Kobaxidze Trampa məktub yazaraq ABŞ-nin “strateji tərəfdaşlığı bərpa etmək” təklifinə niyə cavab vermədiyini soruşub
Gürcüstanın Baş naziri Kobaxidzenin Trampa məktubu
Gürcü Arzusu partiyasının Baş naziri İrakli Kobaxidze ABŞ prezidenti Donald Trampa və vitse-prezident C.D. Vansa məktub ünvanlayaraq, “iki ölkə arasında strateji tərəfdaşlığın sıfırdan bərpa olunması” təklifi ilə bağlı cavab gözlədiyini bildirib.
“Sizin susqunluğunuz Gürcü xalqını və hökumətini təəccübləndirir”, deyə Kobaxidze yazır.
Məktubda Kobaxidze ABŞ və Gürcüstan hökumətləri arasında yüksək səviyyəli heç bir əlaqənin olmamasına təəccübünü ifadə edir. Eyni zamanda ABŞ-nin Gürcüstan rəsmilərinə qarşı tətbiq etdiyi sanksiyaların səbəblərinin “aydın olmadığını” qeyd edir. O bildirir ki, həmin şəxslər ABŞ Beynəlxalq İnkişaf Agentliyinin (USAID) dəstəyi ilə hazırlanmış “inqilab cəhdinin” qarşısını alıblar və Bayden administrasiyasının “zorakılığına” qarşı durublar.
Kobaxidze həmçinin yazır ki, son siyasi hadisələr Gürcü cəmiyyətində Trampın “dərin dövlətlə mübarizə” ilə bağlı bəyanatlarının sadəcə imic dəyişikliyi cəhdi olduğu qənaətini yaradıb.
Kobaxidzenin Trampa məktubu – tam mətn
“Bir neçə həftə əvvəl sizə ABŞ-Gürcüstan münasibətləri ilə bağlı məktub yazdıq. Bu məktub, Gürcüstanın ABŞ ilə strateji tərəfdaşlığı konkret yol xəritəsi ilə sıfırdan bərpa etməyə hazır olduğunu ifadə etdiyim açıq çıxışlarımdan sonra göndərilmişdi. Lakin bu məktuba və ya ictimai bəyanatlara heç bir cavab gəlməyib. Hətta ABŞ və Gürcüstan hökumətləri arasında yüksək səviyyədə heç bir ünsiyyət baş verməyib.
Bu susqunluq Gürcü xalqı və hökuməti üçün bir neçə səbəbdən təəccüblüdür.
Əvvəla, Gürcüstan uzun illər boyu ABŞ-nin bu strateji əhəmiyyətli bölgədəki ən etibarlı tərəfdaşı olub. İraq və Əfqanıstan da daxil olmaqla, təhlükəli bölgələrdə ABŞ-a dəstək verib, hərbi kontingent baxımından birinci yerdə olub. Sadəcə bu missiyalarda iştirakla, Gürcüstan ABŞ-nin 2,5 milyard dollar qənaət etməsinə səbəb olub – bu, ABŞ-nin Gürcüstana birbaşa ayırdığı yardımdan çoxdur. (2008–2011-ci illərdə keçmiş prezident Saakaşvilinin rejiminin xilasına yönəlmiş maliyyə buraya daxil deyil).
ABŞ-ın Gürcüstana göstərdiyi “real yardım” həmçinin ABŞ səfirliyi, USAID, NED, Soros Fondu və digər kanallar vasitəsilə radikallığı, nifrəti, dini ekstremizmi, dövlət institutlarına qarşı etimadsızlığı və gender/LGBT təbliğatını dəstəkləmək məqsədi ilə ayrılmış vəsaitləri də əhatə etmir.
Gürcüstan bu gün də ABŞ-la strateji tərəfdaşlığı bərpa etməyə hazırdır, lakin sizin administrasiyadan gələn səssizlik anlaşılmazdır. Beynəlxalq reytinqlərə görə, Gürcüstan regionda demokratiya, insan haqları, mətbuat azadlığı və korrupsiya ilə mübarizə sahələrində liderdir. Sizin administrasiya isə bir neçə avtoritar ölkə ilə açıq dialoq apardığı halda, Gürcüstana qarşı bu laqeydlik bizə izaholunmaz görünür.
Biz USAID, NED və “dərin dövlət”in fəaliyyətlərini illər əvvəl açıq şəkildə tənqid etmişik – bu məsələlərdə mövqelərimiz sizinlə üst-üstə düşür. Ukrayna müharibəsi, gender və LGBT məsələlərində də ideoloji yaxınlıq var. Buna görə də, Gürcü xalqı sizin administrasiyadan xüsusi diqqət gözləyirdi.
Lakin bunun əvəzində bizə qarşı USAID-in maliyyələşdirdiyi çevriliş planına qarşı çıxan rəsmilərə sanksiyalar tətbiq edilib. Üstəlik, ABŞ Konqresi tərəfindən qəbul edilən “MEGOBARI Aktı” gülünc və düşməncəsinə yanaşma kimi qiymətləndirilir. Bu akt, Gürcüstan xalqının və hökumətinin seçiminə qarşı yönəlib. Və sizdən bu aktla bağlı heç bir tənqid gəlməyib.
Bu səbəbdən Gürcü xalqı “MEGOBARI Aktı”nın arxasında sizin administrasiyanın dayandığını düşünür və nəticədə həm ABŞ Konqresinə, həm də sizin administrasiyaya olan inam sarsılıb.
Son hadisələr göstərir ki, Gürcüstanda bir çox insan sizin “dərin dövlətə” qarşı mübarizə bəyanatlarınızı yalnız brend dəyişikliyi kimi qiymətləndirir. Bayden administrasiyasını sərt tənqid etməyinizə baxmayaraq, onların qərarlarını hələ də ləğv etməmisiniz.
Buna baxmayaraq, biz hələ də ümid edirik ki, siz “dərin dövlətə” qalib gələcəksiniz. Bu baş verərsə, Gürcüstan-ABŞ münasibətlərində yeni mərhələ başlaya bilər. Əks halda, Bayden administrasiyasının ssenarisi davam edəcək.
Bu gün də, USAID və NED-in maliyyələşdirdiyi 250 nəfər paytaxt Tbilisinin əsas prospektində etirazlar keçirir – bu, “dərin dövlət”in Gürcüstanda çevriliş planından hələ də imtina etmədiyini sübut edir.
Bütün suallarımıza baxmayaraq, biz ümid və nikbinliklə sizin “dərin dövlətlə” mübarizənizə inanırıq. Gürcü hökuməti bu anı səbirlə gözləyir – bu an bizim strateji tərəfdaşlığımızın bərpası üçün əsas ola bilər.
Birləşmiş Ştatlara bu mübarizədə güc və rifah arzulayırıq!”
news in Georgia
