“Levada-senter”in sorğusu: Rusiyalılar ən çox Böyük Vətən müharibəsindəki qələbə və Krımın birləşdirilməsi ilə fəxr edirlər

Rusiyalılar ən çox Böyük Vətən müharibəsində qazanılmış qələbə və Krımın Rusiyaya birləşdirilməsi ilə fəxr edirlər, ən çox utandıqları isə kasıblıq və rifahsızlıqdır, onlar SSRİ-nin xiffətini çəkirlər. Müstəqil “Levada-senter” ictimai fikrin öyrənilməsi təşkilatının apardığı sorğunun nəticələri belə deyir.

“Ölkəmizin tarixindəki hansı hadisələr sizdə qürur hissi oyadır?” sualının cavabında respondentlərin böyük əksəriyyəti – 83 faiz 1941-1945-ci illər Böyük Vətən Müharibəsində qazanılan qələbəni deyib. Sorğu edilənlərin 43 faizi isə “Krımın Rusiya Federasiyasının tərkibinə qaytarılması” ilə fəxr edir.

Həmçinin ölkənin kosmosun mənimsənilməsində tutduğu aparıcı rol da rusiyalıları qürurlandırır – bunu respondentlərin 41 faizi bildirib. Putin dövründə ölkənin stabilləşməsini və iqtisadi yüksəlişi ancaq 18 faiz sorğu iştirakçısı qürur mənbəyi hesab edir.

“Rusiya tarixində nədən utanırsız və nə sizi məyus edir?” sualına əksəriyyət – 54 faiz utandıqları şeyin “böyük xalq və varlı ölkənin” yaşadığı “daimi kasıblıq və rifahsızlıq” olduğunu bildirib. SSRİ-nin dağılmasının xiffətini çəkənlər 33 faizdir. Mənəviyyatın kobudlaşması, ədəbsizlik, insanların bir-birinə hörmət qoymaması 24 faizi məyus edir.

20-50-ci illərdəki repressiyalar, terror və xalqların sürgünündən məyus olanlar 22 faizdir. Qərbdən xroniki geri qalmaq 20 faizi üzür.

Sorğu 2017-ci il 20-23 yanvarda ümumrusiya şəhər və kənd əhalisinin reprezentativ seçmə üsulu ilə 48 regiondan olan 1600 insan arasında fərdi müsahibə yolu ilə həyata keçirilib.