“Paşinyanın hakimiyyətdə qalmaq şansı yoxdur, biz seçkilərdə fəal olacağıq” — Ermənistanın sabiq prezidenti
Koçaryan Ermənistanda seçkilərdən danışır
2026-cı ildə Ermənistanda keçiriləcək parlament seçkilərində Nikol Paşinyanın “hakimiyyətdə qalmaq üçün heç bir şansı yoxdur”. Bu fikri Ermənistanın sabiq prezidenti Robert Koçaryan yerli nəşrlərdən birinə verdiyi müsahibədə bildirib.
Onun fikrincə, Paşinyan hələ də müəyyən seçici qruplarına təsir göstərir, lakin bu qrupun sayı xeyli azalıb və baş nazirin reytinqi enişdədir.
Koçaryan özünün liderlik etdiyi “Hayastan” (Ermənistan) parlament fraksiyasının “seçkilərdə aktiv və əhəmiyyətli iştirak etməyə” hazır olduğunu bəyan edib. O, həmçinin istisna etməyib ki, seçkilərədək ölkədə hakimiyyətin dəyişməsini sürətləndirə biləcək vəziyyətlər yarana bilər. Lakin eks-prezident bu proqnozunu dəqiqləşdirməyib.
O hesab edir ki, “Hayastan” müxalifət fraksiyasından əlavə siyasi arenada daha bir “əhəmiyyətli qüvvə” peyda olub. Söhbət rusiyalı və ermənistanlı iş adamı Samvel Karapetyanın yaratmaq niyyətində olduğu yeni siyasi qüvvədən gedir.
Siyasi şərhçi Suren Surenyants isə sabiq prezidentin “iki əhəmiyyətli qüvvə” tezisinin faktlarla əsaslandırılmadığını düşünür.
“Hayastan” bloku faktiki olaraq fəaliyyət qabiliyyətini itirib. Samvel Karapetyanın siyasi qüvvəsi isə hələ yaranmayıb. Siyasi sahədə “əsaslı dəyişiklik” hələ də real fəaliyyət göstərən fiqurları deyil, iddiaçıları gözləyir,” — deyə Surenyants Facebook səhifəsində yazıb.
Robert Koçaryanın çıxışının təfərrüatları və siyasi şərhçinin rəyi.
Din xadiminin gündəliyi və Ermənistanda çevriliş cəhdi: İstintaq Komitəsi rəhbərindən təfərrüatlar
Ermənistanda hakimiyyət və kilsə arasındakı qarşıdurma güclənir: Paşinyanın proqramı
Ermənistan xüsusi xidmət orqanları dövlət çevrilişinin qarşısını alıb: sübutlar dərc olunub
Koçaryan: “Samvel Karapetyanın yeni qüvvəsinin böyük potensialı var”
Ermənistanın ikinci prezidenti hesab edir ki, müxalifət düşərgəsində vəziyyət heç də ideal deyil. Onun sözlərinə görə, burada sərt rəqabət hökm sürür və bu rəqabət “həmişə sağlam deyil.”
Koçaryan mövcud siyasi oyunçular arasında iki əsas gücü önə çəkir: “Hayastan” fraksiyasını və Samvel Karapetyan ətrafında formalaşmaqda olan yeni siyasi qüvvəni. Sabiq prezident bu ikinci qüvvə barədə ətraflı məlumata sahib olmadığını desə də, onun böyük potensiala malik olduğuna əmindir:
“Paşinyan Samvel Karapetyana siyasi səhnəyə kifayət qədər gurultulu çıxış imkanı verdi. Görünür, düşünürdü ki, bu adam biznesmendir, çox varlıdır, həbsxana şəraitində sınacaq və razılaşmaya gedəcək.”
İyunda məhkəmə Samvel Karapetyanın iki ay müddətinə həbs olunması barədə qərar çıxardı. O, hakimiyyətin devrilməsinə çağırışda ittiham olunur. O, iyul ayında artıq həbsdə olarkən yeni siyasi qüvvə yaratdığını açıqladı və digər müxalif qüvvələrlə əməkdaşlığı istisna etmədi.
Koçaryanın rəhbərlik etdiyi “Hayastan” fraksiyası Karapetyanın siyasi təşəbbüsünü alqışladı, lakin əməkdaşlığa hazır olduqlarını bildirmədi. Blokun deputatları sadəcə olaraq qeyd etdilər ki, “vaxt hər suala cavab verəcək.”
