Azərbaycanda səs-küylü məhkəmə iddiaları paradı

Azərbaycanda eyni zamanda üç qalmaqallı məhkəmə iddiası haqda məlumat yayılıb. Əslində, bütün bu iddiaları birləşdirən ortaq çıxış nöqtəsi var və bu da ötən il Bakıda keçirilmiş toy məclisidir.

• Azərbaycanda toy qalmaqalı: eks-deputat və xüsusi xidmət polkovniki həbs edilib
• Azərbaycanda toy qalmaqalının əks-sədası: Saytlar Ramiz Mehdiyevin bəyanatını sildi
• Toylar qadağandır: Azərbaycanda bu nə deməkdir

Hakim Yeni Azərbaycan partiyasının funksionerlərindən biri, deputat Siyavuş Novruzovun Azərbaycan Daxili İşlər Nazirliyini, Prezident Administrasiyasının keçmiş rəhbəri, hazırda AMEA prezidenti Ramiz Mehdiyevin 15 deputatı, AMEA-nın müxbir üzvü Əlövsət Quliyevin isə AMEA prezidenti Ramiz Mehdiyevi məhkəməyə verdiyi bildirilir.

Qalmaqallı toydan sonra baş verənlər

İlk iki məhkəmə iddiası ötən ilin avqustunda uzun illər Azərbaycanda “boz kardinal” hesab olunan Ramiz Mehdiyevin nəvəsinin toyu ilə bağlıdır.

Xatırladaq ki, ölkədə koronavirus pandemiyasına görə sərt karantin tətbiq olunduğu və toylar da daxil olmaqla bütün kütləvi mərasimlərin qadağan edildiyi bir vaxtda Prezident Administrasiyasının o zamankı rəhbəri Ramiz Mehdiyevin qız nəvəsinin toy mərasimi keçirilmişdi. Sosial şəbəkələrdə həmin məclisdən video və fotolar yayılandan sonra qalmaqal yaranmış, gəlinin atası – Ramiz Mehdiyevin kürəkəni də daxil olmaqla, bir neçə nəfər inzibati həbs cəzası almış, qonaqların çoxu cərimələnmişdi.

Bunun ardınca onsuz da son zamanlar kreslosu “laxlayan” Ramiz Mehdiyev vəzifəsindən kənarlaşdırılmış və demək olar ki, dərhal Azərbaycan Milli Elmlər Akademiyasının (AMEA) prezidenti seçilmişdi. Yeni vəzifəyə gələr-gəlməz Ramiz Mehdiyev bu hadisə ilə bağlı AMEA-nın rəsmi saytında məqalə yazmışdı və qalmaqallı toy Milli Məclisdə müzakirəyə çıxarıldığı zaman onun haqqında “böhtan” və “təhqir” səsləndirən 16 nəfər deputatı məhkəmə çəkişməsi ilə hədələmişdi.

Ramiz Mehdiyev deputatlara qarşı

“Bir şəxsi, xüsusilə də vəzifəli şəxsi dövlətə xəyanətdə günahlandırmaq ciddi ittihamdır. Azərbaycan Respublikasının Cinayət Məcəlləsinin 147-ci (böhtan) və 148-ci (təhqir) maddələrinə əsasən, şəxsin şərəf və ləyaqətini ləkələyən və ya onu nüfuzdan salan məlumatları kütləvi çıxışlarda və KİV-lərdə yaymaq, habelə internet informasiya ehtiyatında şəxsiyyətin şərəf və ləyaqətini nalayiq formada qəsdən alçaltmaq azadlıqdan məhrumetmə cəzası ilə nəticələnir. Bu baxımdan bir vətəndaş kimi öz şərəf və ləyaqətimi məhkəmədə qorumaq hüququnu özümdə saxlayıram. Mənə riyakarcasına böhtan atan və təhqir edən millət vəkilləri Fəzail Ağamalı, Məlahət İbrahimqızı, Səməd Seyidov, Adil Əliyev, Musa Qasımlı, Qənirə Paşayeva, Elman Nəsirov, Hikmət Babaoğlu, Eldar Quliyev, Ülvi Quliyev, Hicran Hüseynova, Cavid Osmanov, Şahin İsmayılov, Malik Həsənov, Sevinc Hüseynova, Siyavuş Novruzov … unutmasınlar ki, proseslərin belə davam edəcəyi təqdirdə mən xüsusi ittiham qaydasında məhkəməyə müraciət etmək hüququmdan hər an istifadə edə bilərəm”, – Ramiz Mehdiyev məqaləsində yazıb.

