İl ərzində Almaniyadan sığınacaq istəyən azərbaycanlıların sayı üç dəfə artıb

20016-cı ildə 4750 nəfər Azərbaycan vətəndaşı Almaniyadan sığınacaq istəyib. 2015-ci illə müqayisədə bu göstərici üç dəfə artıb.

2016-cı ildə daxil olan 4750 müraciətdən ancaq 2722-i haqqında qərar çıxarılıb, üstəlik yalnız 459 nəfər, yəni sığınacaq istəyən bütün azərbaycanlıların 10 faizə qədər müsbət cavab alıb. 63,4 faiz əsassızlıq səbəbindən rədd cavabı alıb. Bəziləri üçüncü dövlətə göndərilib, yerdə qalanların müraciəti isə araşdırılma mərhələsindədir. Bu haqda ANN.az portalı Almaniyanın Miqrasiya və Qaçqınların Məsələləri üzrə Federal İdarəsinə istinadən xəbər verir.

2015-ci ildə 1497 Azərbaycan vətəndaşı Almaniyadan sığınacaq istəyib. Onlardan ancaq 71 nəfəri müsbət cavab alıb.

Azərbaycan İnsan Haqları Mərkəzinin direktoru Eldar Zeynalovun sözlərinə görə, sığınacaq axtaranların böyük əksəriyyəti öz ricasını vətənində məruz qaldığı siyasi təqiblə əsaslandırır. Almaniyanın ailələrin bərpa edilməsi üçün etnik almanların repatriasiyası və yəhudilərin məskunlaşdırılması ilə bağlı və digər humanitar proqramları var, ümumi prosedura bu insanlara aid edilmir.

Zeynalov əlavə edir ki, son illərdə bəzi hüquq müdafiəçiləri azərbaycanlıların Avropaya emiqrasiya etmək arzusunun kütləviləşməsindən sui-istifadə edir.

“Bəzi həmkarların dələduzluqla bağlı mühakimə olunduğu hallar olub. Şəxsən mənə bir neçə dəfə belə bir sənəd almaq üçün nəticəsiz müraciət ediblər. Xahiş edənlərin sözlərinə görə, Avropanın miqrasiya xidmətlərində hüquq müdafiəçilərinin şahidliyi siyasi partiyaların vətəndaşlarımıza payladığı kağızlardan daha yüksək dəyərləndirilir”, – Zeynalov JAMnews-un müxbirinə bildirib.