Polşada vergidən yayınma ittihamı ilə saxlanılan azərbaycanlı siyasi mühacir zəmanətə buraxılıb

9 yanvar

Polşada Interpol tərəfindən saxlanılan azərbaycanlı müxalif fəal və siyasi mühacir Daşqın Ağalarlı zəmanətə buraxılıb.

Ağalarlının sözlərinə görə, beynəlxalq hüquq müdafiə təşkilatlarının, Norveç hökumətinin müdaxiləsi, o cümlədən də fəalın adını açıqlamadığı Polşa vətəndaşının zaminliyi sayəsində onun azadlığa çıxması mümkün olub.

Daşqın Ağalarlı bildirir ki, Azərbaycan hakimiyyəti onu vergidən yayınmaqda günahlandırır. Buna görə də yanvarın 6-da Interpol onu Polşanın Qdansk şəhərinin aeroportunda saxlayıb. Ağalarlı özü hesab edir ki, bu ittiham uydurmadır və siyasi motivlidir.

İndi Polşa Prokurorluğu Azərbaycan tərəfinin irəli sürdüyü ittihamın nə dərəcədə əsaslı olduğunu və fəalın ekstradisiyası üçün səbəb olub-olmadığını araşdırır. İstintaq getdiyi müddətdə Ağalarlı Varşavada qalmalı olacaq.

6 yanvar

Üç il əvvəl Norveçdə siyasi sığınacaq alan azərbaycanlı siyasi mühacir Daşqın Ağalarlı yanvarın 6-da Interpol tərəfindən Qdansk (Polşa) aeroportunda həbs olunub.

Ağalarlının sözlərinə görə, onu Azərbaycan hakimiyyətinin sorğusuna əsasən həbs ediblər və Azərbaycana geri göndərməyə hazırlaşırlar. Ona qarşı konkret hansı ittihamların irəli sürüldüyü məlum deyil. Ağalarlı hesab edir ki, Azərbaycan hakimiyyəti onu təqib edir.

2014-cü ildə Ağalarlı vergidən yayınmaqda ittiham olunaraq Gürcüstanda həbs olunmuşdu.

• Yeni Kasablankanın casus oyunları: niyə azərbaycanlı siyasi mühacirləri artıq Tbilisidə istəmirlər?

• Gürcüstanlı əmək miqrantları Polşada necə yaşayır?

Gürcüstandan Norveçə

Azərbaycanda Daşqın Ağalarlı müxalifətçi fəaliyyəti ilə məşğul olub. 2014-cü ildə o, ailəsi ilə birlikdə Gürcüstana köçüb. Bundan az sonra o, vergidən yayınmaya görə məsuliyyətə cəlb olunaraq Tbilisidə həbs edilib və istintaq təcridxanasına yerləşdirilib. Yarım ildən sonra yerli hüquq müdafiəçilərinin səyi nəticəsində o, azadlığa çıxıb.

2017-ci ildə Ağalarlı Gürcüstanda siyasi sığınacaq alıb, amma sonra bu statusdan məhrum edilib və Gürcüstanı tərk etməli olub.

Nəticədə Norveçdə siyasi sığınacaq almağa müvəffəq olub. İndi orada yaşayır və Fransadan yayınlanan siyasi emiqrantlara aid “Turan TV” televiziyası ilə əməkdaşlıq edir.

Başına gələn bütün hər şeyin, o cümlədən də hazırkı həbsinin səbəbini Daşqın Ağalarlı Azərbaycan hakimiyyətinin onu fərqli düşüncəsinə görə təqib etməsində görür.

Qdanskda baş tutan həbs

“Mənim əsasında axtarışa verildiyim Azərbaycan pasportumun müddəti artıq bitib və mənim Norveç sənədim var. Polşa hakimiyyətinin nümayəndələri mənə deyirlər ki, onlar bunu araşdırmalıdırlar”, – Daşqın Ağalarlı “Kavkazskiy uzel” saytına danışıb.

Azərbaycanın Baş Prokurorluğu və Xarici İşlər Nazirliyi məsələ ilə bağlı hələlik heç bir açıqlama verməyib.

“Turan TV” kanalının aparıcısı Fikrət Hüseynli (o da Niderlandda yaşayan siyasi mühacirdir) Facebook səhifəsində yazıb ki, “Azərbaycanın Polşadakı səfirliyi Daşqın Ağalarlının ekstradisiyasına nail olmaq üçün işə başlayıb”. Onun fikrincə, beynəlxalq təşkilatlar və hüquq müdafiəçiləri hələ ki gec deyil bu problemin həlli üçün əllərindən gələni etməlidirlər.

Bir çox başqa sosial şəbəkə istitifadəçiləri Ağalarlını necə xilas etməyin yollarını axtarır və ya sadəcə onun azadlığa buraxılmasını tələb edirlər.

İlk hadisə deyil

Bu, artıq Azərbaycan hakimiyyətinin müxalif fəalları, jurnalistləri və siyasi miqrantları deportasiya, ekstradisiya etdirdiyi və ya sadəcə digər ölkədə oğurlatdırdığı ilk hal deyil.

Ən səs-küylü hadisə 2017-ci ildə baş vermişdi – jurnalist Əfqan Muxtarlını Tbilisidə oğurlayıb Azərbaycana gətirmiş, daha sonra sərhədi qanunsuz keçməkdə və hakimiyyət nümayəndəsinə müqavimət göstərməkdə günahlandıraraq altı il müddətinə azadlıqdan məhrum etmişdilər. Beynəlxalq hüquq müdafiə təşkilatları bu həbsi siyasi motivli hesab edir və Muxtarlını siyasi məhbus kimi tanıyır.

2019-cu ilin martında isə Rusiya talış milli azlığının hüquqlarının müdafiəsi ilə məşğul olan Fəxrəddin Abbasovu deportasiya edib. Bakı aeroportuna endiyi zaman Abbasov ərazi bütövlüyü əleyhinə çağırışlar etmək və düşmənçiliyin qızışdırılması ittihamı ilə dərhal həbs edilib.