Polşaya düşən raket Rusiyadan atılmayıb

“Noyabrın 15-də Polşanın şərqinə düşən və iki nəfərin ölümünə səbəb olan raket çox güman ki, Rusiyadan buraxılmayıb”, – ABŞ prezidenti Co Bayden Balidə keçirilən G20 sammiti çərçivəsində dünya liderlərinin fövqəladə iclasını başa vurduqdan sonra deyib. İclasda həmçinin Böyük Britaniya, Almaniya, Fransa, Kanada, Avropa İttifaqı, İspaniya və Yaponiya liderləri də iştirak edir.

“Mütəxəssislər hələ də baş verənləri araşdırmaqda davam edirlər, lakin məndə raketin Rusiya hərbçiləri tərəfindən buraxılması ehtimalını inkar edən ilkin məlumat var”.

Polşa Xarici İşlər Nazirliyi və prezident Anjey Duda bildiriblər ki, “Ukrayna ilə sərhəddə yerləşən Prjevoduv kəndinə düşən raket böyük ehtimalla Rusiya istehsalıdır”.

“Heç nə göstərmir ki, Polşa ərazisinə zərbələr təkrarlana bilər. Lakin NATO hazır vəziyyətdədir. Biz Polşa silahlı qüvvələrinin, o cümlədən hava hücumundan müdafiə sisteminin hazırlığını artırmışıq. Təyyarələrimiz müttəfiqlərin təyyarələrini dəstəkləyəcək. Biz sakit və ehtiyatlı davranırıq”, – Polşa prezidenti bildirib.

Hadisə ilə bağlı araşdırmalara başlanılıb. ABŞ artıq araşdırmada iştirak etməyə hazır olduğunu bildirib. Polşa digər ölkələrin nümayəndələrini də dəvət edib.

Britaniyanın baş naziri Rişi Sunak bildirib ki, hökumət NATO tərəfdaşları ilə sıx koordinasiyada insidentin bütün şərtlərini müəyyən etməyə çalışır.

Dünya liderləri konkret nə baş verdiyi bəlli olduqdan sonra növbəti addımlarını müəyyən edəcəklər.

“Raketin Rusiya istehsalı olması” nə deməkdir

“Bellingcat” müəllifi Erik Toler istisna etmir ki, Sovet dövründə istehsal edilən raketlər də bu əlamətlərə uyğun gələ bilər. Polşalı ekspert Yaroslav Volski Twitter hesabında Pşevodov yaxınlığında tapılan raket qalıqlarının fotosunu yayıb.

Ukraine weapons tracker OSINT-layihəsinin versiyasına görə, bunlar SSRİ-də hazırlanmış S-300 sistemli 5V55 seriyalı raketin mühərrikinin hissələridir.

Ukraynanın bəyanatı

Hadisədən dərhal sonra Ukrayna və Polşa prezidentləri arasında telefon danışığı olub. Bu söhbəti şərh edən Vladimir Zelenski deyib: “Polşa vətəndaşlarının Rusiyanın raket terroru nəticəsində həlak olması ilə bağlı başsağlığı verdim. Biz mövcud məlumatları müzakirə etdik və bütün faktları aydınlaşdırmağa çalışırıq. Ukrayna, Polşa, bütün Avropa və dünya terror dövlətindən tam qorunmalıdır”.

Ukraynanın müdafiə naziri Aleksiy Reznikov çərşənbə axşamı Polşada baş verən insidentin beynəlxalq təhqiqatına dəstəyini bildirib. Onun sözlərinə görə, Ukrayna belə bir təhlükə barədə xəbərdarlıq edib və səmanı bağlamağa çağırıb.