“Məhkəmə iclası açıq-aşkar fars çevrilib”: Ruben Vardanyan vəkilindən imtina edib
Ruben Vardanyan vəkildən imtina edib
İri biznesmen və xeyriyyəçi, keçmiş tanınmamış “Dağlıq Qarabağ Respublikası”nın sabiq dövlət naziri Ruben Vardanyan hazırda Bakıda məhkəmə qarşısına çıxarılıb və ona təyin olunmuş vəkilin xidmətlərindən imtina edib. Azərbaycan mediasının məlumatına görə, oktyabrın 21-də keçirilən növbəti iclasda məhkəmə onun bu vəsatətini təmin edib.
Ertəsi gün Vardanyan vəkildən imtinanın səbəbləri barədə ailəsi vasitəsilə açıqlama yayıb:
“Bu qərar məcburi idi. Mövcud proses zamanı beynəlxalq və Azərbaycan məhkəmə hüququnun norma və prinsiplərinin kobud şəkildə pozulması iclasları açıq-aşkar farsa çevirdi. Bu şəraitdə son aylarda müdafiə üçün bütün prosessual imkanlar tükənib”.
Vardanyanın işi Bakının Hərbi Məhkəməsində araşdırılır, baxmayaraq ki, o, heç vaxt hərbi vəzifə tutmayıb. Məhkəmə prosesinə müstəqil media və beynəlxalq təşkilatların nümayəndələri buraxılmır. Dollar milyarderi ona qarşı irəli sürülən ağır ittihamlar üzrə ömürlük həbs cəzası ilə üzləşə bilər.
Rəsmi məlumata görə, Azərbaycanda 23 erməni hərbi əsir saxlanılır. Onların arasında keçmiş tanınmamış “Dağlıq Qarabağ Respublikası”nın hərbi və siyasi rəhbərliyi də var. Onların məhkəmə prosesi artıq 8 aydır davam edir. Erməni hüquq müdafiəçiləri “erməni əsirlərin Bakıda saxta ittihamlarla mühakimə olunduğunu” bildirirlər.
“Erməni əsirlərin son ümidi ölür”: BQXK-nın Bakı ofisi bağlanır
“Ermənistan və Bakı arasında sülh mümkündür, amma zəmanət verilmir” – Tomas de Vaal
Yerevanda Azərbaycan və Ermənistan QHT-lərinin görüşü: sülh dialoqu, yoxsa simvolika?
“Mənə müdafiə illüziyası lazım deyil”
Ruben Vardanyanın Facebook səhifəsində “vəkilin fəaliyyət şəraiti və hüquq normalarının pozulması səbəbindən vəkildən imtina” ilə bağlı şərh dərc olunub. Həbsdə olan Vardanyan paylaşımında vəkildən imtina qərarını ətraflı izah edib:
“Mənə işin materialları və ittiham aktı ilə tanış olmaq imkanı verilməyib. İş materiallarına çıxış bu günə qədər bağlıdır. Mən 422 cildlik işimlə tanış ola bilmirəm, məhkəmə əsas prosessual sənədlərin rəsmi tərcüməsini təqdim etməyib”.
O vurğulayıb ki, məhkəmədə özünü müdafiə etmək imkanı da əldə etməyib, çünki:
- “Mən məhkəmə iclaslarına hazırlıq məqsədilə vəkilimlə sənədləri maneəsiz və əvvəlcədən yoxlanılmadan mübadilə edə bilmirdim və audio-video materiallara çıxışım yox idi.
- Bütün əvvəlki vəsatətlərim istintaq orqanları və məhkəmə tərəfindən nəzərə alınmadı. Ədalətli proses üçün vacib olan vəkilin əsas müraciətləri də cavabsız qaldı.
- Vəkildən imtina etməyimin başqa bir səbəbi də qurama məhkəmə prosesinə etiraz idi. Məhkəmə işi aydınlaşdırmaq və müdafiə üçün vacib faktları təsdiqləmək üçün şahidlərin çağırılması barədə vəsatəti təmin etmədi, bununla da prosesi obyektivlik və ədalətlilik əlamətlərindən tam məhrum etdi”.
