onu bütün həftə boyu müzakirə etdilər. İnsanlar qəzanın, birincisi, ictimai nəqliyyat əməkdaşının günahı üzündən, ikincisi isə, qəribə səhvə görə baş verməsindən şokdadırlar, belə ki, avtobus sürücüsü dəmiryolu keçidinin qarşısında əyləci basmayıb və düz üstünə gələn qatarı görməyib.

Nəticədə, hadisənin baş verməsində şübhəli qismində avtobusun sürücüsü Əlixan Şirəliyev və avtobusun məxsus olduğu şirkətin dispetçeri Mübariz Fərəcov həbs ediliblər.

Şirəliyev həmin gün marşruta tibbi baxışdan keçmədən çıxdığı, dispetçer isə ona bu imkanı yaratdığı üçün ittiham edilirlər.

İstintaq davam edərkən qəzanın təfərrüatları ən müxtəlif şayiələrlə zənginləşirdi. Məsələn, deyirdilər ki, sürücü əvvəllər məhkum olunub, qəza vaxtı isə narkotik vasitələrin təsiri altındaymış, keçiddə şlaqbaum aşağı endirilməyib və s. Lakin insanları ən çox sarsıdan xəbər qəzada həlak olan məktəblinin anasının intihar etməsi oldu. Qadın 15 ildən sonra dünyaya gətirdiyi yeganə oğlunu itirmişdi. Bu şayiələrdən heç biri rəsmən təsdiqini tapmayıb. Ananın intiharı barədə xəbəri həlak olmuş məktəbinin qohumları təkzib etdilər.

Sosial şəbəkə istifadəçiləri az qala birinci dəfə hər hansı yol qəzasının araşdırılmasının gedişatını belə diqqətlə izləyirdilər. Nəhayətdə kimin günahkar olması barədə mübahisə edir və ümumilikdə, Azərbaycanda ictimai nəqliyyatla bağlı vəziyyət haqqında müzakirə aparırdılar. Bildirilirdi ki, sürücülər tez-tez yol hərəkəti qaydalarını pozur, sərnişinlərin təhlükəsizliyinin qeydinə qalmır, sürəti artırır, bir-birinin yolunu kəsirlər:

«Maraqlıdır, daha neçə belə hadisə baş verməli və ölüm olmalıdır ki, müvafiq qurumlar şəhər sərnişindaşıması ilə yaxından məşğul olsunlar (konkret olaraq, avtobus özbaşınalığı ilə)?!»

«Amma sürücüyə iradını bildirsən, sərnişinlərdən heç biri sənin tərəfini saxlamayacaq. İnsanlarda elementar özünüqoruma instinkti yoxdur. Bu halda, əlbəttə, günahkar sürücüdür. Amma sərnişinlər də məsuliyyət daşıyırlar».

«Qatarın da belə küçənin düz ortası ilə keçməsi düzgün deyil axı! Birmənalı olaraq, belə marşrut tərtib edənlər günahkardır».