Məqalə tez bir zamanda həm AMEA-nın rəsmi saytından, həm də onu təkrar dərc edən demək olar ki, bütün saytlardan silinib.

Amma məqalədə 16 deputatın adı çəkilsə də, qeyri-rəsmi məlumatda hazırda Ramiz Mehdiyevin 15 deputatı məhkəməyə verdiyi bildirilir. Hərçənd məlumat hələlik rəsmi təsdiqlənməyib.

Adı çəkilənlərdən biri Ana Vətən Partiyasının sədri Fəzail Ağamalıməsələ ilə bağlı bunları deyib: “Ramiz Mehdiyevin məni məhkəməyə verməsini nə təsdiq, nə də təkzib edirəm. Hələlik bu barədə bildiriş almamışam. Ramiz Mehdiyevin şikayəti üzrə məhkəmə proseslərində iştirak etməyə hazıram. Baxaq, görək, iddiası nədir, nə istəyir”.

Deputat nazirliyə qarşı

Siyavuş Novruzovun DİN-i məhkəməyə verməsi də Ramiz Mehdiyevin nəvəsinin toyu ilə əlaqədardır. Məsələ burasındadır ki, həmin toyda iştirak etdiyinə görə cərimələnənlər arasında deputat Novruzov və həyat yoldaşı, ombudsmen Səbinə Əliyeva da olub. Novruzov hesab edir ki, DİN onu cərimələməklə deputat toxunulmazlığına qəsd edib. O, bildirib ki, qanunvericiliyə görə karantin qadağalarının ona aidiyyatı yoxdur və deputatın istədiyi yerə getmək hüququ var.

“Bu məsələdə geri addım atmaq, güzəştə getmək olmaz. Avropa Məhkəməsinə qədər gedəcəyəm. Mən öz şəxsiyyətimi qoruyan adamam və heç kimə imkan vermərəm ki, mənimlə bu şəkildə davransın. Qanunsuzluq edənlərin hər biri elə qanunla cavablarını alacaqlar. Təzminat kimi 400 min manat tələb edirəm və həmin pulu şəhid ailələrinə bağışlayacağam”, – Novruzov bildirib.

Xatırladaq ki, toydan iki ay öncə bir sıra hökumətyönlü deputatlarla birgə Siyavuş Novruzov Milli Məclisdə karantin qaydalarını pozanlara qarşı cəzaların daha da sərtləşdirilməsi təklifini irəli sürmüşdü.

Amma Novruzovun bu bəyanatı KİV-də yayılandan az sonra o, fikrindən daşındığı haqda növbəti açıqlama verib. Deputat bildirib ki, iddiasını geri götürüb. Sonra isə ümumiyyətlə jurnalistlərdən xahiş edib ki, onu “siyasətə qarışdırmasınlar”.

İnstitut rəhbəri Ramiz Mehdiyevə qarşı

Üçüncü məhkəmə iddiası qalmaqalı isə AMEA daxilində baş verib. AMEA-nın müxbir üzvü, Torpaqşünaslıq və Aqrokimya İnstitutunun direktoru Əlövsət Quliyev bülletendə olduğu zaman qanunsuz olaraq işdən azad edildiyi üçün AMEA prezidenti Ramiz Mehdiyevdən məhkəməyə şikayət edib.

Onun yerinə keçmiş Dövlət Torpaq və Xəritəçəkmə Komitəsinin sədri, akademik Qərib Məmmədov təyin olunub.