Londonda terror aktını Britaniya vətəndaşı törədib

Bir gün öncə Londonda hücum həyata keçirən terrorçu Britaniya vətəndaşı Xalid Məsud olub. O təkbaşına hərəkət edib. Polisin əlində yeni hazırlanan aktlar haqda məlumat yoxdur. Bu haqda parlamentdə çıxış edən Tereza Mey bildirib. Onun sözlərinə görə, terrorçu radikal islamçı olub. Bir neçə il əvvəl Britaniyanın Mİ-5 əks-kəşfiyyat idarəsi onunla maraqlanıb, amma onu “periferiya fiquru” hesab edib.

Xalid Məsud 1993-cü ildə İslamı qəbul edib.

Martın 22-də Londonda baş verən terror aktı nəticəsində 11 ölkənin vətəndaşı və 12 nəfər britaniyalı yaralanıb. Ümumilikdə yaralıların sayı 40 nəfərdir. Üç nəfər həlak olub. Terrorçunun özü güllələnib.

Bu hadisə son 12 ildə Böyük Britaniya ərazisində baş verən ən iri miqyaslı terror aktıdır.

Əvvəlcə cani maşınla Vestminster körpüsündəki piyadaları vurub, daha sonra parlamentə soxulmaq üçün polisə hücum edib.

Hadisə ilə bağlı məsuliyyəti İslam Dövləti qruplaşması öz üzərinə götürüb, amma əlaqədar olduqlarını təsdiqləyən sübut təqdim etməyib.

Bu gün Londonda, Berminqemdə və İngiltərənin başqa yaşayış məntəqələrində polis əməliyyatı nəticəsində terrorçu ilə əlaqədə şübhəli bilinən 8 nəfəri həbs edib.