Qarabağda gərginlik – Azərbaycan və Ermənistan tərəfinin versiyaları
Bakı və Yerevan Qarabağda iki kənd ətrafında silahlı qarşıdurmanı təsdiqləyir və 10 noyabrda imzalanan sülhlə bağlı üçtərəfli razılaşmanın pozulması haqda bildirirlər. Ölənlər və yaralananlar var.
Hələlik silahlı qarşıdurmanın dayandırıldığını demək mümkün deyil. Tərəflər baş verənlərlə bağlı fərqli versiyalar təqdim edirlər.
Azərbaycan erməni yaraqlılarına qarşı anti-terror əməliyyatı haqda, Ermənistan isə Azərbaycan hərbçilərinin dinc sakinlərə hücumu haqda bildirir.
Bakıdan informasiya
Dövlət Təhlükəsizliyi Xidməti və Müdafiə Nazirliyi dekabrın 13-də birgə bəyanatla çıxış edib. Bəyanatda Azərbaycanın xüsusi xidmət orqanlarının Qarabağda Xocavənd rayonunda anti-terror əməliyyatı haqda bildirilir.
“Atəşkəsin elan olunmasından sonra Azərbaycanın Xocavənd rayonunun Hadrut qəsəbəsinin şimal-qərb hissəsində meşəlik ərazidə bəzi erməni silahlı birləşmələri qalmışdır.
Ermənistanın kütləvi informasiya vasitələrində sözügedən silahlı dəstələrin meşəlik ərazidə azmış vəziyyətdə olduğu barədə məlumat verilmişdi. Onların ərazidən çıxarılması üçün Ermənistan tərəfi Rusiya Federasiyası sülhməramlı qüvvələrinin komandanlığına müraciət etmişdi. Azərbaycan tərəfi bununla əlaqədar bütün şəraiti təmin etmişdir.
Rusiya sülhməramlı qüvvələrinin hərbi qulluqçuları ağır hava şəraitində həmin əraziyə gələrək səs gücləndirici vasitələrlə meşəlik ərazidə olan erməni silahlı dəstələrinə müraciət etmişdir. […]
Həmin erməni silahlı dəstələri ərazini tərk etməmiş, əksinə döyüş mövqeləri yaratmış və son günlər qeyd olunan ərazidə Azərbaycan tərəfdən mülki xidmətləri həyata keçirən şəxslərə və hərbi qulluqçulara qarşı terror-təxribat və diversiya əməllərini törətmişlər.
Belə ki, 2020-ci il noyabr ayının 26-da işğaldan azad olunmuş Xocavənd rayonun Sur kəndində Müdafiə Nazirliyinin həmin ərazidə xidmət aparan hərbiçilərinə ermənilərin qəfil hücumu nəticəsində 3 hərbi qulluqçumuz öldürülmüş, 2 nəfər yaralanmışdır.
Dekabrın 8-də həmin rayonun Hadrut qəsəbəsi yaxınlığında rabitə qurğularının və ötürücü avadanlıqların quraşdırılması işlərinin aparılması zamanı 1 hərbi qulluqçu həlak olmuş və “Azercell” şirkətinin əməkdaşı ağır yaralanmışdır.
Qeyd olunanları nəzərə alaraq, Azərbaycan Respublikasının Dövlət Təhlükəsizliyi Xidməti həmin ərazidə anti-terror əməliyyatı keçirmək məcburiyyətində qalmışdır”.
- İkinci Qarabağ müharibəsinin hərbdən sonrakı qurbanları
- Müharibə meydanında başkəsənlər: Qarabağdan səs-küylü video müzakirə mövzusuna çevrilib
- Qarabağ və Ermənistanın aqibəti necə olacaq?
- Şərh: Qarabağda hadisələrin üç ssenari üzrə inkişafı – Bakıdan baxış
Yerevandan informasiya
Ermənistan XİN-dən dekabrın 13-də bildirilib ki, “Azərbaycan Artsax Respublikasının bu hissəsində sülhməramlı qüvvələrin yerləşdirilmədiyindən istifadə edərək Hadrut rayonunun Xin Taqlar və Xtsaberd yaşayış məntəqələri ətrafında atəşkəsi pozub”.
Ermənistan XİN-in informasiyasına görə, bu hadisə dekabrın 11-də baş verib, Qarabağ müdafiə ordusunun altı hərbçisi yaralanıb.
“Azərbaycan qüvvələri dekabrın 13-də də Mets Şen və Xin Şen yaşayış məntəqələri ətrafında [kəndlər Azərbaycan versiyasında Böyük Qaladərəsi və Köhnə Qaladərəsi adlanır — JAMnews] təxribat xarakterli əməllərini davam etdirib. […] Bu əməllər Rusiya Federasiyasının sülhməramlı qüvvələrinin münaqişə zonasında mövcudluğunu dəyərdən salmaq məqsədi güdür.
Azərbaycan tərəfi bu təxribatı ATƏT-in Minsk qrupu həmsədrlərinin regiona səfəri zamanı təhrik edib. Bu, [onların] səylərinə qarşı yönəlib. […]
Bu üslubda əməllər bir daha Türkiyə-Azərbaycan ekspansionist siyasətini nümayiş etdirir, hansı ki, regional təhlükəsizliyi və stabilliyi pozur və qonşu ölkələrə yayılması ilə nəticələnə bilər.
Rəsmi Bakının bu cür əməllərinin fonunda […] Artsax ərazilərinin işğaldan azad edilməsi və Artsax ermənilərinin öz yaşayış yerlərinə qaytarılması daha da mütləq olur”.
Ermənistan XİN ATƏT-in Minsk qrupunun həmsədr öılkələrini Azərbaycan tərəfinin əməllərinə reaksiya verməyə çağırıb.
