Lukaşenko Moskva ilə münaqişə haqda: Rusiya Belarusun Qərbə yönələcəyindən çəkinir

Belarus prezidenti Aleksandr Lukaşenko son zamanlar Belarus və Rusiya münasibətlərində gərginliyin artdığını etiraf edib və bunu Moskvanın ölkəsinin Qərbə yönələcəyindən çəkindiyi ilə izah edib. Bu haqda Lukaşenko fevralın 3-də “Prezidentlə böyük söhbət” görüşü zamanı bildirib.

“Gərginlik ona görə yaranır ki, Rusiya Belarusun Qərbə yönələcəyindən çəkinməyə başlayıb”, – Belarus prezidenti deyib. Amma bununla belə Lukaşenko qeyd edib ki, ölkənin Qərbə yönəlməsi “razılaşdırılmış mövqedir və mənə bununla bağlı dostum Putin təkan verib”.

Lukaşenko Moskva ilə Minsk arasında neft və qaz qiymətləri ətrafında yaranan mübahisəyə də toxunub və bildirib ki, ölkə üçün Rusiya qazı olmadan çətin olacaq, “amma azadlıq, müstəqillik çox rentabellidir, heç bir məbləğlə, heç bir rəqəmlə dəyərləndirilə bilməz” və “müstəqillik, vicdanlılıq, bizim tarixi keçmişimiz həmin bu neftdən daha dəyərlidir”.

Lukaşenko həmçinin bəlli edib ki, məhz enerji daşıyıcılarının qiymətilə bağlı mübahisə Rusiya Federal Təhlükəsizlik Xidmətinin fevralın 1-dən Belarusla sərhəddə sərhəd zonasının tətbiq edilməsi haqda qərar verməsinə səbəb olub. Belarus və Rusiya Avrasiya İqtisadi Birliyinin və Kollektiv Təhlükəsizlik haqda Sazişin üzvləridir, ölkələr arasında insanların və malın azad dövriyyəsi rejimi qüvvədədir.

Lukaşünko onu da bildirib ki, Belarusda Rusiya hərbi aviasiya bazasının yaradılmasına ehtiyac yoxdur.