Koronavirusun sürətlə yayılması üzündən “Apple” Çindəki bütün mağazalarını fevralın 9-na qədər bağlayıb
Ölümcül təhlükəli koronavirusun sürətlə yayılması ilə əlaqədar profilaktik tədbir kimi “Apple” Çindəki bütün 42 mağazasını fevralın 9-na qədər bağlayıb.
Şirkətin rəsmi Çin saytı mağazaları axtarmaq cəhdinə cavab olaraq xəbərdarlıq edir ki, onların hamısı “ictimai səhiyyə sahəsində vəziyyət və profilaktik tədbirlərlə əlaqədar” bağlıdır.
“Bloomberg” nəşrinin məlumatlarına görə, koronavirus epidemiyasına görə “Apple” şirkətinin yeni cihazların buraxılışı ilə bağlı problemləri yarana bilər – çünki “iPhone” smartfonlarının yığıldığı iki ən iri fabrik yoluxmanın ilk hallarının qeydə alındığı Uxan şəhərindən təxminən 500 kilometr aralıda yerləşir.
Bu məsafə o qədər də böyük deyil və xəstəliyin yayılma təhlükəsi burada kifayət qədər yüksəkdir, bunu “Bloomberg” yazır.
Epidemiya ilə əlaqədar aktual vəziyyətə bu onlayn-xəritədə baxmaq olar.
Hazırkı ana olan rəsmi məlumatlara əsasən, koronavirusdan ölənlərin sayı 305 nəfərdir, lakin sağalanların sayı 346-dır. Ümumilikdə isə, 14 min nəfərdən çox yoluxan var.
Eyni zamanda, koronavirus artıq ən azı 15 ölkədə də yayılıb. Ümumdünya Səhiyyə Təşkilatı Çindəki epidemiyanı fövqəladə vəziyyət elan edib.
•Azərbaycanda Çin restoranlarını böhran gözləyir?
