“Russia Today” və “Sputnik” agentliyinin rəhbəri Ermənistanı anti-Rusiya mövqeyində günahlandırıb
Uzun illərdir ki, Rusiyanın təbliğat ruporu olan “Russia Today” telekanalının rəhbəri Marqarita Simonyan iyulun 18-də Ermənitanın ünvanına ittiham səsləndirib. O, ermənilərə “yanıçarların xəncərini” xatırladıb və Rusiyaya qarşı minnətdarlıq tələb edib.
Ermənistanda onun bu paylaşımı qızğın müzakirələrə, əsasən qəzəb və narazı reaksiyalara səbəb olub.
Telegram kanalında o, bildirib ki, ona ünvanlanan çox sayda Ermənistan-Azərbaycan sərhədində baş verən hadisələrlə bağlı “mövqeyini açıqla” təklifinə cavab verir.
8 500 Azərbaycan vətəndaşı könüllü hərbi xidmətə yazılıb; Ermənistanda Azərbaycanın Metsamor atom elektrik stansiyasını bombalamaq ehtimalı müzakirə olunur
Simonyan bircə ad belə çəkməyib.
Ehtimal olunur ki, Marqarita Simonyan etnik erməni olduğu üçün Ermənistan sakinləri ona bu sorğu ilə müraciət ediblər.
Amma Simonyan heç vaxt Ermənistanda yaşamayıb. O, Rusiyanın Krasnodar şəhərində anadan olub, Soçidə yaşayıb, ABŞ-da təhsil alıb. Daha sonra Moskvaya köçüb və Rusiya Dövlət Televiziyasında karyera qurmağa başlayıb.
Simonyan mütəmadi olaraq müxtəlif qalmaqalların qəhrəmanına çevrilir.
Bu yaxınlarda rusiyalı müxalifətçi Aleksey Navalnı “Parazitlər” adı altında dərc etdiyi araşdırmada Marqarita Simonyan və qohumlarının onun “Russia Today” kanalındakı liderliyindən yararlanaraq irimiqyaslı büdcə vəsaitlərini talamaqla məşğul olduqları haqda bəhs edib.
Ardıcıllıq: 1) Marqarita Simonyanın ittihamları və arqumentləri, 2) Ermənistan cəmiyyətinin reaksiyası.
“Russia Today” rəhbəri: “Sizin bütün elədiklərinizdən sonra Rusiyanın tam haqqı var ki, sizə tüpürsün və əzsin”
“Mən Ermənistan hakimiyyətinə müraciət edirəm. Məhz hakimiyyətinə, mənim də bir hissəsi olduğum xalqına yox.
Yalnız ona görə müraciət edirəm ki, sizin internet-qoşunlarınız “mövqeyimi bildirmək” tələbi ilə (kobud və aqressiv formada) mənim sosial şəbəkələrimə daraşıblar.
İstəyirdiz – bildirirəm.
Özünüzə kənardan baxın. Baxın, görün nə oyun çıxarırsız. Özünüzü necə aparırsız. Siz necə ermənisiz? […]
Uzun illər Rusiyadan aldığınız xeyirxahlığa və müdafiəyə cavab olaraq siz Krımı tanımadız. Çünki bu, Ermənistanın daxili işidir.
Sırf siyasi qisas naminə Rusiyanın dəyişməz müttəfiqi Robert Koçaryanı [Ermənistanın eks-prezidenti] həbs etdiz. Qəsdən, nümayişkaranə həbs etdiz və bununla da “rusiyalı dostlarınızın” üzünə tüpürdünüz. Çünki bu, Ermənistanın daxili işidir.
Siz ölkəni anti-Rusiya QHT-ləri ilə doldurmusuz, hansılar ki, sizin ərazinizdə gənclərə Rusiya hakimiyyətini devirməyin yollarını öyrədirlər. Siz Qafqazda anti-Rusiya meydanı yaratmısız. Çünki bu, Ermənistanın daxili işidir.
Siz rusiyalı erməni biznesmenləri qovdunuz. Siz Rusiya ilə bağlı olan heç nəyi istəmirsiz. Çünki bu, Ermənistanın daxili işidir.
Sizin media və sosial şəbəkələr hər saat başı Rusiyanı, Putini, Putini dəstəkləyən hər kəsi çirkaba batırırlar – xüsusən də rusiyalı erməniləri (məsələn, məni). Siz bədbəxt, onsuz da yox olmaq üzrə olan erməni xalqını düşmənlərə – rusiyalı ermənilərə və “əsl” – sizin hazırkı hakimiyyətinizi dəstəkləyən ermənilərə parçalamısız. Çünki bu, Ermənistanın daxili işidir.
İndi isə sizin sərhədinizdə müharibə getdiyi zaman, sizin rejiminizin mövcudluğu təhlükə altında olduğu zaman, bütün dünya erməniləri artıq əcdadlarımızı qıran əyri xəncərli yanıçarların kabusunu gördükləri zaman sizin yadınıza düşüb ki, Rusiya yenə də sizi xilas etməlidir.
Məgər bu, Ermənistanın daxili işi deyil?
Son illərdə sizin Rusiyaya qarşı ifadə etdiyiniz bütün şər və içində boğulduğunuz nifrətdən sonra sizin informasiya qoşunlarınız və siz özünüz özünüzdə yardım gözləmək haqqı görürsüz?
Əslində sizin bütün elədiklərinizdən sonra Rusiyanın mənəvi haqqı çatır ki, sizə tüpürsün və əzsin.
Amma o, belə etməyəcək. Mən əminəm. Bu dəfə də kömək edəcək.
Çünki Rusiya belədir. Böyük ürəkli və xeyirxah, sevimli Vətənim mənim.
Siz isə hakimiyyət məqamı və cılız şəxsi qisasınız naminə erməni xalqının maraqlarını satan bir ovuc fəryad edən siyasətçilərsiz”.
Ermənistan cəmiyyətinin reaksiyası
Müzakirələr sosial şəbəkələrdə başlanıb və davam edir. “Russia Today” rəhbəri daha sonra öz bəyanatına əlavə edib ki, “Ermənistandakı bir çox nüfuzlu şəxslər” onun sözlərinin altına imza atmağa hazırdır. Amma sosial şəbəkələr daha çox kəskin tənqidi şərhlərlə qaynayır.
İki xarakterik şərh:
Laura Baqdasaryan, “Region” tədqiqat mərkəzinin direktoru:
“Sual 1. RT telekanalının və […] “Sputnik” informasiya agentliyinin baş redaktoru Marqarita Simonyanın Ermənistanın ünvanına kobud ifadələrini və təhdidlərini Rusiyanın adı çəkilən informasiya resurslarının rəsmi mövqeyi hesab etmək olarmı?
Sual 2. Redaktoru Ermənistan və hakimiyyətini əzmək lazım olduğunu hesab edən “Sputnik-Ermənistan”ın Ermənistan ərazisində fəaliyyətinin qarşısını almaq lazımdırmı?”
Arman Darbinyan, Ermənistan Rus (Slavyan) Universitetinin rektoru:
“Ermənistan hakimiyyətinə müraciət edərək Siz ona qarşı açıq nifrətinizi ifadə edirsiz. Qeyd etmək istəyirəm ki, yaxşı, ya pis olsa da, bizim, Ermənistan xalqının seçdiyi hakimiyyətdir və Ermənistan xalqı öz hakimiyyətinə qarşı hörmət tələb edir. […] Hakimiyyətə nifrət edərək Siz hazırda […] özünüzü də səhvən aid etdiyiniz xalqa nifrət edirsiz”.
