“Melissa Park” insidenti: Qışqırdım ki, bizi öldürürlər, köməyə gəlin, heç kim yaxınlaşmadı. Video

“Melissa Park” insidenti həbslərlə yekunlaşdı

Bakının Yasamal rayonu, Birinci Alatava ərazisinin sakinləri martın 27-də onlar içəridə ola-ola evdə söküntü işlərinin aparıldığını deyirlər. Ərazidə yaşayan 3 mərtəbəli evin sahibi Elarə Hacıyevanın sözlərinə görə, söküntü zamanı xəsarət alanlar olub:

“Sürücüyə qışqırdım ki, evdəyik, evin içindəyik, uçurma, amma məhəl qoymadı”.

Hacıyeva deyir ki, “Melissa Group” 3 ildir tikinti aparır və şirkətlə problemləri ötən ilin avqustundan yaranıb. Hətta evə evə zərər vurulması da ilk dəfə deyil. Sakinin sözlərinə görə, şirkət dəfələrlə onların işığını kəsib, aparılan söküntü nəticəsində evin pilləkənləri və kanalizasiya sistemi dağıdılıb.

Elarə Hacıyeva son baş verən hadisəni təsvir edərkən deyir ki, ekskavator sürücüsünə dəfələrlə evdə adam olması ilə bağlı xəbərdarlıq edib.

“Sürücü başını qaldırdı və üzümə baxdı, həmin anda divarı uçurdu. Divarın uçuntusu bacımın qoluna düşdü. Daha sonra isə şüşə qırıqları töküldü və mənim biləyimi doğradı. Mən özümü çölə atdım və aşağı düşdüm ki, söküntünü dayandırım”, – deyə, ev sahibi qeyd edir.

Onun sözlərinə görə, məsələ ilə bağlı aidiyyəti qurumlara dəfələrlə şikayət ediblər, hətta şirkətlə məhkəmə çəkişmələri hələ də davam edir. Elarə Hacıyeva deyir ki, martın 19-da Yasamal Rayon Məhkəməsi evin sökülməsi və başqa texniki müdaxiləni qadağa edib.

Daxili İşlər Nazirliyindən bildirilib ki, faktla bağlı cinayət işi açılıb, şirkətin rəhbəri və iş icraçısı, həmçinin ekskavator sürücüsü saxlanıb.

Dövlət Şəhərsalma və Arxitektura Komitəsi söküntü işlərinin müvafiq icazə olmadan aparıldığını müəyyən edib və söküntü dayandırılıb.

“Melissa Group” şirkətindən münasibət öyrənmək mümkün olmayıb.