KİV Gürcüstan hakimiyyətini Rusiya ilə əməkdaşlıqda günahlandırır
Paylaşmaq
Paylaşmaq
Media Gürcüstanın hüquq-mühafizə orqanlarını Rusiya ilə əməkdaşlıqda ittiham edib. Söhbət yanvarın 15-də Rusiyanın tələbilə Kiyevdə saxlanılan Gürcüstan sabiq hərbçisi Qiya Tsertsvadzedən gedir.
Gürcüstanın xüsusi təyinatlı dəstəsinin keçmiş zabiti hazırda könüllü olaraq Ukraynada terror əleyhinə əməliyyatlarda iştirak edir.
Rustavi-2 teleşirkətinin məlumatına görə, Rusiya istintaq orqanlarının Ukraynaya təqdim etdiyi sənədlərin arasında Tsertsvadzenin şəxsi məlumatları da olub. Bunu ancaq Gürcüstanın DİN və Ədliyyə Nazirliyinin məlumat bazasından almaq olardı.
Qiya Tsertsvadze 2003-cü ildə törətdiyi ehtimal olunan qətlə görə Rusiyada axtarışdadır. Onun haqqında ehtimal olunan qətldən 13 il sonra 2016-cı il dekabrın 23-də beynəlxalq axtarış elan olunub.
Ailəsi və ukraynalı vəkili bildirir ki, Rusiya 2008-ci il avqust müharibəsi iştirakçılarına qarşı ova başlayıb və Gürcüstanın hüquq-mühafizə orqanları bu işdə onlara tərəfdaşlıq edir.
“O, bir çox xüsusi əməliyyatlarda iştirak edib, indi Rusiya 2008-ci il avqust müharibəsinin iştirakçılarını təqib edir. İşlə bağlı sənədlərin arasında elə məlumatlar var ki, onları Rusiya ancaq Gürcüstandan ala bilərdi. Məsələnin Gürcüstan vətəndaşı ilə bağlı olmasına baxmayaraq, Gürcüstanın sərhəd polisi və ola bilər ki, digər orqanlar da Rusiya ilə əməkdaşlıq”, – teleşirkətə müsahibəsində Tsertsvadzenin vəkili Kseniya Prokonova bildirib.
Teleşirkətin xəbərinə görə, Gürcüstanda Tsertsvadze adına verilmiş bütün pasportların məlumatları, həmçinin onun başqa ölkələrin sərhədini keçməsilə bağlı informasiya Gürcüstanın Ədliyyə Nazirliyi və Daxili İşlər Nazirliyinin bazasından Moskvaya ötürülüb.
Gürcüstan DİN və digər rəsmi qurumları məsələylə bağlı açıqlama vermir.
Gürcüstanın sabiq hərbçisinin saxlanılması ilə bağlı ictimaiyyətə məlum olduqdan sonra sosial şəbəkələrdə onun müdafiəsinə dair kampaniyalara start verilib. Bu gün Vahid Milli Hərəkat (keçmiş prezident Mixail Saakaşvilinin rəhbərlik etdiyi) xarici diplomatlara müraciət edərək diplomatik kanalları işə salaraq saxlanılan şəxsin Rusiyaya verilməsinin qarşısını almalarını xahiş edib.
Qiya Tsertsvadze hazırda ibtidai istintaq müddətinə həbs olunub və apelyasiya məhkəməsinin qərarını gözləyir.