“Meydan TV işi” üzrə həbs edilən jurnalistlər və digər məhbuslar Bakı Apellyasiya Məhkəməsinin konvoy rəisi olduğu deyilən Cəmil Hüseynov tərəfindən fiziki zorakılığa məruz qaldıqlarını bildirirlər. İddialar bir neçə müxtəlif iş üzrə də təkrarlanır.
Bakı Apellyasiya Məhkəməsində məhkumların daşınmasına nəzarət edən konvoy rəisi Cəmil Hüseynovun “Meydan TV”nin həbsdə olan əməkdaşları Aytac Tapdıq (Əhmədova) və Aysel Umudovaya qarşı fiziki zorakılıq tətbiq etdiyi deyilir.
2024-cü il dekabrın 6-da “Meydan TV”-nin əməkdaşları Ramin Deko (Cəbrayılzadə), Aynur Qənbərova (Elgünəş), Aysel Umudova, Aytac Əhmədova (Tapdıq), Xəyalə Ağayeva, Natiq Cavadlı saxlanılıblar. Onlara qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb və barələrində açılmış cinayət işi “Meydan TV işi” adlandırılmağa başlayıb. Daha sonra bu işlə bağlı jurnalistlər Şəmşad Ağa, Nurlan Libre, Fatimə Mövlamlı, Ülviyyə Əli və Əhməd Muxtar da həbs ediliblər.
“Meydan TV” bəyan edir ki, bu həbslər onların tənqidi fəaliyyətlərinə görədir.
Aytac Tapdıq bildirir ki, 26 sentyabr tarixində apellyasiya məhkəməsinə gətirilərkən Cəmil Hüseynov onu “zorakı formada və sürətli şəkildə” koridor boyunca aparıb. Daha sonra saxlanma otağına daxil olarkən itələyib. Tapdıq qeyd edir ki, məhkəmədə həbsdə olan həmkarlarını gördüyü anda onlara səsləndiyi üçün bu münasibətlə qarşılaşıb.
Jurnalist Aysel Umudova da Bakı Apellyasiya Məhkəməsinə gətirilərkən barmağının konvoy rəisi tərəfindən əzildiyini deyir.
9 sentyabrda keçirilən digər məhkəmə iclası zamanı “AbzasMedia”nın həbsdə olan qadın əməkdaşlarına qarşı fiziki zorakılıq göstərildiyi zaman da konvoy rəisi Hüseynovun orada iştirak etdiyi bildirilir.
Səsləndirilən iddialar Hüseynovun fəaliyyətində fiziki güc tətbiqinin sistematik xarakter daşıdığına işarədir. Ədliyyə orqanları iddialara münasibət bildirməyiblər.
Həbs edilmiş jurnalistlər məhkəmə proseslərində konvoy işçilərinin davranışına nəzarətin artırılmasını, zorakılıq iddialarının obyektiv araşdırılmasını tələb edirlər.
Məsələ ilə bağlı heç bir rəsmi açıqlama verilməyib. Amma dövlət qurumları bu tip iddiaları birmənalı olaraq yalan adlandırırlar və qəbul etmirlər.
