Naxçıvanda toylarda yemək və içkilər qadağan edilib?
Bir neçə gündür ki, sosial şəbəkələrin Azərbaycan seqmentində Naxçıvan Muxtar Respublikasında verilmiş bir qərar qızğın müzakirə mövzusu olaraq qalır. Bildirilir ki, Naxçıvanda iyul ayının 1-dən icazə veriləcək toy mərasimlərində masalarda yalnız çay və şirniyyat ola bilər. Bu məlumat təkzib olunsa da, təkzibdə qərarın bu hissəsi barədə heç nə deyilmir.
- Azərbaycanda toylara icazə verilib, amma ciddi şərtlərlə
- Toylar qadağandır: Azərbaycanda bu nə deməkdir
- “Qayınanam komandirlik edir, ona cavab qaytarmaq olmaz”. Gürcüstanın Marneuli şəhərindən altı qadının hekayəsi
Yaslara tətbiq olunan qayda bütün ölkədə yayılmışdı
Bir neçə il bundan əvvəl Naxçıvanda yas mərasimlərində israfçılığın qarşısının alınması üçün masalara çay, qənd və halvadan savayı hər hansı təamın qoyulması qadağan edilmişdi. Bu qadağanın bilavasitə muxtar respublikanın rəhbəri – Naxçıvan MR Ali Məclisinin sədri Vasif Talıbov tərəfindən verildiyi bildirilirdi.
Həmin qərar Azərbaycanın digər bölgələrində yaşayan insanlar tərəfindən də təqdir olunmuşdu və tez bir zamanda bütün ölkə ərazisində bu qayda insanların özləri tərəfindən tətbiq edilməyə başlamışdı.
Hazırda nadir yas məclislərində masalarda, əvvəllər olduğu kimi, meyvələrə, bahalı spirtsiz içkilərə və başqa təamlara rast gəlmək olar.
Toy qadağası ləğv olunur
2020-ci ilin mart ayından Azərbaycanda koronavirus pandemiyası ilə əlaqədar toyların keçirilməsinə qadağa qoyulub. 16 ay davam edən bu qadağaya 1 iyul 2021-ci il tarixində son qoyulmalıdır.
Nazirlər Kabinetinin yanında koronavirusla mübarizə üzrə operativ qərargahın qərarına əsasən, 1 avqust 2021-ci il tarixindən 150 nəfərə qədər insanın iştirak edəcəyi toy məclislərinə COVID-pasportu olanlar gələ bilər.
1 iyul-1 avqust tarixləri arasında vaksinin yalnız bir dozasını vurdurmuş şəxslər də toylara buraxılacaq.
Naxçıvandan toylarla bağlı qadağa xəbəri
Toyların bərpa olunması xəbərinin yayılmasının ardınca xəbər saytlarında və sosial şəbəkələrdə Naxçıvanda toylarda yalnız çay və şirniyyatın verilməsinə icazə ilə bağlı məlumat yayıldı.
Həmin məlumat siyasətçilər və sosial şəbəkə istifadəçiləri tərəfindən birmənalı qarşılanmadı.
“Söhbət yayılıb ki, Vasif Talıbov Naxçıvanda toylarda çay və şirniyyatdan başqa bir şey verilməsini qadağan edib. Bunu dəstəkləyən bir neçə status və şərh görürəm.
Bəzi adətlərimizdə çatışmazlıqlar, xoşagəlməz hallar ola bilər. Toylardakı israfçılıq da daxil. Amma dövlətin buna müdaxilə edəcək qədər səlahiyyət mənimsəməsi daha qorxulu haldır. Totalitarizm belə yaranır. Daha doğrusu, insanların “yaxşı qadağaları” dəstəkləməsindən yaranır. Azadlıq təkcə xoşagələn və faydalı hərəkətlər azadlığı deyil. Həm də bəyənilməyən (amma başqasına ziyan vurmayan) hərəkətlər azadlığıdır, o cümlədən israfçılıq azadlığı”, – siyasətçi Yadigar Sadıqlı yazıb.
“Musiqini də yığışdırsalar, elə bil bəylə gəlinin yasına gəlmisən”, – sosial şəbəkə istifadəçilərindən biri etirazını bildirib.
Təkzib verildi, amma…
İyunun 28-də xəbər saytları naxçıvanda fəaliyyət göstərən “Nuhçıxan” xəbər agentliyinə istinadla məlumat verdilər ki, toylarda yemək və içkilərin verilməsi ilə bağlı yayılmış informasiya həqiqəti əks etdirmir.
“Ölkə üzrə qəbul olunmuş pandemiya qaydalarına uyğun olaraq, 2021-ci il iyulun 1-dən mövcud tələblər əsasında Naxçıvan Muxtar Respublikasında da toy və digər şənlik mərasimləri toy qaydalarına uyğun keçiriləcək”, – məlumatda deyilir.
Maraqlıdır ki, Naxçıvanda fəaliyyət göstərən agentlik bu informasiyanı Naxçıvan MR-in Bakıdakı nümayəndəliyinə istinadla yayıb. Başqa sözlə, muxtar respublikadakı rəsmi mənbələr buna münasibət bildirməyiblər.
Digər tərəfdən, təkzib formasında verilən məlumatda toyların pandemiya qaydalarına uyğun keçiriləcəyi qeyd olunur, masalara yemək və içkilərin veriləcəyi barədə qeyd yoxdur.