Bundan əlavə, Vardanyan qeyd edib ki, vəziyyət zaman keçdikcə daha da pisləşib:
“Bu absurd teatrında vəkilin rolu istək və səylərindən asılı olmayaraq, məhkəmə prosesinin qanuniliyinə yalnız zahiri görünüş verməklə məhdudlaşır. Mən bu farsa qatılmaqdan imtina edirəm. Mənə müdafiə illüziyası lazım deyil, mən prosessual hüquqlarımın real təminini tələb edirəm”.
Hüquq müdafiəçilərinin bəyanatı
Bakıda artıq 2020-ci ilin 44 günlük müharibə və 2023-cü ilin sentyabr hərbi əməliyyatları nəticəsində Azərbaycanda həbsdə olan bir sıra ermənilər barəsində hökm çıxarılıb. Onlardan biri, 2020-ci il noyabrın 10-da, hərbi əməliyyatlar dayandırıldıqdan sonra Qarabağ ərazisində saxlanılan Vigen Eulcekcyan olub. 2021-ci il iyunun 14-də Bakı Hərbi Məhkəməsi onu “muzdlu döyüşçü” və “terrorçu” olmaqda ittiham edərək 20 il azadlıqdan məhrum edib.
Bir qrup xarici hüquq müdafiəçisi bəyanatla çıxış edib. Onlar Eulcekcyanının saxlanılmasını və məhkum olunmasını “əsassız və insan hüquqlarının pozulması” adlandırıblar.
Argentina vətəndaşı Mariya Luçiana Minasyan və İspaniyadan Aytor Martines Ximenez BMT-nin Əsassız Həbslər üzrə İşçi Qrupuna (UNWGAD) müraciət edərək Vigen Eulcekcyanının dərhal azadlığa buraxılmasını tələb ediblər.
Hüquq müdafiəçiləri vurğulayırlar ki, 46 yaşlı bələdçi Vigen Eulcekcyana “muzdlu döyüşçü” ittihamı irəli sürülə bilməz. O, ermənidir və Ermənistan vətəndaşıdır. Bundan əlavə, hərbi məhkəmələrin mülki şəxslər üzərində yurisdiksiyası yoxdur. Buna baxmayaraq, Eulcekcyan Bakı Hərbi Məhkəməsinin qərarı ilə məhkum edilib.
Ermənistan hakimiyyətinin məhbusların geri qaytarılması istiqamətində səyləri “hər zaman aydın və effektiv deyil”
Avqustun 8-də Vaşinqtonda Ermənistan və Azərbaycan liderləri ABŞ prezidentinin vasitəçiliyi ilə mühüm razılaşmalara nail olublar. Həmin gün erməni məhbusların azad olunması imkanının da müzakirə olunduğu bildirilir. Sosial şəbəkələrdə Donald Trampın Ermənistanın baş nazirinə “Prezident Əliyevdən 23 erməninin azadlığa buraxılmasını xahiş edəcəyinə” söz verdiyi videomaterial yayılmışdı. Lakin bu məsələ ilə bağlı hələlik heç bir irəliləyiş müşahidə olunmur.
Ermənistanın baş naziri Nikol Paşinyan vaxtaşırı bəyan edir ki, məhbusların azad edilməsi istiqamətində işlər “gündəlik rejimdə” aparılır. O, mövzunun “həddindən artıq həssas olması” səbəbindən əlavə məlumat verə bilmədiyini izah edib.
Ermənistan xarici işlər naziri Ararat Mirzoyan da bu yaxınlarda jurnalistlərə açıqlamasında bildirib ki, Şarm əl-Şeyxdə keçirilən “Sülh Sammiti” çərçivəsində azərbaycanlı həmkarı ilə görüş zamanı ermənilərin azad olunması məsələsini müzakirə edib:
“Gündəlik aparılan iş hər zaman aydın və effektiv olmur. Ümidvaram ki, yaxın vaxtlarda yaxşı xəbərlər alacağıq. Ümid edək ki, səylərimiz tezliklə nəticə verəcək”.
Rəsmi optimizmə baxmayaraq, hüquq müdafiəçiləri mütəmadi olaraq erməni məhbusların vəziyyəti ilə bağlı narahatedici məlumatlar paylaşırlar. Onların sözlərinə görə, vəziyyət Azərbaycan Beynəlxalq Qırmızı Xaç Komitəsinin ofisinin bağlanmasından sonra daha da ağırlaşıb: “erməni əsirlər tam təcrid vəziyyətində qalıblar”.
Ruben Vardanyan vəkildən imtina edib