Müsahibə zamanı jurnalist sabiq prezidentdən soruşub ki, Samvel Karapetyan ölkəni idarə edə bilərmi? Koçaryan belə cavab verib:
“Bu qədər böyük biznesi sıfırdan qurmaq o deməkdir ki, insanın idarəetmə bacarığı var, düzgün insanlarla münasibət qurmağı bacarır. Onun siyasi fəaliyyəti olmasa da, böyük sistemləri idarə etmə təcrübəsi var. [Dollar milyarderi həm də “Ermənistan Elektrik Şəbəkələri” şirkətinin sahibidir.] Onlar siyasi komanda quracaqlar və onu uyğun insanlarla, onların təbirincə desək, texnokratlarla tamamlayacaqlar. Bu da bizim siyasi səhnədə bir yenilik olacaq.”
Sabiq prezident Karapetyanın həbsini “xeyriyyəçiyə qarşı inanılmaz nankorluq” kimi qiymətləndirib.
Biznesmənə məxsus “Ermənistan Elektrik Şəbəkələri” şirkətinin milliləşdirilməsi prosesinə gəlincə, Koçaryan bunu “dövlət reketi” adlandırıb.
Politoloq Suren Surenyantsın şərhi
“İkinci prezident Robert Koçaryanın müsahibəsini xüsusi diqqətlə izlədim, ümid edirdim ki, ictimai konsolidasiyaya dair qərar və formullar eşidəcəyəm.
Təəssüf ki, gözləntilərim doğrulmadı, çünki Koçaryan özünün siyasi rolunu həddindən artıq qiymətləndirmə kompleksindən çıxa bilmir.
Robert Koçaryan bildirir ki, bu gün siyasi səhnədə iki əhəmiyyətli qüvvə formalaşıb:
- Parlamentdəki “Hayastan” bloku,
- Samvel Karapetyanın yaratdığı yeni qüvvə.
Lakin faktlar tamam fərqli mənzərə ortaya qoyur.
“Hayastan” blokunun real durumu
2021-ci il [növbədənkənar parlament] seçkilərindən sonra alyans ikinci partiyasını: “Dirçələn Ermənistan”ı itirdi.
Koçaryan faktoru “Hayastan” blokunun tərkibində olan EİF “Daşnaksütyun” partiyası daxilində də qeyri-müəyyənlik yaradıb. Elə görünür ki, partiya rəhbərliyi və sıralarında ikinci prezidentin liderliyi ətrafında yekdil razılıq yoxdur.
Bəs siyasi və institusional baxımdan “Hayastan” fraksiyası nəyi ifadə edir?
2021-ci ildən bu yana blok yerli seçkilərdə iştirak etməyib. Yerevanda, Gümrüdə keçirilən seçkilərdə yox idi, ən genişmiqyaslı müxalifət hərəkatı olan “Müqəddəs Mübarizə”yə qoşulmadı. İmpiçment prosesinə də dəstək vermir, bu mövzuda məntiqsiz izahlar verir və süni şəkildə impiçmentlə 2026-cı il seçkiləri arasında ziddiyyət yaradır.
Bu gün “Hayastan” bloku faktiki olaraq yalnız parlament fraksiyası formatında mövcuddur. Blokun təşkilatlanmış siyasi fəaliyyəti və institusional strukturu yoxdur.
Hazırda “Hayastan” bloku əhəmiyyətli bir oyunçu deyil, sadəcə parlamentdə qalmış bir “qalıqdır”.
Belə olan halda, Koçaryanın bəhs etdiyi “əhəmiyyətli qüvvə” nədir?
Samvel Karapetyanın qüvvəsi haqqında
Koçaryan hələ mövcud olmayan bir qüvvəni “əhəmiyyətli oyunçu” kimi təqdim edir:
- qeydiyyatdan keçmiş partiya yoxdur,
- ideologiya və ya proqram yoxdur,
- struktur və ictimai fəaliyyət yoxdur.
Karapetyanın yeganə üstünlüyü maliyyə resursudur. Amma bu resurs hələlik siyasi kapitala çevrilməyib.
Samvel Karapetyanın formalaşmaqda olan qüvvəsinin potensialı ola bilər. Lakin hələ hüquqi baxımdan mövcud olmayan bir qüvvənin təsirindən danışmaq necə mümkündür?
Koçaryanın tezisinin real məğzi
Koçaryan siyasi səhnənin onun ətrafında qütbləşdiyi təəssüratı yaratmağa çalışır. Amma əslində:
- onun müttəfiqlər arasında təcridi aşkardır,
- digər partiyalar və şəxslər onunla eyni platformada görünməkdən çəkinirlər,
- onun bəyanatları real gücü deyil, sadəcə əhəmiyyətli oyunçu görüntüsünü qoruyur.
Koçaryan birləşdirici yox, parçalayacı qüvvədir və onun mövcudluğu müxalif düşərgənin birləşməsini çətinləşdirir.”
Koçaryan Ermənistanda seçkilərdən danışır
