Qətl, məhkəmə, yeni məhkəmə: Abxaziyada rezonanslı iş ətrafında yeni qalmaqal
Photo: IBRAHİM ÇKADUA
Abxaziyada ən rezonanslı cinayətlərdən birinin ətrafında yeni qalmaqal.
2012-ci ildə törədilən cinayətin özü də böyük diqqət çəkdi – Abxaziya parlamentinin deputatı Nodik Kvitsiniya rusiyalı iş adamı Sergey Klimantoviç və rəfiqəsi Oksana Skarednovanın qətlini təşkil etmişdi.
28 oktyabr 2016-cı ildə iş üzrə beş müttəhim 13 ildən 20 il qədər həbs cəzasına məhkum edildi.
İndi də hadisələr yeni inkişaf mərhələsinə keçib – hakim Temur Tarba və hakimlər Oksana Piliya və Qenri Qamisoniyanın sədrliyi altında Abxaziya Ali Məhkəməsinin kasasiya heyəti qərarı ləğv edərək, bu cinayət işinin yeni məhkəmə araşdırılmasına göndərilməsi barədə qərar çıxardı.
Photo: Anaid Gogorian
Cəmiyyətin qəzəbli reaksiyası özünü çox gözlətmədi.
Məhkəmənin belə bir qərar çıxarması barədə ilk olaraq özünün sosial şəbəkədəki səhifəsində keçmiş baş prokuror Aleksey Lomia məlumat yayıb. Onun bu mövzu ilə bağlı statusu həddən artıq emosional idi:
Bu işlə bağlı yeni qərarın bütün konteksti detektivi xatırladır. Müdafiə tərəfinin kasasiya şikayətinin baxılması üzrə iclasın təyin edilməsi barədə jurnalist və redaktorlardan heç biri əvvəlcədən məlumatlandırılmadı. Bundan əlavə, Abxaziyada güclü qarın uzun müddət sürməsi səbəbindən bütün məhkəmə prosesləri təxirə salınmışdı.
Qəfildən Klimantoviç və onun rəfiqəsinin qətli ilə bağlı kasasiya heyətinin çağırılması əsl sürpriz oldu. Ancaq son anda dövlət televiziyasının çəkiliş qrupu dəvət edildi və onun qarşısında da qəbul edilən qərar oxundu.
Kasasiya heyətinin qərarının tam mətni dərc ediləndən sonra ittiham edən tərəfin qərardan şikayət vermək üçün on gün vaxtı olacaq. Şikayət təmin edildiyi halda onu Ali Məhkəmənin Rəyasət Heyəti nəzərdən keçirəcək.
Cəmiyyət qəzəb içindədir
Məhkəmə qərarı və bu cür qərarı çıxaran hakimlərin sosial şəbəkələrdə müzakirəsi, daha doğrusu pislənməsi martda keçiriləcək və hazırda ən populyar olan parlament seçkiləri mövzusunu bir neçə günlük kölgədə qoydu.
Əksər şərhlərdə ən çox istifadə olunan da “biabırçılıq” sözü oldu.
Keçmiş baş prokuror Aleksey Lomianın statusu altında Klemantoviçin dul qalan xanımı Natalyanın da şərhi var:
Hökmü ləğv edən hakim Temur Tarba fəal sosial şəbəkə istifadəçisidir. O, mütəmadi olaraq öz şerlərini yerləşdirir və bu şerlər kifayət qədər populyardır. Məhkəmə qərarı ilə bağlı çox sayda ittihamlardan sonra Tarba da öz şərhini yazdı ki, hökmün ləğv edilməsinə baxmayaraq, müttəhimlər həbsdə qalmaqda davam edəcəklər.
Rusiyalı iş adamı Sergey Klimantoviç “El Petroleum – Abxaziya” şirkətinə başçılıq edib, şirkət dəmir qırıntılarının emalı və çınqıl daşların hazırlanması ilə məşğul olur. 2012-ci il sentyabr ayının əvvəlində Klemantoviç rəfiqəsi Oksana Skarednova ilə birlikdə Abxaziya ərazisinə girir və yoxa çıxırlar. Təxminən bir il sonra, 2013-cü ilin oktyabr ayında onların cəsədləri Oçamçira rayonunun Adzübja kəndində yiyəsiz su quyusunda aşkar edilir.
Baş prokurorluq qətlin törədilməsində şübhəli bilinən beş nəfərə qarşı ittiham irəli sürüb: parlamentin fəaliyyətdə olan deputatı Nodik Kvitsiniya və onun dörd əlbirinə – Ramin Xmail, Axra Qopiya, Cumber Biqvava və Aslan Tsijbaya.
O vaxt qətlin təşkilatçısı Kvitsiniya hesab edilirdi. Onun Klemantoviçlə iş münasibətləri olub. Rusiyalı iş adamı o cümlədən, deputatdan bir neçə hektarlıq sahil torpağı alıb, Kvitsiniyanın sözlərinə görə də pulun hamısını ödəməyib. Birinci instansiya məhkəməsi belə bir nəticəyə gəlib ki, iş üzrə qalan dörd müttəhim Nodik Kvitsiniya tərəfindən tutulub. Onlar iş adamı və onun rəfiqəsini oğurlayıb, bir neçə gün sonra öldürüb, cəsədlərini də su quyusuna atıblar.
Birinci instansiya məhkəməsi tərəfindən ciddi rejimli cəzaçəkmə müəssisəsində 16 il müddətinə həbs cəzası alan deputatın özü isə qaçıb. Bəzi məlumatlara görə, Kvitsiniya Gürcüstan ərazisində gizlənir. İstintaq və məhkəmə prosesi zamanı onu həbs etməmişdilər, çünki parlament onu immunitetindən məhrum etsə də, həbsinə icazə verməmişdi.
28 oktyabr 2016-cı ildə, rusiyalı iş adamı və rəfiqəsinin qətli ilə bağlı iş üzrə hökm çıxarılan zaman Nodik Kvitsiniya məhkəmə iclasına gəlmədi. Vəkili isə Kvitsiniyanın xəstəxanaya düşməsi barədə arayış təqdim etdi. Amma sonradan məlum oldu ki, əvvəlcədən qərarın necə olacağını bilən Kvitsiniya qaçıb.
