Prezident İlham Əliyev: “İran tərəfindən Azərbaycana qarşı terror aktı törədilib”
Prezident Naxçıvana dron hücumu haqqında
Azərbaycan Prezidenti İlham Əliyevin sədrliyi ilə Təhlükəsizlik Şurasının iclası keçirilib. Dövlət başçısı iclasda çıxış edərək Naxçıvan Muxtar Respublikasının ərazisinə pilotsuz uçuş aparatları ilə zərbə endirildiyini bildirib və hücumun İran tərəfindən həyata keçirildiyini bəyan edib.
Onun sözlərinə görə, Azərbaycan bu hadisəni “çirkin terror aktı” kimi qiymətləndirir.
“Bu gün İran tərəfindən Azərbaycan ərazisinə qarşı terror aktı törədilmişdir. Naxçıvan Muxtar Respublikasının ərazisi pilotsuz uçuş aparatları ilə atəşə tutulub və hədəflər mülki obyektlər olub”, – deyə dövlət başçısı bildirib.
Prezident vurğulayıb ki, Azərbaycan bu hadisəni qətiyyətlə pisləyir və İran tərəfinin məsələ ilə bağlı izahat verməsini, üzr istəməsini və hadisəyə görə məsul şəxslərin cəzalandırılmasını tələb edir.
Martın 5-də günorta saatlarında Azərbaycanın Naxçıvan Muxtar Respublikasında dron hücumu baş verib. Azərbaycan rəsmiləri hücumun İran ərazisindən həyata keçirildiyini iddia edir və hadisəyə görə məsuliyyətin tam şəkildə İranın üzərinə düşdüyünü bildirirlər.
İran xarici işlər nazirinin müavini Kazem Qəribabadi ölkəsinin Azərbaycanı hədəf aldığını təkzib edib.
Qəribabadi Azərbaycan hökümətinə yaxın “AnewZ”a verdiyi açıqlamada bildirib ki, “İran İslam Respublikası Azərbaycan Respublikasını hədəf almayıb. Biz qonşu ölkələrimizi hədəf almırıq”.
O əlavə edib ki, “İranın siyasəti yalnız ABŞ və İsrail də daxil olmaqla, regionda aktiv olan və İrana hücum etmək üçün istifadə edilən düşmənlərinin hərbi bazalarına zərbə vurmaqdır”.
İlham Əliyev çıxışında bildirib ki, bu, İranın Azərbaycana qarşı ilk belə addımı deyil və Azərbaycanın Tehrandakı səfirliyinə edilən hücumu da xatırladıb. Onun sözlərinə görə, həmin hadisədən sonra Azərbaycan sərt reaksiya verərək səfirliyini İrandan təxliyə etmiş və diplomatik əlaqələri dayandırmışdı.
Dövlət başçısı qeyd edib ki, Azərbaycan ərazisinin heç vaxt digər dövlətlərə qarşı istifadə olunmasına imkan verilməyib və verilməyəcək.
“Azərbaycan nə o vaxt, nə də bu dəfə İrana qarşı hər hansı əməliyyatlarda iştirak etmir və etməyəcək. Bizim siyasətimiz qonşu ölkələrə qarşı əməliyyat keçirməyi nəzərdə tutmur”, – deyə o bildirib.
Prezidentin sözlərinə görə, hücuma cavab olaraq Azərbaycan Silahlı Qüvvələrinə cavab tədbirləri hazırlamaq və həyata keçirmək barədə göstəriş verilib. Eyni zamanda İranın Azərbaycandakı səfiri Xarici İşlər Nazirliyinə çağırılıb və etiraz notası təqdim ediləcək.
İlham Əliyev əlavə edib ki, Azərbaycan ordusu və digər təhlükəsizlik strukturları yüksək döyüş hazırlığı vəziyyətinə gətirilib.
“Silahlı Qüvvələrimiz bir nömrəli səfərbərlik vəziyyətinə gətirilib və istənilən əməliyyatı keçirməyə hazır olmalıdırlar”, – deyə Prezident bildirib.
Prezident Naxçıvana dron hücumu haqqında
