Milyarderin hobbisi nə dərəcədə ziyansızdır? Çoxillik ağacların köçürülməsilə bağlı küçə sorğusu

Keçmiş baş nazir Bidzina İvanişvili yüzillik ağacları Gürcüstanın Qara dəniz sahillərindən öz şəxsi dendroparkına köçürməyə davam edir.

Müxtəlif məlumatlara görə, Urekidən 20-ə qədər nəhəng ağac köçürülüb. Proses davam edir.

Bir neçə gün əvvəl İvanişvilinin Ozurqets rayonunun Natanebi kəndində Xurmava ailəsindən 5 min dollara satın aldığı 250 yaşlı fıstıq ağacı köçürülməyə tab gətirməyib ortadan parçalandı. Yerli məktəbdə rəsm müəllimi olan Lado Xurmava deyir ki, ağaca baxmaq üçün şəxsən İvanişvili özü onun həyətinə gəlib və ağacı dərhal bəyənib.

“Yanında əcnəbi ekspertlər də vardı, onlar dedilər ki, ağac köçürülməyə tab gətirməyə və ya yeni yerə kök salmaya bilər, amma İvanişvili yenə də öz bildiyi kimi elədi”, – Xurmava deyir.

Yarıya parçalanmış 250 illik fıstıq bir neçə gün yolu kəsib. Sonra onu doğrayıb odun eləyiblər.

Bidzina İvanişvilinin rezidensiyası Qara dəniz sahilində Quriyada, Daba Şekvetelidə yerləşir. Məhz orada o dendropark yaratmaq qərarına gəlib. Və məhz bu park üçün çoxillik ağacları toplayır.

Bir neçə ağacı İvanişvili fərdi şəxslərdən alıb, amma çoxillik ağacların çoxunu Tsixisdzir dövlət parkından köçürüb.

Ekoloqlar həyəcan təbili çalır – proses təhlükəli hal alıb, çünki parkda ağaclar çıxarılandan sonra nəhəng çuxurlar qalır, torpaq zədələnir, bu da ətraf mühit üçün təhlükə yaradır.

“Bir santimetr münbit torpağın əmələ gəlməsi üçün yüz ilə yaxın vaxt lazımdır, bu halda isə əsrlik ağaclar yerindən çıxarılanda torpaq yararsız hala düşür”, – bioloq İrakli Maçaraşvili “Rustavi-2” telekanalına müsahibəsində bildirib.

Maçaraşvili vurğulayır ki, Gürcüstan qanunvericiliyinə əsasən ətraf mühitə 1000 laridən böyük həcmdə ziyan vurulubsa cinayət məsuliyyəti ortaya çıxır. Ağacların çıxarıldığı yerlərdə isə dəyən ziyan daha böyükdür.

Ətraf Mühitin Mühafizəsi naziri Qiqla Aqulaşvili vəziyyəti fərqli dəyərləndirir. Onun sözlərinə görə, milyarder qanun çərçivəsində hərəkət edir, buna görə də nazirlik Tsixisdziri ərazisini təftiş etməyib. “Bu, ancaq hansısa pozuntular qeydə alındığı halda baş verəcək”, – nazir deyir.

Tsixisdziridən başqa Çakvada da dövlət ərazisində onlarla ağac məhv edilib. Burada aparılan iş zamanı sahil mühafizə dambası zədələnib və dənizə çıxan yeganə yol bağlanıb.

Bidzina İvanişvilinin özü bir neçə ay əvvəl “İmedi” telekanalına müsahibəsində nəhəng ağaclara qarşı zəifiyyəti olduğunu, bunun onun hobbisi olduğunu etiraf etmişdi.

“Bu mənim hobbimdi, nəhəng ağaclar çox xoşuma gəlir”, – İvanişvili bildirib.

650 ton çəkisi olan nəhəng zanbaq ağacı İvanişvilinin dəniz yolu ilə Acariyadan Urekiyə gətizdirdiyi ilk ağac olub. Müxtəlif məlumatlara görə, İvanişvili Urekiyə 20-ə yaxın nəhəng ağac köçürüb. Onları ağır texnika ilə dəniz sahilinə gətirirlər, sonra isə xüsusi barjada dəniz yolu ilə Urekiyı çatdırırlar.

Əsrlik ağacların keçmiş baş nazirin parkına köçürülməsi prosesində:

– Batumi-Kobuleti yolunda hərəkət çətinləşir;

– dəmiryolunda hərəkət dayanır, çünki nəhəng ağacların köçürülməsi zamanı bəzən dəmiryolu laylarını müvəqqəti olaraq sökmək və elektrik təchizatını dayandırmaq lazım gəlir;

– nəhəng ağacların köçürülməsi üçün istifadə olunan ağır texnikanın işinə mane olan yüzlərlə digər ağac məhv edilir;

– ağır texnikanın yaxınlaşması üçün meşədə beton yollar quraşdırılır;

– kökündən çıxarılan əsrlik ağacların yerində iri çuxurlar qalır, bərpa edilməyən torpaq zəmin korlanır.