Qarabağdakı yataqlarda iş dayandırılıb: bu nə deməkdir? Bakıdan şərh
Qarabağdakı yataqlarda iş dayandırılıb
Laçın yolunda azərbaycanlı fəalların etiraz aksiyasının on yeddinci günü əvvəlki günlərdən Xankəndiyə doğru Rusiya sülhməramlılarının yük maşınlarının kütləvi hərəkəti ilə fərqlənib. Qarabağda yataqların istismarı ilə məşğul olan şirkətin fəaliyyətinin dayandırılması da məlum olub.
- Ağdamda qardaşının məzarını axtararkən
- Türkiyə Konstitusiyasında ailə statusunu “kişi və qadın birliyi” kimi təsbit etməyə hazırlaşırlar
- “Azərbaycan niyə çağırışlara qulaq asmalıdır?” Bakıdan şərh
Xankəndini Ermənistanla birləşdirən yolda azərbaycanlı ictimai və ekoloji fəalların etiraz aksiyasının on yeddinci günündə ekspertlər birliyində rezonans doğuran hadisələr baş verib.
Rusiya sülhməramlı kontingentinin 45 yük maşını birdən dəhlizlə Ermənistandan Xankəndi istiqamətinə hərəkət edib.
Qarabağda yataqların istismarı ilə məşğul olan şirkətin fəaliyyətinin dayandırılması da məlum olub.
Siyasi icmalçı Hacı Namazov JAMnews-a Laçın dəhlizindəki vəziyyəti şərh edib.
Vardanyan sülhməramlılarla hansı razılığa gəlib?
Ekspertin sözlərinə görə, bu gün sülhməramlıların onlarla ağır yük maşınının dəhlizdən keçməsi də daxil olmaqla bir sıra hadisələr baş verib:
“Bu gün gündüz saatlarında erməni mənbələri Rusiya sülhməramlı kontingentinin komandanı Andrey Volkovla Qarabağ ermənilərinin faktiki rəhbəri Ruben Vardanyan arasında görüş barədə məlumat yayıb. Bu görüşdən bir neçə saat sonra Xankəndi istiqamətində 45 yük maşınının keçdiyi barədə məlumat yayılıb.
Hesab edirəm ki, Vardanyan Volkovla Xankəndinə zəruri malların çatdırılması ilə bağlı müəyyən razılıq əldə edə bilib. Baxmayaraq ki, rəsmi Bakı aksiyanın ilk günündən dəhlizin mülki şəxslər və humanitar yüklər üçün açıq olduğunu bəyan edir. Qəribədir ki, sülhməramlılar Qarabağ erməniləri üçün kuryer xidmətləri göstərməyə başlayıb.
Vurğulayıram ki, bu, ilk belə haldır və son 16 gün ərzində Xankəndi və ona bitişik ərazilərdə mal qıtlığı yaranıb. Yük maşınlarının sayı isə olduqca başa düşüləndir. Amma yaxın günlərdə də bu tendensiya davam edərsə, əminəm ki, Bakı da boş oturmayacaq.
Niyə? Çünki Laçın yolunda etiraz aksiyası keçirən fəallar sülhməramlılara aid ağır yük maşınlarının baqajlarını yoxlamırlar. Kim təminat verəcək ki, Kremlin himayədarı olan Vardanyan silah daşınması ilə bağlı sülhməramlı kontingentlə razılaşmayıb?
Yaxın günlərdə nə baş verdiyi və bunun nəyə gətirib çıxaracağı daha da aydınlaşacaq”.
Qarabağda beynəlxalq monitorinq?
Siyasi icmalçı Qarabağın Rusiya sülhməramlı kontingentinin nəzarətində olan hissəsində qeyri-qanuni mədən işləri aparan “Base Metal” şirkətinin fəaliyyətinin dayandırılması ilə bağlı xəbərə də münasibət bildirib:
“Erməni mənbələri qeyd edir ki, şirkət Qarabağdakı yataqlarda beynəlxalq monitorinq aparılması üçün fəaliyyətini dayandırıb.
Burada iki çox böyük “amma” var.
Birincisi, Qarabağ Azərbaycanın beynəlxalq səviyyədə tanınmış ərazisidir və heç bir monitorinq qrupu rəsmi Bakının icazəsi olmadan ölkə ərazisinə daxil ola bilməz. Bunu həm Yerevanda, həm də Xankəndində yaxşı başa düşürlər.
Nəzərinizə çatdırım ki, hətta Aİ-nin monitorinq qrupu Laçın yolunda aksiyanın keçirildiyi yerə çata bilməyib. Yataqlar üzrə monitorinq qrupu haqqında heç danışmağa dəyməz?
İkincisi, Azərbaycan bir aya yaxındır ki, illərdir qeyri-qanuni qızıl və mis hasilatının həyata keçirildiyi iki yataqda müvafiq dövlət qurumlarının nümayəndələrinin monitorinqini tələb edir. Azərbaycanlı mütəxəssislər bu yataqlara buraxılmadan başqa monitorinqdən söhbət gedə bilməz.
Mədən şirkətinin fəaliyyətinin birbaşa dayandırılmasına gəlincə, bunu azərbaycanlı fəalların etiraz aksiyasının ilk uğuru adlandırmaq olar. Aydındır ki, bu yataqlarda çıxarılan filiz artıq Ermənistana ixrac edilmir – bunun üçün heç bir imkan yoxdur. Bəs belə şəraitdə mədən şirkəti nə etməlidir? Onlar anlayırlar ki, dekabrın 12-nə, azərbaycanlı fəalların etiraz aksiyasının ilk gününə qədər orada mövcud olan vəziyyət bir daha təkrarlanmayacaq”.
Bizə abunə olun — Twitter | Facebook | Telegram | Instagram | Youtube
