Müxalif siyasətçi saxta pul hazırlamaq ittihamı ilə həbs edilib
Qubaq İbadoğlunun işi
Azərbaycanda müxalif siyasətçi, iqtisadçı alim, London İqtisadi və Siyasi Elmlər Məktəbinin müəllimi Qubad İbadoğlu saxta pul hazırlamaqda ittiham olunaraq həbs edilib. O, ittihamları rədd edir. Yaxınları və vətəndaş cəmiyyəti nümayəndələri müxalifətçinin həbsini sifarişli hesab edir və onun siyasi fəaliyyəti ilə bağlı olduğunu deyirlər.
- Müstəqil jurnalistlər Milli Mətbuat Günündə Avropa Şurasına müraciət ediblər
- Ədliyyə Nazirliyi əsas müxalifət partiyalarını yenidən qeydiyyatdan keçirməkdən imtina edib
- İranla sərhəddə: “Nəzarət var, amma alver də gedir”
Nə baş verib?
İyulun 23-də günorta saatlarında Azərbaycan Demokratiya və Rifah Partiyasının (ADR) sədri Qubad İbadoğlu partiyasının gəncləri ilə görüşə gedərkən Novxanı-Sumqayıt yolunda saxlanılıb. Polis onunla birlikdə həyat yoldaşı İradə Bayramovanı da saxlayıb. Bu barədə sosial şəbəkələrdə siyasətçinin qızı Jalə Bayramova məlumat yayıb.
Bir neçə saatdan sonra İradə Bayramova azadlığa buraxılıb və o, saxlandıqları zaman həyat yoldaşı ilə birlikdə fiziki zorakılığa məruz qaldıqlarını bildirib. Bayramovanın bədənində zorakılıq izləri müşahidə olunur.
Siyasətçinin qızı Jalə Bayramova heç kimin, hətta vəkilin də atasının yanına buraxılmadığını, yaxınlarının ondan çox narahat olduğunu bildirib.
“Ona dərman və paltar kimi ehtiyacları götürməyə imkan verməyiblər. Hələ də lazım olan dərmanları yoxdur. Atamın yüksək təzyiq və şəkəri var, dərmanlar onun həm də digər daxili orqanları üçündür. Həmin dərmanlarsız o sadəcə məhv ola bilər”, – Bayramova qeyd edib.
“Bu, İlham Əliyevin sofarişidir”
İyulun 23-dən 24-nə keçən gecə Qubad İbadoğlunun ofisində və mənzilində axtarış aparılıb və oradan 40 min dollar tapıldığı bildirilir.
Axtarış başa çatdıqdan sonra siyasətçi ofisindən çıxarılıb, onu aparan hüquq-mühafizə əməkdaşları səylə İbadoğlunun üzünü qara örtüklə gizlətməyə çalışıblar.
Jurnalistlərin “niyə həbs olundunuz?” sualına İbadoğlu qısaca belə cavab verə bilib: “Bu, İlham Əliyevin sifarişidir”.
Bundan sonra İbadoğlunu aparıblar. Onun vəkilləri də onun ardınca gediblər.
Siyasətçini 8 ildən 12 ilə qədər həbs gözləyir
Həmin gecə məlum olub ki, Qubad İbadoğlu Cinayət Məcəlləsinin 204.1-ci (saxta xarici valyutanın satış məqsədi ilə hazırlaması, əldə edilməsi və ya satışı) maddəsində nəzərdə tutulan əməlləri törətməkdə şübhəli şəxs kimi istintaqa cəlb edilib. Azərbaycan Cinayət Məcəlləsinin. Bu barədə də onun qızı Jalə Bayramova məlumat verib.
Onun sözlərinə görə, İbadoğlu Daxili İşlər Nazirliyinin Mütəşəkkil Cinayətkarlıqla Mübarizə Baş İdarəsinin (BCMBİ) zirzəmisində saxlanılır.
İyunun 24-də isə günortadan sonra məlum olub ki, istintaq müxalif siyasətçiyə qarşı ittihamı ağırlaşdırıb, ona qarşı Cinayət Məcəlləsinin 204.3.1-ci (eyni əməllər mütəşəkkil dəstə tərəfindən törədildikdə) maddəsi ilə ittiham irəli sürülüb.
