Keçmiş Rusiya kəşfiyyatçısını İngiltərədə zəhərləyiblər

İngiltərənin Solsberi şəhərinin ticarət mərkəzində huşsuz halda kişi və qadın tapılıb. Kişinin Rusiya kəşfiyyat orqanının keçmiş əməkdaşı Sergey Skripal olduğu aydınlaşıb.

Şahidlərin sözlərinə görə, Skripal özünü çox qəribə aparırmış, sanki o həddən artıq sərxoş və ya narkotik maddənin təsiri altında imiş. Yanında oturan qız da qəribə əl hərəkətləri edir, özünü qeyri-adekvat aparırmış.

Onlar xəstəxanaya çatdırılıb, artıq iki gündür ki, ağır vəziyyətdədirlər, BBC xəbər verir. Onların aşkarlandığı bina qapadılıb, orada zəhərli maddələr üzrə mütəxəssislər çalışır.

Britaniya mediası Skripalın yanındakı qızın onun övladı olduğunu ehtimal edir, amma bu məlumat hələlik təsdiqlənməyib.

1990-cı illərdə Sergey Skripal daha çox Baş Kəşfiyyat İdarəsi (BKİ) adı ilə tanınan Baş Qərargahın əsas idarəsində işləyib. Bu, Rusiya kəşfiyyatının mərkəzi orqanıdır.

Rusiya xüsusi xidmət orqanları bildirir ki, 1995-ci ildə Avropaya ezamiyyətlərinin birində Sktipal Britaniya kəşfiyyatı tərəfindən əməkdaşlığa cəlb olunub. 1999-cu ildə o, polkovnik rütbəsində istefaya çıxıb, bir neçə il Xarici İşlər Nazirliyində (XİN) çalışıb, bundan sonra 2004-cü ildə Federal Təhlükəsizlik Xidməti (FTX) tərəfindən həbs edilib.

2006-cı ildə Skripalı dövlətə xəyanətdə günahlandıraraq, 13 il müddətinə azadlıqdan məhrum ediblər. Amma 2010-cu ildə onu dövlətə xəyanətdə təqsirli bilinən digər bir neçə rusiyalı ilə birlikdə ABŞ-da ifşa olunmuş Rusiya kəşfiyyatçılarına dəyişiblər.

Skripal İngiltərənin Solsberi şəhərində məskunlaşıb. Bir il sonra həyat yoldaşı vəfat edib. Bundan bir neçə il sonra isə Rusiyaya istirahətə gedən oğlu orada dünyasını dəyişib.

BBC-nin mənbələri bildirirlər ki, Skripal vaxtaşırı Mİ6-nın (Böyük Britaniya XİN-in Məxfi Kəşfiyyat Xidməti) ofisinə gələrək, BKİ haqda leksiyalar oxuyurmuş.

Britaniya polisi hələlik baş verənlər haqda heç bir versiya irəli sürməyib, amma ən yüksək ehtimal zəhərlənmə ilə bağlıdır.

2006-cı ildə İngiltərədə FTX-nın keçmiş əməkdaşı Aleksandr Litvinenko da zəhərlənmişdi. 2000-ci ildə FTX rəhbərliyinin və 1998-1999-cu illərdə bu qurumun  direktoru olmuş Vladimir Putinin hüquqa zidd əməlləri ilə bağlı bir neçə səs-küylü bəyanatından sonra Litvinenko ailəsi ilə birlikdə Rusiyadan qaçmaq məcburiyyətində qalmışdı. Onlar Böyük Britaniyada siyasi sığınacaq ala bilmişdi.

Litvinenko Britaniya xüsusi xidmət orqanları ilə əməkdaşlıq edirdi. 2006-cı ildə o, radioaktiv maddədən zəhərlənərək həyatını itirdi. On il sürən araşdırmadan sonra məhkəmə Litvinenkonun qətlinin arxasında böyük ehtimalla Vladimir Putinin razılığı ilə  FTX-nın dayandığı qənaətinə gəldi.