Rusiyanın əsas müxalifətçisi sosial şəbəkələrdə necə media imperiyası qurdu?

Rusiyanın əsas müxalifətçisi Aleksey Navalnını artıq uzun müddətdir ki, federal telekanalların və radiostansiyaların efirinə buraxmırlar. Oralarda hətta onun adını belə çəkmirlər, “bu personaj” deyə adlandırmağa üstünlük verirlər.

Buna görə də siyasətçinin internet auditoriyaya müraciət etməkdən başqa yolu yox idi, «Novaya qazeta»  belə hesab edir.

İndi onun ən güclü təşviqat və informasiya yaymaq üçün aləti 1,7 milyon insanın abunə olduğu Youtube kanalıdır ki, Navalnının buradakı videolarının ümumi baxışı üç yüz mindən çoxdur.

Navalnı sosial şəbəkələrdən real informasiya yaymaq vasitəsi kimi istifadə edən yeganə siyasətçidir.

Navalnının internetdəki aktiv fəaliyyəti 2008-ci ildən başlayıb. O zaman hələ az tanınan siyasətçi Rusiyanın ən iri dövlət şirkətlərinin aksiyalarını əldə edib, bundan sonra isə müxtəlif korporativ sənədləri əldə etmək hüququndan yararlanıb. Navalnının məqsədi pulların oğurlanması və yuyulması sxemini üzə çıxarmaq idi.

Elə həmin vaxt müxalifətçi araşdırmalarının nəticələrini Live Journal-dakı bloqunda dərc etməyə başlayıb. Dövlət şirkətlərinin fəaliyyətində böyük pozuntuları üzə çıxaran bir neçə araşdırma lazımı nəticəyə varmasa da (İstintaq Komitəsi və prokurorluq bu işlərin çoxu ilə maraqlanmayıb), Navalnı istədiyini – internetdə məşhurluq əldə edir.

2011-ci ilin sonuna doğru Navalnının bloqu artıq gündəlik 55 min istifadəçi tərəfindən oxunur, Time jurnalı isə rusiyalı müxalifətçini dünyanın 100 ən nüfuzlu insanı sırasına daxil edir.

2012-ci ildə Aleksey Navalnı bütün internet layihələrini Korrupsiya ilə Mübarizə Fondu (KMF) adlanan vahid strukturda birləşdirir. Fondun əsas hədəfi büdcə vəsaitlərinin necə xərcləndiyini izləməkdir.

Bir ildən sonra KMF-nın Dövlət Dumasının o zamankı deputatı Pextinin Mayamidəki daşınmaz əmlakı haqda bəhs edən ilk böyük araşdırması ərsəyə gəlir. Bu məqalə Pextinin istefasına gətirib çıxarır.

2013-cü ilin yayında Navalnı ilk dəfə Moskva meri vəzifəsinə namizəd kimi iri miqyaslı seçkiöncəsi kampaniyada iştirak edir. Navalnının Live Journal-dakı bloqu bu zamana qədər artıq mikro KİV-ə çevrilmişdi: hər gün bloqda üç məqalə dərc olunurdu və bu məqalələrin hədəfi ilk növbədə Moskvada müxalifətçinin reytinqini artırmaq və onun əsas opponenti vəzifədə olan mer Sergey Sobyaninin reytinqini düşürmək idi. Navalnının Youtube kanalında ilk videolar da elə bu ərəfədə dərc olundu. Nəticədə bu seçkilərdə o, dövlət KİV-nin heç bir dəstəyi olmadan səslərin 27,24 faizini toplaya bildi.

Son bir neçə il ərzində Navalnının kanalı Youtube-un Rusiya seqmentində ən populyarlardan biri oldu. Bu, ilk növbədə KMF-nın Rusiyanın korrupsiyaçı məmurları haqda böyük araşdırmaları sayəsində baş verdi. Onlardan ən çox baxılanı baş nazir Dmitri Medvedevin Rusiya oliqarxları ilə şübhəli əlaqələri haqda videodur. Bu material 26 milyon baxış toplayıb.

Hazırda Navalnının əsas Youtube kanalında həftədə bir neçə dəfə stabil olaraq milyondan çox baxış toplayan videolar yerləşdirilir.

“Navalnıy Live” adlanan ikinci kanalda hər gün canlı yayım həyata keçirilir, müxtəlif proqramlar buraxılır. KMF-nın əməkdaşı Lyubov Sobolun sözlərinə görə, fondun planında bu kanalda tam sutkalıq yayımlar təşkil etmək də var.

Ötən ayın sonunda siyasətçi “Xəbərlər” adlanan yeni media layihənin yaranmasını elan edib.

“Şübhə etmirəm ki, “Navalnıy LIVE” xəbərləri Rusiyada hər hansı həqiqəti danışmağa qadir olan ən iri xəbər KİV-nin onluğuna daxil olacaq”, – müxalifətçi bildirib.