Azərbaycanda məhkumlar artıq məzuniyyətə buraxılırlar
Məhkumlar məzuniyyətdə
Azərbaycanda ilk dəfə məhkumlar məzuniyyət üçün evə buraxılıblar. Penitensiar Xidmətdən verilən məlumata görə, qapalı cəzaçəkmə müəssisələrində saxlanılan məhkumlar sərbəst şəkildə ailə üzvlərinin yaşadığı ünvanlara bir neçə günlük qısamüddətli ziyarətə gediblər.
Məzuniyyət zamanı məhkumları həbsxana əməkdaşları müşayiət etməyib, məhkumlar yaxınları ilə görüşüb, təqribən 7-8 gün onlarla birlikdə vaxt keçirdikdən sonra yenə özləri sərbəst şəkildə saxlanıldıqları həbsxanalara geri qayıdıblar.
“İndiyədək səkkiz nəfər məhkum ailə üzvlərini ziyarət edib və geri qayıdıb”, – deyə Penitensiar Xidmətdən bildirilib.
- Aktivistlər hüquq-mühafizə orqanlarında zorakılığa məruz qaldıqlarını deyirlər
- Zelenski Ukraynanın Abxaziyadakı Rusiya hərbi gəmilərinə hücum edəcəyini təsdiqləyib
- “İnanırdıq ki, qayıdacaq”. İtkin düşmüş azərbaycanlı hərbçinin nəşi 30 il sonra tapılıb
Əvvəllər məhkumlar ancaq doğmalarının dəfninə buraxılırdılar
İndiyə qədər məhkumlar ancaq birinci dərəcədən olan qohumları öldüyü təqdirdə onların dəfn və yas mərasimlərinə buraxılırdılar. Bu zaman onlar mütləq şəkildə Penitensiar Xidmətin əməkdaşları müşayiət edirdi.
Siyasi motivli həbslər zamanı bu məsələ həmişə xüsusi olaraq diqqət mərkəzinə gəlib. Müxalif siyasətçi Tofiq Yaqublunun qızı vəfat etiyi zaman onun dəfn mərasiminə buraxılması üçün Penitensiar Xidmətə bir neçə dəfə müraciət edilmişdi.
Oxşar hal bloqer Mehman Hüseynov anasını itirdiyi zaman da yaşanmışdı.Həmin vaxtlarda Penitensiar Xidmət müraciətlərə cavabı ləngitsə də, sonda adı çəkilənlər öz doğmalarının dəfnində iştirak edə bilmişdilər.
Amma bəzən məhkumların öz yaxınının dəfnində iştirakına icazə verilmədiyi də olurdu. Məsələn, ötən əsrin 90-cı illərində Meydan Hərəkatının liderlərindən biri olmuş Nemət Pənahlı 2013-cü ildə həbsdə olduğu zaman anası vəfat etmiş və çoxsaylı müraciətlərə rəğmən onun dəfndə iştirakına icazə verilməmişdi.
Yeni xidmət rəisi və yeni qaydalar
Bu yeniliyin Penitensiar Xidmətə təyin olunan yeni rəis Mirsaleh Seyidovun təşəbbüsü olduğu deyilir.
“Məhkumlara məzuniyyət verilməsi Penitensiar Xidmətdə ilk haldır. Bundan başqa, yeni təyin olunmuş xidmət rəisi Mirsaleh Seyidovun tapşırığı ilə çoxsaylı yeniliklər tətbiq olunub. Yeni çağrı mərkəzi yaradılıb, sosial şəbəkə hesabları istifadəyə verilib, təcridxanalarda və cəzaçəkmə müəsissələrində korrupsiya halları ilə mübarizə sərtləşdirilib”, – Penitensiar Xidmətdən “Bakı Xəbər”ə verilən məlumatda deyilir.
46 yaşlı Mirsaleh Seyidov bu ilin iyul ayında ədliyyə nazirinin müavini, Penitensiar Xidmətin rəisi vəzifəsinə təyin edilib. Buna qədər o, Penitensiar Xidmətin Əməliyyat-rejim İdarəsinin rəisi vəzifəsində çalışıb. 2009-cu ildən 2016-cı ilə qədər isə 15 və 10 saylı cəzaçəkmə müəssisəsinin rəisi olub.
Əvvəlki vəzifələrində çalışdığı müddətdə məhkumlar və onların yaxınları arasında ədalətli, qanuna hörmət edən məmur kimi tanınıb. Vəzifəyə təyin edildiyi zaman hətta hüquq-müdafiəçilərinin siyasi məhbus hesab etdiyi şəxslərin yaxınları və keçmiş siyasi məhbusların özləri Seyidovla bağlı xoş təəssüratlarını sosial şəbəkələrdə paylaşıblar.
“Məzuniyyətə buraxılmaları məhbusların islah olunmasında müsbət rol oynayacaq”
“Müdafiə Xətti” hüquq müdafiə təşkilatının icraçı direktoru Rüfət Səfərov bu yeniliyin yaxşı nəticələr verəcəyinə inanır:
“Yas mərasimi olmadan məhbusların məzuniyyətə buraxılması bir ilkdir və təbii ki, yaxşı xəbərdir”.
Hüquq müdafiəçisi Səadət Bənənyarlı hesab edir ki, məhbusların məzuniyyətə buraxılması onların islah olunmasında müsbət rol oynayacaq:
“Gələcəkdə həmin şəxslərin cəzalarının yüngülləşməsinə də səbəb ola bilər. Məhkumlar məzuniyyətə buraxılan zaman həbsxana əməkdaşlarının müşayiət etməməsi həmin insanların öz səhvlərindən nəticə çıxarmasından xəbər verir. Öz yaxınları ilə sərbəst görüş məhkumların psixologiyasına, sağlamlığına müsbət təsir edəcək.
Qeyd etdiyim kimi, bu qayda bir sıra xarici ölkələrdə tətbiq olunur. Bizdə də tətbiq olunması ondan xəbər verir ki, ölkəmizdə məhkumların hüquqları qorunur, onların yaxınları ilə rahat, ev şəraitində görüşünə şərait yaradılır”.
