Gürcüstan: "Xarici agentlər qanunu"na etiraz edən fəal Lazare Qriqoriadis azadlığa buraxılıb
Lazare Qriqoriadisin işi
22 yaşlı gürcü fəal Lazare Qriqoriadis aprelin 24-də Gürcüstan paytaxtı Tbilisinin Qldani rayonundakı həbsxananın qapısından çıxarkən onlarla insan tərəfindən alqışlarla qarşılanıb.
Qriqoriadis 2023-cü ilin martında hakim “Gürcü Arzusu” partiyasının ilk dəfə olaraq tətbiq etdiyi “xarici agentlər” qanununa etirazlar zamanı həbs edilib. O, polis məmuruna hücum etməkdə və əmlaka ziyan vurmaqda ittiham olunsa da, ittihamları qəti şəkildə rədd edib. Qriqoriadis 9 il müddətinə azadlıqdan məhrum edilib, lakin sonradan prezident tərəfindən əfv olunub.
“İlk növbədə, prezident Salome Zurabişviliyə təşəkkür etmək istəyirəm. Mənimlə bağlı ilkin olaraq siyasiləşdirilmiş qərar verildi. Döyüş davam edir. Mitinqlərdə görüşənədək”, – deyə Lazare Qriqoriadis jurnalistlərə bildirib.
Hazırda Tbilisidə hakim “Gürcü Arzusu” partiyasının ötən il ləğv edilən, lakin indi yenidən işə salınan “xarici agentlər haqqında” qanuna qarşı etirazlar keçirilir.
Prezident Zurabişvili Lazare Qriqoriadisi aprelin 12-də əfv edib. Lakin hakim Zviad Şaradze qərarın əsas hissəsini hazırlamaq üçün 12 gün vaxt verib, sonra isə qanunla ona ayrılmış vaxtdan maksimum istifadə edib.
“Mən inanırdım ki, bu gənc 9 il həbs cəzasına məhkum edilməməlidir. Mən əvvəldən əfv lazım olduğunu düşünürdüm. Ancaq hökm çıxarılana qədər mən heç nə edə bilməzdim”, – Salome Zurabişvili “Pirveli” telekanalının efirində bildirib.
- Aİ nümayəndəsi Gürcüstanda “xarici agentlər haqqında” qanun layihəsi ilə Aİ Direktivi arasındakı fərqi izah edir
- Gürcüstan parlamenti “xarici agentlər haqqında” qanunu birinci oxunuşda qəbul edib
- Gürcüstan müxalifəti keçmiş baş nazirin ailəsinin bu qədər pulu haradan əldə etdiyini öyrənməyi tələb edir
Lazare Grigoriadis işi
Aprelin 12-də Tbilisi Şəhər Məhkəməsinin qərarıyla 2023-cü ilin martında həbs edilən 22 yaşlı Lazare Qriqoriadis 9 il müddətinə azadlıqdan məhrum edib. Qərarı hakim Zviad Şaradze elan edib.
Qriqoriadis 2023-cü ilin mart etirazlarında həbs edilmiş yeganə iştirakçıdır.
2023-cü il martın 7-9-da Tbilisidə parlament binası yaxınlığında xarici agentlər haqqında qanun layihəsinə qarşı kütləvi mitinqlər keçirilib və Lazare Qriqoriadis də bu aksiyalarda fəal iştirak edib.
İstintaqın məlumatına görə, martın 7-də Rustaveli prospektində keçirilən aksiyada Qriqoriadis iki dəfə hüquq-mühafizə orqanlarının əməkdaşlarına molotov kokteyli atıb.
Bundan əlavə, ittiham aktına əsasən, Qriqoriadis martın 9-da polis avtomobilini yandırıb.
İstintaq onu ağır cinayətlər törətməkdə: polis əməkdaşlarının sağlamlığına zərər vurmaqda və dövlət əmlakını məhv etməkdə ittiham edib.
Lazare 22 yaşını həbsdə qeyd edib.