İstintaq orqanı İbadoğlu barəsində həbs qətimkan tədbirinin seçilməsi ilə bağlı Nərimanov Rayon Məhkəməsinə təqdimat verib. Bu barədə vəkil Zibeydə Sadıqova məlumat verib. Məhkəmə onun barəsində 3 ay 26 gün müddətinə həbs qətimkan tədbiri seçib.
Əgər 204.1-ci maddə ilə İbadoğlunu 5 ildən 7 ilədək azadlıqdan məhrumetmə cəzası gözləyirdisə, 204.3.1 maddəsi ilə o, 8 ildən 12 ilə qədər cəza ala bilər.
DİN-in iddiasına görə İbadoğlu FETÖ ilə əlaqədə şübhəli bilinir
Azərbaycan Daxili İşlər Nazirliyi məlumat yayıb ki, Qubad İbadoğlu ABŞ-da yaşayan din xadimi Fətullah Gülənin rəhbərlik etdiyi, Türkiyədə terrorçu təşkilat elan edilmiş FETÖ ilə əlaqədə şübhəli bilinir.
DİN-dən verilən açıqlamaya görə, Türkiyə DİN-dən daxil olan məlumat əsasında FETÖ ilə əlaqəsi olan şəxslərə qarşı əməliyyat keçirilib, 5 nəfər saxlanılıb. Onlardan biri İbadoğlu ilə əlaqələrinin olduğuna dair ifadə verib.
“Bu ifadələr əsasında Qubad İbadoğlunun iş otağında axtarış aparılıb, işə aidiyyəti olan sənədlər aşkarlanıb, İbadoğlu saxlanılıb. Hazırda istintaq tədbirləri davam etdirilir”, – deyə Daxili İşlər Nazirliyindən bildirilib.
Qubad İbadoğlunun saxlanılmasına səbəb FETÖ işi üzrə saxlanılan şəxslərdən birinin – Anar Əliyevin siyasətçinin “ona dollar verdiyi” haqda ifadəsi olub. Bu barədə jurnalistlərə vəkil Zibeydə Sadıqova bildirib.
“İbadoğlu Anar Əliyevi tanımır”
Vəkilin sözlərinə görə, Qubad İbadoğlu bu ittihamları rədd edir. “O, Anar Əliyev adında bir adamı ümumiyyətlə tanımadığını deyir”, – Sadıqova bildirib.
Vəkil axtarışların İbadoğlunun ofisində və yaşamadığı mənzilində aparıldığını qeyd edib. İbadoğlu bildirib ki, mənzildən “aşkar” edilən 40 min dollar məbləğində pulun ona heç bir aidiyyatı yoxdur, axtarışın aparıldığı mənzil sadəcə onun adına rəsmiləşdirilib və o, həmin evdə yaşamır.
“Qubad İbadoğlu uzun müddətdir ki, Azərbaycanda yaşamır. O, ölkəyə yenicə gəlib. Bu pulların Qubad İbadoğlu ilə heç bir əlaqəsi yoxdur. Biz buna etiraz edib, protokola öz iradlarımızı yazdırdıq”, – deyə vəkil bildirib.
İbadoğlunun qardaşı Qalib Bayramov bildirib ki, iyulun 23-də səhər saatlarında göstərilən mənzilin qıfıllarından birini açıb içəri daxil ola bilməyib. “Qapı iki açarla açılır. Yuxarını açdım, aşağısı isə açılmadı. Zəng edib Qubada xəbər verdim. Dedi ki, günorta özü gələcək. Fikirləşdim ki, yəqin mənim dublikat açardır, ona görə ilişir.
Hesab edirəm ki, cinayət ittihamını əsaslandırmaq üçün pul mənzilə əvvəlcədən qoyulub. Qubadın FETÖ ilə heç bir əlaqəsi yoxdur. Qubad vətənini sevən insan, vətənin rifahı üçün çalışan ləyaqətli vətəndaşdır”, – deyə qardaşı bildirib.
“Səbəblərdən biri Azərbaycan Gənclərinin Təhsil Fondudur”
İbadoğlu siyasi fəaliyyətlə yanaşı, iqtisadçı kimi də tanınır. O, son illərdə xaricdə yaşayır, Rutgers University və London İqtisadi və Siyasi Elmlər Məktəbi kimi təhsil ocaqlarında dərs deyir.
