Artıq 7, 8 və 9 mart tarixləri Gürcüstanın ən yeni tarixinə daxil olub. Gürcüstan cəmiyyəti birləşərək hakimiyyəti “Xarici təsirin şəffaflığı haqqında” qanun layihəsini geri çəkməyə məcbur edə bildi. Qeyri-hökumət mediasının bir çox nüfuzlu nümayəndələrinin fikrincə, ölkədə vətəndaş cəmiyyətinin və müstəqil jurnalistikanın mövcudluğuna təhlükə yaradan bu qanunu burada “xarici agentlər haqqında Rusiya qanunu” adlandırırlar.
Bütün hekayə qısaca bu videoda, ətraflı kontekstaşağıdadır.
Etirazçıların ümumi sayını təxmin etmək asan deyil, müxtəlif günlərdə və günün müxtəlif vaxtlarında on minlərdən 100 minə qədər insan küçələrə çıxıb. Əvvəlcə aksiya dinc xarakterli olsa da, tezliklə parlamentə xüsusi təyinatlılar göndərilib. Martın 7 və 8-də iki gecə ardıcıl olaraq on minlərlə insan gözyaşardıcı qaz, işıq-səs qumbaraları və su şırnaqlarından istifadə edərək dağıdılıb.
Güc tətbiqi etirazçıları daha da sövq edib və baş verənləri televiziyadan izləyənlərin çoxu küçələrə axışıb. Odur ki, təzyiqlərə və həbslərə baxmayaraq, mitinqlər səngiməyib və martın 8-i səhər saatlarında qadın yürüşlərinin marşları və digər rəğbətçilər etirazçılara qoşulub.
Mitinqləri izləyən jurnalistlər və politoloqlar qeyd edirlər ki, uzun müddətdən sonra ilk dəfə olaraq aksiyaya xeyli gənc – tələbələr və orta məktəb şagirdləri toplaşıb. Yeniyetmələr küçələri dolduraraq polisdən qorxmadıqlarını açıq şəkildə nümayiş etdirirlər.
Etiraz simvollarından biri 16 yaşlı Gürcüstanın taekvondo üzrə çempionu Salome Kençiaşvili olub. Artıq bütün ölkə onu “qırmızı şalvarlı qız” kimi xatırlayır, o, su şırnaqlarından məharətlə yayınması ilə yaddaşlarda qalıb.
Dövlət qulluqçuları və siyasətdən uzaq insanlar
Etirazlara son on ildə ilk dəfə olaraq hakim partiyadan asılı hesab edilən və buna görə də ona sadiqlik nümayiş etdirməyə məcbur olan insanlar – dövlət qulluqçuları da qoşulub. Belə ki, mart etirazlarının əsas simvoluna çevrilən Aİ bayrağı dalğalandıran qadın, 47 yaşlı Nana Malaşxiyanın Tbilisi meriyasının əməkdaşı olduğu bəlli olub.
Sosial şəbəkələrdə də qanunu qəbuledilməz hesab edənlərin sayı artıb – “#Rusiya qanununa yox” həştəqi ilə yüzlərlə, hətta minlərlə yeni postlar yayılıb. Bu postlar çox vaxt siyasətlə heç bir əlaqəsi olmayan müxtəlif peşə sahibləri tərəfindən paylaşılıb.
Çatdırılma xidməti kuryerlərinin fleşmobu
Bu hadisələrdən ən yadda qalanı Tbilisidə Avropa Meydanından keçən çatdırılma kuryerlərinin fleşmobu olub. Onlar təkcə Gürcüstanın Avropa istəklərini dəstəkləməyiblər, həm də Gürcüstanın əmək qanunvericiliyinin mühüm çatışmazlıqlarını dilə gətiriblər, Avropaya inteqrasiyanın bu problemlərin həllinə kömək edəcəyinə ümid etdiklərini bildiriblər.
İdman və mədəniyyət xadimləri
Məşhur idmançılar Xviça Kvaratsxeliya, Zaza Paçuliya, Şota Arveladze; mədəniyyət xadimləri Nino Katamadze, Nikoloz Raçveli, Lana Qoqoberidze; akademiklər Mzekala Şanidze və Rismaq Qordeziani, yazıçı Naira Gelaşvili və ölkənin digər tanınmış şəxsləri sosial şəbəkələrdə aktiv paylaşımlar edirlər.