O, hakimiyyətin ünvanına, xüsusən də insan haqlarının pozulmasına və korrupsiyaya görə kəskin tənqidlər səsləndirir.
Bu yaxınlarda İbadoğlu Böyük Britaniyada Demokratik Qüvvələrin Milli Şurasının rəhbəri, professor Cəmil Həsənli və Avropada siyasi mühacirətdə olan keçmiş diplomat Arif Məmmədovla birgə “Azərbaycan Gənclərinin Təhsil Fondu”nu yaradıb.
İbadoğlu Azərbaycan məmurlarının xaricdəki əmlaklarının müsadirə edilməsi və bu vəsaitlərin həmin fonda köçürülməsi təşəbbüsü ilə çıxış edib.
Qubadoğlu fondun missiyası barədə iyulun 11-də Facebook səhifəsində yazıb. Bundan sonra onların hər üçü hökumətyönlü internet resurslarında hücuma məruz qalıb.
“Qubadoğlu siyasi fəaliyyətinə görə cəzalandırılır”
Azərbaycanda vətəndaş cəmiyyəti fəalları və müxalif siyasətçilər ADR Partiyasının sədri Qubad İbadoğlunun hakimiyyət tərəfindən təqibini pisləyib.
“Müdafiə Xətti” hüquq müdafiə təşkilatının rəhbəri Rüfət Səfərov hesab edir ki, Qubad İbadoğlunun cinayət təqibi siyasi xarakter daşıyır.
“Qubad İbadoğlu uzun illərdir ki, hakimiyyətin sosial-iqtisadi siyasətini tənqid edən görkəmli iqtisadçı alimdir. Eyni zamanda əsas müxalifət partiyalarından birinin lideridir”, – Səfərov qeyd edib.
O, Daxili İşlər Nazirliyinin İbadoğluna qarşı ittihamlarının səhihliyinə şübhə ilə yanaşıb.
“İbadoğlunun FETÖ ilə əlaqələndirilməsi, ofisindən 40 min dolların “tapılması” absurddur. Biz prosesi yaxından təqib edib, qiymətləndirməni davam etdirəcəyik. İbadoğlu savadlı adamdır, ziyalıdır, heç vaxt kriminalla əlaqə qurmaz, üstəlik, müşahidə altında ola biləcəyini düşünərək. Prosesi yaxından izləyəcəyik”, – ”, hüquq müdafiəçisi qeyd edib.
Azərbaycan Xalq Cəbhəsi Partiyasının sədri Əli Kərimli hesab edir ki, tanınmış siyasətçi və alim Qubad İbadoğlunun həbsi “siyasi repressiya aktıdır”.
“Hakimiyyət müxalifətə qarşı repressiyalara son qoymalıdır”, – Kərimli Facebook-da yazıb.
Demokratik Qüvvələrin Milli Şurasının sədri Cəmil Həsənli Qubad İbadoğlunun saxlanılmasını «rejimin rüsvayçı addımı» adlandırıb.
“Gubad İbadoğlu ölkənin ən işıqlı ziyalılarından, ictimai-siyasi xadimlərindən biridir. Professor İbadoğlu Demokratiya və Rifah Hərəkatının lideridir, dünyada tanınmış alimdir, London İqtisadiyyat Məktəbi, ABŞ-ın Duke və Rutqers iniversitetlərinin professoru olub. İqtisadiyyat üzrə ən nüfuzlu beynəlxalq tədbirlərdə ölkəni təmsil edib. O, Hasilat Sənayesində Şəffaflıq üzrə beynəlxalq koalisiyada Azərbaycan vətəndaş cəmiyyətinin yeganə nümayəndəsi olub. Qubad İbadoğlunun polis əməkdaşları tərəfindən saxlanılması, sadəcə, rüsvayçılıqdır. Hakimiyətin nə deməsindən asılı olmayaraq şübhəsiz ki, baş verənlər İbadoğlunun müxalif siyasi mövqeyi və BİZ-tv-dəki (İbadoğlunun ictimai-siyasi və sosial-iqtisadi problemlərlə bağlı müntəzəm çıxış etdiyi YouTube kanalı) çıxışları ilə bağlıdır”.
